Smart ឈ្នះពានជាក្រុមហ៊ុនផ្គត់ផ្គង់អ៊ីនធឺណិតចល័តឈានមុខគេនៅកម្ពុជា

2017-02-06 10:53:48
ចំនួនមតិ 0 | ចំនួនចែករំលែក 0

ចន្លោះមិនឃើញ

Smart Axiata បានធ្វើខួប ៨ ឆ្នាំរបស់ខ្លួនជាមួយនឹងការឈ្នះពានរង្វាន់មួយទៀត គឺពានរង្វាន់បណ្ដាញទូរសព្ទចល័តលឿនជាងគេនៅកម្ពុជា ពីស្ថាប័ន Ookla ខណៈក្រុមហ៊ុនបន្តផ្ដល់សេវាអ៊ីនធឺណិតចល័តល្អបំផុតក្នុងតម្លៃសមរម្យ ដល់ប្រជាជនកម្ពុជាកាន់តែច្រើន។

ពាន Speed Test 2016 ផ្ដល់ដោយ Ookla គឺជាពានចុងក្រោយគេក្នុងចំណោមពានជាច្រើនដែល Smart ទទួលបានកាលពីឆ្នាំមុន។ Smart ទទួលពាន "ក្រុមហ៊ុនទូរគមនាគមន៍ចល័តល្អបំផុតនៅកម្ពុជាឆ្នាំ២០១៦" ពីស្ថាប័នស្រាវជ្រាវទីផ្សារ Frost & Sullivan និងបានពាន "គម្រោងសហគមន៍ល្អបំផុត" ពីស្ថាប័ន Telecom Asia សម្រាប់ការចូលរួមក្នុងយុទ្ធនាការអក្ខរកម្មជាតិរបស់កម្ពុជា ដោយសហការជាមួយក្រសួងអប់រំ និងអង្គការយូណេស្កូ។ Smart ក៏ត្រូវជ្រើសរើសដោយស្ថាប័ន Global Banking និង Finance Review សម្រាប់ពាន "ក្រុមហ៊ុនទូរគមនាគមន៍ល្អជាងគេ" និង "ក្រុមហ៊ុនដែលមានទំនួលខុសត្រូវសង្គមល្អជាងគេ" រយៈពេល ២ ឆ្នាំជាប់គ្នា ពោលគឺឆ្នាំ២០១៥ និងឆ្នាំ២០១៦។

ពានចុងក្រោយពី Ookla ដែលជាស្ថាប័នឈានមុខគេលើពិភពលោកក្នុងការធ្វើតេស្តល្បឿនអ៊ីនធឺណិត នេះ សម្រេចបាន ដោយសារក្រុមហ៊ុនបានធ្វើការវិនិយោគថ្មីៗបន្ថែមលើបច្ចេកវិទ្យាទំនើបប៉ុន្មានខែចុងក្រោយនេះ ក្រោមចក្ខុវិស័យបន្តអភិវឌ្ឍផ្នែកទិន្នន័យអ៊ីនធឺណិត និងដើម្បីក្លាយជាក្រុមហ៊ុនផ្ដល់សេវាអ៊ីនធឺណិតចល័តល្បឿនលឿនបំផុតនៅកម្ពុជា។

លោក Thomas Hundt នាយកប្រតិបត្តិ Smart Axiata

លោក Thomas Hundt នាយកប្រតិបត្តិ Smart Axiata ថ្លែងថា៖ "យើងកំពុងស្ថិតក្នុងពេលមួយដ៏អស្ចារ្យក្នុងបដិវត្តបច្ចេកវិទ្យាឌីជីថលនៅកម្ពុជា ដែលសេវាអ៊ីនធឺណិតចល័តល្បឿនលឿន និងគុណភាពខ្ពស់ មានដល់ដៃអតិថិជនទូទាំងប្រទេសក្នុងតម្លៃសមរម្យបំផុត។ Smart វិនិយោគជាបន្តបន្ទាប់នៅកម្ពុជា។ ជាក់ស្ដែង ឆ្នាំ២០១៦ យើងបណ្ដាក់ទុនបន្ថែម ៧៥ លានដុល្លារ ពង្រីកបណ្ដាញ 4G ហើយយើងគ្រោងនឹងវិនិយោគ ៨០ លានដុល្លារបន្ថែមទៀតក្នុងឆ្នាំ២០១៧ ក្នុងការផ្ដល់សេវាអ៊ីនធឺណិតចល័តល្បឿនលឿនបំផុត និងបណ្ដាញគ្របដណ្ដប់ធំទូលាយបំផុត ជាមួយបច្ចេកវិទ្យា 4G+ និង HD Voice ដល់កម្ពុជា"។

Smart ជាក្រុមហ៊ុនដំបូងគេដែលបានអភិវឌ្ឍបណ្ដាញ 4G LTE របស់ខ្លួនទៅជា 4G+ ក្នុងខែកញ្ញា ២០១៦ ដោយពង្រីកស្ពិចត្រូម 4G របស់ខ្លួន។ មានន័យថា អតិថិជនអាចទទួលបានអ៊ីនធឺណិតកាន់តែលឿនជាងមុន។

បច្ចុប្បន្ន Smart កំពុងដាក់ចេញបច្ចេកវិទ្យា 4G VoLTE (Voice Over Long Term Evolution) ដែលនឹងភ្ជាប់ការខលទៅអ្នកដទៃលឿនជាងមុន និងជួយឲ្យសំឡេងច្បាស់ជាងមុន។ អ្នកប្រើទូរសព្ទ ដូចជា Galaxy S7/S7 Edge, P9 Plus, GR5 និង iPhone 6/6s/7 អាចទទួលបានអត្ថប្រយោជន៍ខលកាន់តែលឿន បទពិសោធន៍ហៅទូរសព្ទឥតអាក់ និងមានគុណភាព HD voice ពេលប្រើបណ្ដាញ 4G+ LTE នេះ៕

ដោយ៖ វិទូ