Update៖ ក្រសួងប្រាប់ពីទីតាំងដើម្បីធ្វើសញ្ញាបត្របាក់ឌុបឡើងវិញ ករណីបាត់បង់

2017-02-10 08:52:24
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីថ្មីកន្លងទៅនេះ ក្រសួងអប់រំ យុវជន និងកីឡាបានបញ្ជាក់ថា ចំពោះអ្នកដែលបានបាត់សញ្ញាបត្រមធ្យមសិក្សាទុតិយភូមិអាចធ្វើឡើងវិញ ក្នុងករណីបាត់ដោយសារឧបទ្ទវហេតុណាមួយ។

បន្ថែមលើពីនេះ ដើម្បីឱ្យកាន់តែច្បាស់បន្ថែមទៀតចំពោះចម្ងល់ដែលមិនដឹងពីទីតាំងសម្រាប់ធ្វើសញ្ញាបត្របាក់ឌុបម្ដងទៀត ក្រសួងបានបង្ហាញពីទីតាំងដែលអាចធ្វើបាន។ ក្រសួងបានបញ្ជាក់ថា ដើម្បីសាកសួរព័ត៌មានទាក់ទងការបាត់សញ្ញាបត្រមធ្យមសិក្សាបឋមភូមិ និងទុតិយភូមិ សូមទំនាក់ទំនងដោយផ្ទាល់ទៅកាន់នាយកដ្ឋានមធ្យមសិក្សាចំណេះទូទៅ នៃក្រសួងអប់រំ យុវជន និងកីឡា ដែលមានអាសយដ្ឋានស្ថិតនៅអគារ ១៦៩ ផ្លូវព្រះនរោត្តម សង្កាត់បឹងកេងកង ខណ្ឌចំការមន រាជធានីភ្នំពេញ។

ចំពោះឯកសារ តម្រូវឲ្យអ្នកដែលបាត់សញ្ញាបត្រមធ្យមសិក្សាទុតិយភូមិនោះ ត្រូវភ្ជាប់មកជាមួយនូវ៖ សំបុត្រកំណើត វិញ្ញាបនបត្រមធ្យមសិក្សាបឋមភូមិថតចម្លងមួយមុខ០១ច្បាប់ និងលិខិតបញ្ជាក់ពីអាជ្ញាធរដែនដី ថាពិតជាមានឧបទ្ទវហេតុ ដែលបណ្ដាលឱ្យបាត់ពិតប្រាកដមែន។ នាយកដ្ឋានជំនាញ នឹងធ្វើជូនក្នុងរយៈពេលយ៉ាងយូរពីរសប្ដាហ៍ ដោយគ្មានបង់ប្រាក់ឡើយ។

សម្រាប់ព័ត៌មានបន្ថែម អាចចូលផេកហ្វេសប៊ុកផ្លូវការរបស់ក្រសួង MoEYS Cambodia ៕

អត្ថបទ៖ វឌ្ឍនៈ