គ្រឹះស្ថានផ្ដល់កម្ចី៖ អត់អាជ្ញាប័ណ្ណ ប្រឈមមុខផ្លូវច្បាប់ តែមានហើយក៏អត់រួចខ្លួន
- 2017-02-23 22:00:14
- ចំនួនមតិ 0 | ចំនួនចែករំលែក 0
គ្រឹះស្ថានផ្ដល់កម្ចី៖ អត់អាជ្ញាប័ណ្ណ ប្រឈមមុខផ្លូវច្បាប់ តែមានហើយក៏អត់រួចខ្លួន
ចន្លោះមិនឃើញ
ទាំងធនាគារ គ្រឹះស្ថានហិរញ្ញវត្ថុ ឬ "អង្គការ"រកស៊ី ចងការប្រាក់ ភាគច្រើន អតិថិជនគោលដៅរបស់អ្នកទាំងនោះជា "កសិករ" ស្ថិតនៅស្រុកស្រែចម្ការ ចុងកាត់មាត់ញក មានចំណេះដឹងតិចតួចស្ដួចស្ដើង រហូតមិនអាចបែងចែក ថាគ្រឹះស្ថានផ្ដល់កម្ចីដែលខ្លួនកំពុងខ្ចីបុលនោះ ជារបស់រដ្ឋ ឬឯកជន។ ភាពមិនច្បាស់លាស់ពីសាធារណជន ក្នុងការបែងចែកមេបំណុលរបស់ខ្លួនថាជារបស់ ឯកជន ឬរដ្ឋ បានធ្វើឲ្យរដ្ឋាភិបាលចាត់វិធានការក្ដៅ រហូតព្រមានបិទស្ថាប័នមីក្រូហិរញ្ញវត្ថុ ប្រសិនបើមិនផ្ដល់ការអប់រំ ឬផ្ដល់ព័ត៌មានជម្រះមន្ទិលច្បាស់លាស់។
អត់អាជ្ញាប័ណ្ណ៖
បណ្ដាស្ថាប័នផ្ដល់កម្ចីនានា ជ្រកក្រោមស្លាកផ្ដល់កម្ចី ដែលមានការប្រាក់ខ្ពស់ខ្លាំង ហួសហេតុ ដែលកត្តាមួយចំនួន កូនបំណុលមិនមានលទ្ធភាពសង ឬឈានដល់រឹបអូសដីធ្លី ផ្ទះសម្បែងជាដើម។ ទង្វើរបស់ស្ថាប័នមួយចំនួនតូចរកស៊ីក្រៅផ្លូវកាត់ មិនបានចុះបញ្ជីត្រឹមត្រូវនេះ កាលពីដើមឆ្នាំ២០១៥ ត្រូវបានក្រសួងសេដ្ឋកិច្ចនិងហិរញ្ញវត្ថុ និងធនាគារជាតិនៃកម្ពុជា បញ្ជាក់ឲ្យឈប់ឬប្រឈមមុខផ្លូវច្បាប់បើនៅតែគឃ្លើន។
“បើសុំអាជ្ញាប័ណ្ណបើកត្រឹមត្រូវអត់ចំណេញទេ...ណាមួយត្រូវការស្តង់ដារច្រើន...យើងអត់លទ្ធភាពធ្វើធនាគារណាស់"។ អ្នកចូលហ៊ុនម្នាក់សុំមិនបញ្ចេញឈ្មោះកំពុងបើកអង្គការផ្ដល់ប្រាក់កម្ចីនៅពោធិ៍សាត់ឆ្លើយឆ្លងជាមួយSabay។ ចុះអ្នកភូមិដែលជាកូនបំណុលស្គាល់ទេថា អង្គការអ្នកឯងជារបស់រដ្ឋ ឬឯកជន? ប្រភពឆ្លើយយ៉ាងខ្លីថា ពិតជាមានអ្នកមួយចំនួនមានការយល់ច្រឡំ។ យ៉ាងណាក្ដី មុនការប្រកាសរបស់រដ្ឋាភិបាលអំពីការណែនាំខ្លួនថាជា "ស្ថាប័នឯកជន" ទៅកូនបំណុល គឺខ្លួនបានអប់រំ និងដាក់វិន័យទៅគ្រប់CO ទាំងអស់ឲ្យធ្វើដូច្នេះតាំងពីអង្គការចាប់ផ្ដើមដំណើរការបានមួយរយៈប៉ុណ្ណោះ។
នៅកំពង់ចាមឯណេះវិញ ឆ្លើយតបទៅនឹងរហស្សនាម ក្នុងចំណុចទី១ អតីតCO ក្នុងអង្គការឯកជនមានបទពិសោធន៍ការងារជាង ២ឆ្នាំម្នាក់ នៅស្រុកមួយនៃខេត្តនេះប្រាប់ Sabay ថាស្ថាប័នដែលលោកធ្លាប់ធ្វើការក៏អត់មានអាជ្ញាប័ណ្ណដែរ ប៉ុន្តែជោគជ័យខ្លាំង ហើយអ្នកស្រុកស្គាល់ច្បាស់ថាជារបស់ឯកជន អត់មានច្រលំបល់ជាស្ថាប័នរដ្ឋទេ។ "ដំបូងដើមជាង ១ម៉ឺន(ដុល្លារ) គ្នាគាត់មេៗ ៣-៤នាក់ តែដើរបានជាង ២ឆ្នាំគាត់បើកសាខាបាន ៣-៤កន្លែង...ម៉ាសាខាៗដើមវិនិយោគអត់តិចជាង ៣ម៉ឺនដុល្លារទេ"។ "គ្រូអាទិត្យ" រូបនេះបន្ថែម។
“ចំណេញខ្លាំង...ដាក់ដើមតែម្នាក់ជាង ៣ពាន់ដុល្លារគ្នា ៣នាក់...ប៉ុន្មានខែម្នាក់ឯងខ្ញុំដកលុយចំណេញ បានជាង ៥ពាន់ដុល្លារទៅទិញឡានបាន១ ហើយដើមនៅដដែល"។ វិនិយោគិនបើកអង្គការផ្ដល់កម្ចីដូចគ្នាសម្រាប់កសិករដោះទាល់រយៈពេលខ្លី នៅខេត្តកណ្ដាលលើកឡើងដូច្នេះ។ តាមការកត់សម្គាល់ អតិថិជនមិនខ្វល់ថាកន្លែងលោកជារបស់ឯកជន ឬរដ្ឋទេ ហើយលោករឹតតែមិនបានចាប់អារម្មណ៍ថា អ្នកទាំងនោះដឹង ឬមិនដឹងនោះទេ។
រហស្សនាម៖
CO ឬមន្ត្រីផ្ដល់កម្ចី ត្រូវបានអ្នកភូមិ ឬអតិថិជនរបស់អ្នកទាំងនោះបែងចែកយ៉ាងច្បាស់ជា ២ដាច់ដោយឡែកពីគ្នា។ ទី១ "គ្រូអាទិត្យ" ឬ "គ្រូអង្គការ" ជារហស្សនាមដែលអ្នកស្រុកភូមិ ស្គាល់ច្បាស់ថាជារបស់ឯកជន ព្រោះត្បិតស្ថាប័នដែលជ្រកក្រោមយីហោ អង្គការផ្ដល់កម្ចីមិនបានច្រើន ឲ្យលើសពី ២លានរៀលទេ។ ទី២ "គ្រូរដ្ឋ" ឬ "គ្រូ+ឈ្មោះស្ថាប័ន" សំដៅលើ CO របស់គ្រឹះស្ថានហិរញ្ញវត្ថុ ឬធនាគារ ដែលមានស្តង់ដារ និងអាជ្ញាប័ណ្ណរកស៊ីត្រឹមត្រូវ។
ការប្រាក់៖
ការប្រាក់របស់អង្គការ អត់អាជ្ញាប័ណ្ណគិតជាអាទិត្យ ឬរាប់រាល់ថ្ងៃ ដែលមានរហូតចន្លោះពី ៩% ដល់ជាង ១១% ក្នុងមួយខែ ដោយទំហំទឹកប្រាក់ខ្ពស់បំផុតភាគច្រើនត្រឹម ២លានរៀល។ តួលេខដ៏ខ្ពស់នេះបានរាំងខ្ទប់ផ្លូវកសិករមួយចំនួនដែលពឹងផ្អែកទាំងស្រុងទៅលើចំណូលបានពីកសិផល (ខូចខាត ឬតម្លៃទីផ្សារចុះទាប) មិនមានលទ្ធភាពសង រហូតមានករណីខ្លះរឹបអូសដីធ្លី ឬផ្ទះសម្បែងក៏មាន។ ឧទាហរណ៍ពលរដ្ឋក ខ្ចីលុយ ១លានរៀលពីអង្គការមួយ ក្នុងអត្រាការប្រាក់ ៥% រយៈពេល ២សប្ដាហ៍។ ដូច្នេះបុគ្គលក មានភារៈ បង់ទាំងដើម + ការប្រាក់ ៥% រៀងរាល់ ២សប្ដាហ៍ម្ដង ក្នុងកាលកំណត់ព្រមព្រៀងណាមួយ។
គ្រឹះស្ថានមានអាជ្ញាប័ណ្ណ៖
អត់អាជ្ញាប័ណ្ណរឿងមួយ ប៉ុន្តែMFI ដែលមានអាជ្ញាប័ណ្ណពីក្រសួងត្រឹមត្រូវ ក៏អត់រួចខ្លួនដែរ ឬអាចបិទទ្វារទាំងស្រុង ប្រសិនបើមិនបានបញ្ជាក់ ឬអប់រំប្រជាពលរដ្ឋពីការខ្ចីបុលស្ថាប័នឯកជនទាំងនោះ ហើយច្រឡំថាពួកគេមកខ្ចីបំណុលពីរដ្ឋ។
ឧកញ៉ាបណ្ឌិត ប៊ុន មុនី ទីប្រឹក្សានៃសមាគមមីក្រូហិរញ្ញវត្ថុកម្ពុជា បានបង្ហាញរបាយការណ៍ថា ស្ថាប័នមីក្រូហិរញ្ញវត្ថុដែលចុះបញ្ជីត្រឹមត្រូវមាន ៦០ស្ថាប័ន ក្នុងឆ្នាំ ២០១៦ បើគិតជាសាច់ប្រាក់វិនិយោគមានរហូតដល់ ៣ពាន់លានដុល្លារអាមេរិក។ ក្នុងបទសម្ភាសន៍ជាមួយអាស៊ីសេរី ទីប្រឹក្សារូបនេះបន្តថា ប្រជាពលរដ្ឋ ២លានគ្រួសារដែលភាគច្រើនរស់នៅតាមជនបទ ឬ ប្រមាណ ៦០%នៃគ្រួសារសរុបទូទាំងប្រទេសកំពុងជាប់បំណុលគ្រឹះស្ថានមីក្រូហិរញ្ញវត្ថុ។
សមត្ថកិច្ចរឹបអូស៖
កាតព្វកិច្ចរបស់អ្នកខ្ចីបុល មិនអាចសងបំណុលបាន គឺត្រូវតែរឹបអូស។ ចំពោះការរឹបអូសនោះ គឺយើងគ្មានអំណាចទៅរឹបអូសទ្រព្យសម្បត្តិ ទ្រព្យតម្កល់របស់ប្រជាពលរដ្ឋទេ គឺមានតែ**អំណាចរបស់តុលាការ**។ ដូច្នេះកាលណាមានការខកខាន យឺតយ៉ាវមិនបានសងបំណុលអីជាដើមនោះ មានតែយើងប្ដឹងទៅតុលាការ។ នេះបើតាមការអះអាងរបស់ ឧកញ៉ាបណ្ឌិត ប៊ុន មុនី ក្នុងសារព័ត៌មាន គេហទំព័រមជ្ឈមណ្ឌលអ្នកសារព័ត៌មានកម្ពុជាកន្លងទៅ។
ចំណាត់ការរដ្ឋាភិបាល បំបាត់ការភ័ន្តច្រឡំ៖
“គ្រឹះស្ថានមីក្រូហិរញ្ញវត្ថុទាំងអស់នៅកម្ពុជា ជារបស់ឯកជនពុំមែនជារបស់រដ្ឋឡើយ"។ នេះជាការប្រកាសរបស់នាយករដ្ឋមន្ត្រីកម្ពុជា សម្ដេច ហ៊ុន សែន ដើម្បីជម្រះមន្ទិលសាធារណជន ដែលច្រឡំ ថាការខ្ចីបំណុលពីគ្រឹះស្ថានមីក្រូហិរញ្ញវត្ថុ គឺជាការជំពាក់ប្រាក់រដ្ឋ។ ដូចនេះ យុទ្ធនាការខាងលើ គឺធ្វើឡើងដើម្បីបំបាត់ការភ័ន្តច្រឡំ និងដើម្បីជួយប្រជាពលរដ្ឋ កុំឲ្យជាប់បំណុល ប្រើប្រាស់កម្ចីចំទិសដៅ មិនប្រើក្នុងភាពហ៊ឺហា។
សម្ដេចហ៊ុន សែន បានលើកឡើងពីរបស់ Logo គ្រឹះស្ថានមីក្រូហិរញ្ញវត្ថុ ប្រាសាក់ ដែលមានអក្សរ "៛៛៛" សំដៅលើប្រាក់រៀល ដែលអាចធ្វើឲ្យសាធារណជនភាន់ភាំង ថា "រដ្ឋ"។ រហូតមកដល់ថ្ងៃទី ២២ កុម្ភៈ ប្រាសាក់សម្រេចផ្លាស់ប្ដូរស្លាកសញ្ញា "៛៛៛" របស់ខ្លួនទៅជាពាក្យ "ប្រាសាក់" ជំនួសវិញ។
កាលពី ២០១៥ ថ្ងៃទី២៧ ខែមករា ក្រសួងសេដ្ឋកិច្ចនិងហិរញ្ញវត្ថុ និងធនាគារជាតិនៃកម្ពុជា បានប្រកាសថ្កោលទោសចំពោះអង្គការនិងសមាគមសប្បុរសធម៌ដែលកំពុងផ្ដល់ប្រាក់ កម្ចីជូនប្រជាជន ដោយមិនមានអាជ្ញាប័ណ្ណ ឬចុះបញ្ជីនៅធនាគារជាតិនៃកម្ពុជា ហើយថែមទាំងបញ្ជាឲ្យបញ្ឈប់សកម្មភាពទាំងនោះភ្លាម ឬប្រឈមនឹងទោសទណ្ឌតាមផ្លូវច្បាប់។