លាងហ៊ាង ធ្លាក់អាហារូបករណ៍ ៤ ឆ្នាំជាប់គ្នា តស៊ូរហូតជាប់ទៅរៀនជំនាញវិស្វកម្មនៅបារាំង

2017-01-23 01:51:17
ចំនួនមតិ 0 | ចំនួនចែករំលែក 0

ចន្លោះមិនឃើញ

យុវជនវ័យជាង ២១ ឆ្នាំ លឹម លាងហ៊ាង ទទួលបរាជ័យក្នុងការប្រកួតប្រជែងយកអាហារូបករណ៍ទៅសិក្សានៅប្រទេសបារាំងតាំងពីឆ្នាំទី ១ ដល់ទី ៤ តែយុវជនរូបនេះតស៊ូរហូតបានទៅរៀនជំនាញវិស្វកម្មសំណង់ស៊ីវិលសមដូចបំណង។

លឹម លាងហ៊ាង និងគ្រួសារមុនចេញដំណើរមកបារាំង

ស្ថិតក្នុងជីវភាពគ្រួសារមធ្យមមួយ លឹម លាងហ៊ាង ជាកូនទី២ មានបងប្អូនសរុប ៣ នាក់មានស្រុកកំណើតមកពីខេត្តពោធិ៍សាត់ ធ្លាប់រៀននៅបឋមសិក្សានិងអនុវិទ្យាល័យនៅស្រុកកំណើត ហើយបានផ្លាស់មកបន្តការសិក្សានៅវិទ្យាល័យសន្ធរម៉ុកក្នុងឆ្នាំ ២០០៩ ដោយស្នាក់នៅជាមួយបងជីដូនមួយនៅភ្នំពេញ។

បន្ទាប់ពីបានបញ្ចប់មធ្យមសិក្សាទុតិយភូមិក្នុងឆ្នាំ ២០១២ ដោយទទួលបាននិទ្ទេស A លាងហ៊ាងក៏បានចូលរៀននៅវិទ្យាស្ថានបច្ចេកវិទ្យាកម្ពុជា។ កាលឆ្នាំទី ១ លាងហ៊ាងធ្លាប់បានប្រលងទៅប្រទេសជប៉ុន ប៉ុន្តែដោយសារតែមិនបានត្រៀមខ្លួនគ្រប់គ្រាន់ ក៏ទទួលបានលទ្ធផលមិនដូចចិត្ត ។ បន្ទាប់មក លាងហ៊ាងបានដាក់ពាក្យប្រលងទៅប្រទេសវៀតណាម កាលនោះបានប្រលងជាប់ ប៉ុន្តែអ្នកផ្ទះមិនអនុញ្ញាតិឲ្យទៅបន្តការសិក្សា ដោយហេតុផលចង្អៀតចង្អល់។

បន្តរហូតដល់ឆ្នាំទី ៣ យុវជនកូនកាត់ចិនរូបនេះ ក៏បានដាក់ពាក្យប្រលងទៅសាលាល្បីលំដាប់លេខមួយ Ecole Polytechnique នៅប្រទេសបារាំងដើម្បីរៀនជំនាញវិស្វកម្ម ក្នុងឆ្នាំនោះមាននិស្សិតខ្មែរ ៣ នាក់បានជាប់ ប៉ុន្តែជាអកុសលលាងហ៊ាងមិនបានជាប់នោះទេ។ ប៉ុន្តែមានសាលាមួយទៀតបានទាក់ទងមក រួចក៏ធ្វើការសម្ភាសន៍តាមរយៈ Skype ដោយមានបេក្ខជនតែ ២ នាក់ប៉ុណ្ណោះ។

ពេលនោះដែរខាងសាលាបានប្រាប់មកវិញថាពូកគេត្រូវបានជ្រើសរើសហើយ បេក្ខជនត្រូវរៀបចំឯកសារដើម្បីរៀបចំសុំអាហារូបករណ៍ ដើម្បីមកសិក្សានៅប្រទេសបារាំងបាន ដោយត្រូវមានការទទួលស្គាល់ពីខាងសាលាកំពុងរៀន(តិចណូ) និងបំពេញពាក្យសុំអាហារូបករណ៍។

យុវជនវ័យ ២១ ឆ្នាំបានផ្ញើរឯកសារឲ្យគេរួចរាល់នៅចុងខែធ្នូឆ្នាំ ២០១៥ ដោយរង់ចាំលទ្ធផល នៅខែមិនា ឆ្នាំ ២០១៦។ ប៉ុន្តែក្នុងខែកុម្ភះ ក៏បានទទួល Email ពីខាងសាលាដោយប្រាប់ថាពាក្យសុំរបស់គេមិនត្រូវបានខាងសាលានៅបារាំងផ្ញើរទៅនោះទេ។

យុវជនមានស្រុកកំណើតមកពីទឹកដីសំបូរថ្មកែវ បានឲ្យ Sabay ដឹងថា ពេលនោះខូចចិត្តខ្លាំងណាស់សឹងតែមិនអាចធ្វើអ្វីបាន ប៉ុន្តែគេបានប្រាប់ខ្លួនឯងត្រូវខំរៀនបន្តទៀតយកលេខ ១ ក្នុងដេប៉ាតឺម៉ងឲ្យបាន ដើម្បីមានឱកាសដាក់អាហារូបករណ៍ទៅប្រទេសបារាំងម្ដងទៀត។

ដោយក្ដីព្យាយាមនៅឆ្នាំទៅ ៤ លាងហ៊ាងក៏ទទួលបានចំណាត់ថ្នាក់លេខ១ ប្រចាំដេប៉ាតឺម៉ង់ពិតមែន ហើយក៏បានដាក់ពាក្យរួមជាមួយបេក្ខជន ២ នាក់ផ្សេងទៀត ដោយឆ្លងកាត់ការសម្ភាសន៍ ២ ដងទើបបានជាប់ទៅរៀននៅសាលាបារាំង បន្ទាប់ពីសាលា Ecole Polytechnique ក្នុងប្រទេសបារាំងគឺសាលា Polytech Lille ក្នុងប្រភេទអាហារូបករណ៍ Polytech excellent scholarship។ រហូតមកដល់ពេលនេះ យុវជនរូបនេះបានទៅសិក្សានៅប្រទេសបារាំងប្រហែលជា ៥ ខែហើយ ប៉ុន្តែឧបសគ្គកំពុងប្រឈមគឺ ភាសាសម្រាប់ទំនាក់ទំនងគ្នា និងបញ្ហាអាកាសធាតុ ព្រោះមិនធ្លាប់ទ្រាំនឹងអាកាសធាតុត្រជាក់បែបនេះពីមុនមកនោះទេ។

ក្នុងនាមជានិស្សិតរៀមច្បង លឹម លាងហ៊ាង បានលើកទឹកចិត្តដល់ប្អូនៗជំនាន់ក្រោយដែលមានបំណងចង់ដាក់អាហារូបករណ៍ទៅរៀននៅក្រៅប្រទេស កុំបាក់ទឹកចិត្តនិងបោះបង់ឲ្យសោះ ព្រោះនៅពេលដែលអ្នកបោះបង់វានៅត្រង់ណា អ្នកនឹងបរាជ័យនៅត្រង់ចំណុចនោះ។ ការដាក់អាហារូបករណ៍មិនមែនដាក់តែម្ដងអាចជាប់ទេ ត្រូវពឹងលើសមត្ថភាពនិងសំណាង។ នៅពេលដែលអ្នកប្រឹងអស់ពីសមត្ថភាព ទោះជាលទ្ធផលយ៉ាងណាក៏អ្នកអាចនឹងពេញចិត្តនូវអ្វីដែលខ្លូនឯងបានធ្វើដែរ។ "បើនិយាយពីសំណាងខ្ញុំសឹងតែគ្មាន ប៉ុន្តែថ្ងៃនេះខ្ញុំអាចមកដល់ទីនេះ ដូច្នេះអ្នកក៏ធ្វើបានដែរ"៕