SmartStart រង្វាន់ ៤ ពាន់ដុល្លារ មានឱកាសទស្សនកិច្ចក្រុមហ៊ុនយក្ស Facebook

2017-02-14 07:47:05
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន Smart បានសហការជាមួយក្រសួងអប់រំ យុវជន និងកីឡា និងក្រសួងប្រៃសណីយ៍ និងទូរគមនាគមន៍ បង្កើតកម្មវិធីប្រកួតប្រជែងបច្ចេកវិទ្យា SmartStart សម្រាប់និស្សិតបរិញ្ញាបត្រ។ ក្រុមនីមួយៗក្នុងចំណោម ៥ ក្រុមចុងក្រោយដែលលេចធ្លោ នឹងទទួលបានប្រាក់ឧបត្ថម្ភ ៤ ពាន់ដុល្លារ និងមានឱកាសទៅទស្សនកិច្ចក្រុមហ៊ុនបច្ចេកវិទ្យាយក្ស Facebook, Google និង Microsoft នៅប្រទេសសិង្ហបុរី។

រាប់ពីឆ្វេង លោក Thomas Hundt, ឯកឧត្ដម ហង់ ជួនណារ៉ុន និង ឯកឧត្ដម កាន ច័ន្ទមេត្តា

លោក Thomas Hundt នាយកប្រតិបត្តិក្រុមហ៊ុន Smart បានថ្លែងក្នុងពិធីប្រកាសបើកគម្រោង SmartStart ថា កម្មវិធីនឹងជួយជំរុញនិងអភិវឌ្ឍទេពកោសល្យ យុវជនបច្ចេកវិទ្យាជំនាន់ក្រោយ ក្នុងការបង្កើតគំនិតអាជីវកម្មទំនើបលើវិស័យបច្ចេកវិទ្យា។ កម្មវិធីនេះក៏មានវត្តមាន ឯកឧត្ដម ហង់ ជួនណារ៉ុន រដ្ឋមន្ត្រីក្រសួងអប់រំ និង ឯកឧត្ដម កាន ច័ន្ទមេត្តា រដ្ឋលេខាធិការក្រសួងប្រៃសណីយ៍ផងដែរ។

លោកថា SmartStart រៀបចំឡើងដោយមិនត្រឹមតែផ្ដល់ចំណេះដឹងបច្ចេកវិទ្យាថ្មីៗដល់និស្សិតប៉ុណ្ណោះទេ តែក៏ជួយផ្គត់ផ្គង់លើឧបករណ៍បច្ចេកទេស ផ្ដល់បទពិសោធន៍ ការបង្ហាត់បង្ហាញ និងថវិកាសម្រាប់បង្កើតអាជីវកម្មទៀតផង។

SmartStart មានរយៈពេល៩ខែ សម្រាប់និស្សិតសាកលវិទ្យាល័យឆ្នាំទី ៣ និងទី៤ ប្រកួតប្រជែងគំនិតអាជីវកម្មពាក់ព័ន្ធនឹងវិស័យបច្ចេកវិទ្យា។

កម្មវិធីនេះនឹងចាប់ប្រកួតប្រជែងសាកល្បងលើកដំបូង នៅសាកលវិទ្យាល័យធំក្នុងប្រទេសចំនួន ៤ មាន វិទ្យាស្ថានបច្ចេកវិទ្យាកម្ពុជា (សាលាតិចណូ), សាកលវិទ្យាល័យភូមិន្ទភ្នំពេញ, សាកលវិទ្យាល័យជាតិគ្រប់គ្រង និងវិទ្យាស្ថានជាតិប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍និងព័ត៌មានវិទ្យា (NIPTICT)។ សម្រាប់ឆ្នាំក្រោយៗ នឹងធ្វើតាមសាកលវិទ្យាល័យនានាទូទាំងប្រទេស។

សម្រាប់ដំណាក់កាលដំបូង កម្មវិធី SmartStart នឹងជម្រុះយកតែនិស្សិតប្រមាណ ១២០នាក់ប៉ុណ្ណោះ ឲ្យទទួលការហ្វឹកហ្វឺនបន្ថែមក្នុងសិក្ខាសាលា ដើម្បីដុសខាត់គំនិតអាជីវកម្ម។ បន្ទាប់មកកម្មវិធីនឹងជ្រើសយកក្រុមលេចធ្លោ ៥ ក្រុមប៉ុណ្ណោះ ដើម្បីប្រកួតប្រជែងគំនិតអាជីវកម្មបច្ចេកវិទ្យា បន្តទៀត។

ដំណាក់កាលនេះមានរយៈពេល ៦ ខែ ហើយក្រុមនីមួយៗទាំង ៥ ក្រុមនឹងបានប្រាក់ឧបត្ថម្ភ ៤ ពាន់ដុល្លារ ដើម្បីប្រែក្លាយគំនិតអាជីវកម្មពួកគេទៅជា អាជីវកម្ម សេវា និងផលិតផលជាក់ស្ដែង។ សម្រាប់ក្រុមដែលមានគំនិតអាជីវកម្មរីកចម្រើនខ្លាំងជាងគេ នឹងបានឱកាសធ្វើទស្សនកិច្ចទីស្នាក់ការក្រុមហ៊ុនបច្ចេកវិទ្យាយក្ស Facebook, Google និង Microsoft នៅប្រទេសសិង្ហបុរី។

ការទទួលពាក្យនឹងចាប់ផ្ដើមនៅថ្ងៃ ២០ កុម្ភៈ និងឈប់ទទួលពាក្យនៅថ្ងៃ ២៦ មីនា។ អាចទទួលពាក្យនិងព័ត៌មានបន្ថែម ដោយចូលទៅកាន់ smartstart.com.kh។

អត្ថបទ៖ ផាន់និត