លោកតា១០៥ឆ្នាំ កំពុងរៀនថ្នាក់បណ្ឌិតអមដោយឃ្លាតាំងចិត្តគួរឲ្យសរសើរមួយ

2017-02-22 03:27:57
ចំនួនមតិ 0 | ចំនួនចែករំលែក 0

ចន្លោះមិនឃើញ

លោកតា Zhao Muhe មានវ័យ១០៥ឆ្នាំ រស់នៅកោះតៃវ៉ាន់ កំពុងទទួលការកោតសរសើរពីមនុស្សជាច្រើន និងចាត់ទុកថាជាបុគ្គលគំរូ អមជាមួយពាក្យស្លោកថា «មិនដែលហួសពេលទេ បើចង់រៀន។»

លោកតា Zhao កំពុងរៀនថ្នាក់សវនកម្មនៅសាកលវិទ្យាល័យជាតិ Tsing Hua នៅតៃវ៉ាន់ ខណៈត្រៀមទទួលសញ្ញាប័ត្រថ្នាក់បណ្ឌិតឆាប់ៗ។ Zhao ធ្លាប់បានចូលរៀននៅសាកលវិទ្យាល័យជាតិ Open មួយទៀតនៅតៃវ៉ាន់ ក្នុងឆ្នាំ១៩៩៩ ដោយជិះកង់ទៅរៀនរាល់ថ្ងៃមិនដែលអវត្តមានម្ដងឡើយ។ តាតែងតែរៀនដល់យប់ជ្រៅ ហើយរយៈពេលតែ៤ឆ្នាំ លោកបានបញ្ចប់វគ្គចំនួន១២៨ ដើម្បីអាចបញ្ចប់ថ្នាក់បរិញ្ញាបត្រ នៅអាយុ៩១ឆ្នាំ។

ជាច្រើនឆ្នាំមកទៀត លោកតាសម្រេចបន្តការសិក្សាតាមរយៈប្រឡងចូលរៀនដោយជោគជ័យថ្នាក់អនុបណ្ឌិតនៅសាកលវិទ្យាល័យ Nanhua និងសិក្សារយៈពេល២ឆ្នាំ។ នៅអាយុ ៩៨ឆ្នាំ លោកតាបានជាប់កំណត់ត្រាពិភពលោក (Guinness) ជាមនុស្សចាស់បំផុតរៀនចប់ថ្នាក់អនុបណ្ឌិត។ ក្នុងឆ្នាំ ២០១៥ លោកតាបានចូលរៀនបន្តទៀតនៅសាកលវិទ្យាល័យជាតិ Tsing Hua ថ្នាក់បណ្ឌិត។

បើនិយាយពីជីវភាពប្រចាំថ្ងៃ លោកតារស់នៅតែម្នាក់ឯងក្នុងផ្ទះល្វែងចាស់មួយនៅជាន់ទី៤។ តា ដើរផ្សារទិញឥវ៉ាន់ បោកខោអាវ ចម្អិនអាហារខ្លួនឯង ដោយមិនព្រមឲ្យគេជួយ ព្រោះគិតថាខ្លួនមិនទាន់ចាស់ជរានៅឡើយ។

លោកតាកើតក្នុងឆ្នាំ១៩១២ នៅខេត្តសានទុង ប្រទេសចិន ដោយទទួលឥទ្ធិពលពីវប្បធម៌ចិន លោកតា បានរៀនក្នុងសាលាឯកជនមួយ និងចាប់ផ្ដើមសិក្សាអក្សរផ្ចង់ពេលអាយុ១៤ឆ្នាំ។ ការហាត់រៀនបែបនេះជាច្រើនឆ្នាំ ធ្វើឲ្យគាត់ក្លាយជាគ្រូអក្សរផ្ចង់ម្នាក់។ ជាច្រើនទសវត្សកន្លងទៅ តាបានបរិច្ចាគទឹកប្រាក់ជាច្រើនដែលរកដោយសប្បុរសធម៌អក្សរផ្ចង់ ដើម្បីជួយអ្នកក្រីក្រ។

ក្នុងឆ្នាំ ២០១២ លោកតាបានតាំងពិព័រណ៍អក្សរផ្ចង់នៅទីក្រុងហុងកុង ហើយបានផ្សព្វផ្សាយពីជីវប្រវត្តិខ្លួនឯងផង ដែលសរសេរដោយមនុស្សម្នាក់ទៀតផ្អែកតាមការនិយាយរៀបរាប់របស់លោកតា។ ក្រោយសៀវភៅប្រវត្តិបានសរសេររួច ពេលនេះលោកតា Zhao សម្រេចចិត្តរៀនប្រើប្រាស់អ៊ីនធឺណិតជាបណ្ដើរៗហើយ ដើម្បីឲ្យដើរទាន់សម័យកាល៕