មហោស្រពគីហ្សូណា២០១៧ សម្បូរកម្មវិធីប្លែកៗ នាំកម្ពុជា និងជប៉ុនកាន់តែខិតជិតគ្នា
- 2017-02-24 13:59:25
- ចំនួនមតិ 0 | ចំនួនចែករំលែក 0
មហោស្រពគីហ្សូណា២០១៧ សម្បូរកម្មវិធីប្លែកៗ នាំកម្ពុជា និងជប៉ុនកាន់តែខិតជិតគ្នា
ចន្លោះមិនឃើញ
មហោស្រពគីហ្សូណា ឆ្នាំ២០១៧ ដែលកំពុងប្រារព្ធឡើងនៅមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) ចាប់ពីថ្ងៃព្រហស្បតិ៍ ទី២៣ ដល់ថ្ងៃអាទិត្យទី ២៦ កុម្ភៈ ២០១៧ នាំមកនូវសកម្មភាពវប្បធម៌រវាងកម្ពុជា-ជប៉ុនជាច្រើន ដល់សាធារណជននៅកម្ពុជា។ នេះបើតាមការថ្លែងរបស់ឯកឧត្ដមបណ្ឌិត ហ៊ីង ថូរ៉ាក់ស៊ី រដ្ឋលេខាធិការ តំណាង ឯកឧត្ដមបណ្ឌិតសភាចារ្យ សុខ អាន ក្នុងការបើកពិធីខាងលើ។
នៅឆ្នាំនេះ មហោស្រពគីហ្សូណា នាំមកនូវការសម្ដែងដូចជា របាំ និងចម្រៀង ការបង្ហាញសំលៀកបំពាក់ (Cosplay) ការសម្ដែងក្បាច់គុន ការឆុងតែ ការរៀបចំផ្កា និងពិព័រណ៍ម្ហូបអាហារ ដែលមានការចូលរួមពីសិល្បករ សិល្បការនី និងអ្នកជំនាញកម្ពុជា និងជប៉ុន។
តាមការរៀបរាប់បន្ថែមរបស់ឯកឧត្ដមរដ្ឋលេខាធិការ មហោស្រពគីហ្សូណាឆ្នាំនេះ បានលើកយកប្រធានបទគួរចាប់អារម្មណ៍ និងចំពេល គឺ"ការហោះហើរទៅប្រទេសជប៉ុន" ដែលឆ្លុះបញ្ចាំងឲ្យឃើញនូវការខិតជិតគ្នា រវាងកម្ពុជា ជប៉ុន តាមរយៈការតភ្ជាប់ផ្លូវអាកាស។ ហើយប្រធានបទនេះ ត្រូវបានជ្រើសរើសដើម្បីអបអរការចាប់ផ្ដើមជើងហោះហើរត្រង់រវាងជប៉ុន-កម្ពុជា កាលពីខែកញ្ញា ឆ្នាំ២០១៦ កន្លងទៅ។
គួររំលឹកដែរថា មហោស្រពគីហ្សូណា ជារៀងរាល់ឆ្នាំតែងតែបង្កើតបទពិសោធន៍សិល្បៈវប្បធម៌ចម្រុះកម្ពុជា ជប៉ុន ទាំងក្នុងសម័យបុរាណ និងសហសម័យ។ ព្រឹត្តិការណ៍នេះក៏ជាឱកាសសម្រាប់ យុវជនកម្ពុជា ទទួលបាននូវបទពិសោធន៍សម្បូរបែបនៃសិល្បៈ និងវប្បធម៌ជប៉ុន ក៏ដូចជាបង្ហាញនូវវប្បធម៌របស់ស្នាដៃខ្មែរផងដែរ៕