ណាសាចេញមុខបកស្រាយព័ត៌មាន ការបញ្ចប់ពិភពលោកថ្ងៃ ១៦ កុម្ភៈ

2017-02-08 03:05:28
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីចុងខែមករាកាសែត Daily Mail បានចេញផ្សាយព័ត៌មានមួយអំពីចុងបញ្ចប់នៃពិភពលោកដែលនឹងកើតមាននៅថ្ងៃទី ១៦ ខែកុម្ភៈនេះ កើតឡើងដោយសារអាចម៍ផ្កាយ 2016 WF9 ហោះមកបុកផែនដី។

បន្ទាប់ពីឃើញការចុះផ្សាយនេះ អង្គការណាសាក៏បានចេញមុខមកបកស្រាយថា ៖ «វត្ថុមួយដែលមានឈ្មោះ 2016 WF9 ត្រូវបានគម្រោងការ NEOWISE របស់ណាសាប្រទះឃើញនិងរាយការណ៍ឲ្យដឹងនៅថ្ងៃ ២៧ វិច្ឆិកា ឆ្នាំ ២០១៦។ វត្ថុនេះនឹងហោះមកកាន់គន្លងផែនដីនៅថ្ងៃទី ២៥ ខែកុម្ភៈ ឆ្នាំ ២០១៧ ដោយស្ថិតនៅចម្ងាយ ៥១ លានគីឡូម៉ែត្រពីផែនដី។ ដំណើរឆ្លងកាត់របស់ 2016 WF9 ត្រូវបានស្វែងយល់កាន់តែស៊ីជម្រៅ ដោយវត្ថុនេះនឹងមិនផ្ដល់ការគំរាមកំហែងអ្វីដល់ផែនដីឡើយនាពេលអនាគតខាងមុខ ដោយវាអាចហោះមកក្បែរផែនដីបំផុតនៅចម្ងាយ ១,៦ លានគីឡូម៉ែត្រឯណោះ»។

ណាសាបន្ថែមថា មិនឃើញមានកំណត់ត្រា ឬ ទំនាក់ទំនងអ្វីនៃតារាវិទូរុស្សីដែលគេបានដកស្រង់សម្ដីនៅក្នុងព័ត៌មានដែល Daily Mail ចុះផ្សាយនោះទេ។ សហភាពព័ត៌មានដែលមានកេរ្តិ៍ឈ្មោះជាច្រើនក៏មិនអាចរកឃើញថាបុគ្គលដែលគេបានស្រង់សម្ដីនោះជាមនុស្សពិតដែលមានទំនាក់ទំនងជាមួយស្ថាប័នសិក្សា ឬ បានបោះពុម្ពផ្សាយការងារវិទ្យាសាស្ត្រអ្វីមួយពីមុនមកនោះទេ។

ការិយាល័យសម្របសម្រួលការការពារភព (PDCO) របស់អង្គការណាសាតែងតែធ្វើការជាមួយនឹងវិទ្យាស្ថាន និងអ្នកសង្កេតការណ៍ទាំងឡាយជុំវិញពិភពលោក។ PDCO តែងតាមដាន និង សិក្សាលម្អិតពីវត្ថុគ្រោះថ្នាក់នៅលំហអាកាស រួមទាំងផ្ដល់ការព្រមានជាមុនពីការបាតុភូតប៉ះទង្គិចដ៏គ្រោះថ្នាក់មកលើផែនដី៕

ប្រភព៖ Aol. ប្រែសម្រួល៖ សុខហេង