ឆាយ បូរ៉ា គ្រោងស្នើសុំរាជរដ្ឋាភិបាលលើកលែងពន្ធភាពយន្ត
- 2017-01-31 09:33:00
- ចំនួនមតិ 0 | ចំនួនចែករំលែក 0
ឆាយ បូរ៉ា គ្រោងស្នើសុំរាជរដ្ឋាភិបាលលើកលែងពន្ធភាពយន្ត
ចន្លោះមិនឃើញ
ព្រឹកនេះ ផលិតករភាពយន្ត ឆាយ បូរ៉ា បានបង្ហោះសារលើគណនីហ្វេសប៊ុករបស់ខ្លួនស្ដីពី ភាពលំបាក និងហានិភ័យ នៃការផលិតភាពយន្តនៅកម្ពុជា ក្នុងនោះលោកក៏បានលើកឡើងថា ប្រហែលជាត្រូវស្នើសុំរាជរដ្ឋាភិបាលឲ្យលើកលែងការគិតពន្ធភាពយន្តទៀតផង។
ឆាយ បូរ៉ា និយាយថា "រដ្ឋបានទុកអនុគ្រោះពន្ធ និងទុកឱកាសអោយគ្រឹះស្ថានអប់រំឯកជន រហូតដល់១០ឆ្នាំ តែបែរជាមិនទុកឱកាសអោយវិស័យភាពយន្តសោះ" ។ ដូច្នេះលោក ប្រហែលជាត្រូវធ្វើលិខិតស្នើសុំទៅប្រមុខរាជរដ្ឋាភិបាល ដើម្បីលើកលែងការយកពន្ធទាំងនេះហើយ និងសុំទុកឱកាសអោយវិស័យភាពយន្តឈានទៅរកភាពរឹងមាំជាងមុន។
ចាងហ្វាងផលិតកម្មដើមត្នោតរូបនេះ បានគាស់កកាយពីភាពដុនដាបរបស់ភាពយន្ត នៅឆ្នាំ២០០២ ដែលត្រូវបានដួលរលំទាំងស្រុង តែក៏ត្រូវបានងើបឡើងវិញនៅឆ្នាំ២០១៥ ប៉ុន្តែនៅមិនទាន់មានភាពរឹងមាំនៅឡើយ។
ដោយលោកលើកឡើងថាប្រាក់ចំណូលដែលបានមក ហើយត្រូវបែងចែកតាមផ្នែកនីមួយៗដូចជា៖
១-បង់ពន្ធ VAT ១០ភាគរយ លើប្រាក់ចំណូលសរុបដែលបានពីការលក់សំបុត្រ ២-បងពន្ធ កាត់ទុក withholding Tax ១៥ភាគរយ ៣-បង់អោយរោងភាពយន្ត ៤៦ ភាគរយលើចំណូលសរុប បន្ទាប់ពីកាត់ពន្ធ។ ៤- បង់អោយក្រុមហ៊ុនចែកចាយ ៥ ភាគរយ ប្រសិនបើផលិតករត្រូវការ ផលិតករត្រូវចំណាយ ៧៦% នៃប្រាក់ចំណូលរបស់ខ្លួន លើពន្ធ និងរោងភាពយន្ត ផលិតករនៅសល់តែ ២៤ភាគរយតែប៉ុណ្ណោះនេះ មិនបូករាល់ការចំណាយលើការផ្សព្វផ្សាយ និង សម្ពោធផ្សេងៗទេ ។ ភាពយន្តដែលផលិតអោយមានគុណភាព ត្រូវចំណាយមិនក្រោម ១០ម៉ឺនដុល្លារទេ ក្នុងខណៈដែលអ្នកទស្សនាកុនខ្មែរជាមធ្យម ចន្លោះពី ២ទៅ៥ម៉ឺននាក់ជាមួយសំបុត្រទស្សនា តម្លៃ ៣ដុល្លារ ។
រំលឹកផងដែរថា ក្រោយពីសមាគមភាពយន្តកម្ពុជាសសេរលិខិតស្នើសុំលើកលែងពន្ធមួយចំនួនទៅក្រសួងវប្បធម៌ និងវិចិត្រសិល្បៈ ប្រមុខរាជរដ្នាភិបាលបានលើកលែងពន្ធកាត់ទុក១៥ភាគរយ រហូតដល់ឆ្នាំ ២០១៨ (ពន្ធកាត់ទុកនេះអាចទូទាត់ជាមួយពន្ធលើប្រាក់ចំណេញដែលមានអាត្រា ២០%) តែរក្សាពន្ធលើប្រាក់ចំណូលពីការលក់សំបុត្រទស្សនា ១០ភាគរយអោយនៅដដែល។ មានន័យថា បន្ទាប់ពីឆ្នាំ ២០១៨ទៅ រាល់ប្រាក់ចំណូលរបស់ផលិតករ ដែលបានពីការលក់សំបុត្រទស្សនាត្រូវបង់ចូលទៅរដ្ឋ ១៥% +១០% ប៉ុណ្ណោះ។
សូមចុចទីនេះដើម្បីអានអត្ថបទដើម