ម៉ា សេរី លាចាកលោក លាកីឡាហើយ តែសល់ស្នាដៃក្នុងសិល្បៈរាប់មិនអស់

2017-02-08 03:04:50
ចំនួនមតិ 0 | ចំនួនចែករំលែក 0

ចន្លោះមិនឃើញ

បទ"រនោចខែប្រាំង" បទ"ទឹកភ្នែកជនពាល" បទ"បាត់ស្នេហ៍នៅបាត់ដំបង" បទ"អរគុណភាពក្រ" និងចម្រៀងច្រើនទៀត សុទ្ធសឹងជាបទតែងនិពន្ធដោយលោក ម៉ា សេរី អ្នកផលិតកម្មវិធីកីឡាដ៏ល្បីល្បាញប្រចាំប្រទេស នេះបើតាមការឲ្យដឹងពីអ្នកស្រី ស៊ួរ វ៉ាន់នី ម្ចាស់ផលិតកម្ម"រស្មីស្ទឹងសង្កែ"។

តាមការបញ្ជាក់របស់ម្ចាស់ផលិតកម្មខាងលើ លោក ម៉ា សេរី ធ្លាប់មានស្នាដៃច្រើនណាស់ក្នុងការនិពន្ធបទចម្រៀង ជាមួយគ្នានោះបទចម្រៀងប្រហែលពី ២០ទៅ៣០បទ ត្រូវបានលោកសរសេរឲ្យផលិតកម្មរស្មីស្ទឹងសង្កែ។

បទចម្រៀងទាំងនោះ លោក ម៉ា សេរី សរសេរឡើងភាគច្រើនជាបទ មនោសញ្ចេតនា កម្សត់ បទបែបយុវវ័យមិនមានឡើយនៅ រស្មីស្ទឹងសង្កែ។ តារាចម្រៀងដែលលោកម៉ា សេរី សរសេរឲ្យច្រើន មាន លោក ឈឿន ឧត្ដម ជិន សេរីយ៉ា លោក សេន រ៉ានុត កញ្ញា សុគន្ធ និសា ជាដើម។

អ្នកស្រី ស៊ួរ វ៉ាន់នី បានឲ្យដឹងបន្ថែមថា កាលសរសេរបទចម្រៀងឲ្យផលិតកម្មរស្មីស្ទឹងសង្កែ លោក ម៉ា សេរី មិនមែនជាបុគ្គលិកក្នុងផលិតកម្មអ្នកស្រីឡើយ គឺលោកបានសរសេរលក់ឲ្យអ្នកស្រីក្នុង១បទ តម្លៃ១០ ដុល្លារ។ លោកសរសេរបទចម្រៀងឲ្យផលិតកម្មខាងលើ ក្នុងកំឡុងឆ្នាំ ២០០១ ដល់២០០៤ គ្រាដែលលោកបម្រើការងារនៅ ប៉ុស្ដិ៍លេខ៥។

អ្នកផលិតកម្មវិធីកីឡាដ៏ល្បីល្បាញប្រចាំក្រុមហ៊ុន CBS លោក ម៉ា សេរី បានទទួលមរណភាពកាលពីវេលាម៉ោង៥:៥៤នាទីព្រឹកនេះនៅមន្ទីរពេទ្យខ្មែរ-សូវៀត បន្ទាប់ពីជំងឺមហារីកថ្លើមរបស់លោកធ្វើទុក្ខអស់រយៈពេលជាយូរមក។ លោកប្រសូតនៅថ្ងៃទី១០ ខែមេសា ឆ្នាំ១៩៦០ ក្នុងត្រកូលកសិករមួយស្ថិតក្នុងភូមិខ្នុរ ឃុំ ស្វាយអង្គ ស្រុកស្វាយរៀង ខេត្តស្វាយរៀង៕