បញ្ហាសំខាន់ៗត្រូវគិតឱ្យច្បាស់ មុនចាប់ផ្ដើមអាជីវកម្ម ដើម្បីកុំឱ្យបរាជ័យ
- 2017-02-27 04:58:24
- ចំនួនមតិ 0 | ចំនួនចែករំលែក 0
បញ្ហាសំខាន់ៗត្រូវគិតឱ្យច្បាស់ មុនចាប់ផ្ដើមអាជីវកម្ម ដើម្បីកុំឱ្យបរាជ័យ
ចន្លោះមិនឃើញ
ការចាប់ផ្ដើមអាជីវកម្មមិនមែនជារឿងងាយស្រួលនោះទេ ព្រោះមានបញ្ហាជាច្រើនត្រូវតែសិក្សាឱ្យបានច្បាស់លាស់មុនចាប់ផ្ដើម ទើបអាចកាត់បន្ថយហានិភ័យ និងងាយទទួលបានភាពជោគជ័យ។ ដូច្នេះតើគួរគិតទៅលើបញ្ហាអ្វីខ្លះមុនចាប់ផ្ដើមធ្វើអាជីវកម្ម?
លោកជំទាវឧកញ៉ា កែវ មុំ ជាម្ចាស់អាជីវកម្មផលិតនំស្រួយលីលី និងជាប្រធានសមាគមសហគ្រិនស្ត្រីកម្ពុជា បានចែកចែករំលែកបទពិសោធន៍ជាក់ស្ដែងក្នុងការធ្វើអាជីវកម្មកន្លងមកទាក់ទងនឹងបញ្ហាសំខាន់គួរគិតមុនចាប់ផ្ដើមអាជីវកម្ម។
**១. ផ្ដោតទៅលើធនធានក្នុងប្រទេសកម្ពុជា**
ម្ចាស់អាជីវកម្មផលិតនំស្រួយលីលី បានប្រាប់ថា មុនចាប់ផ្ដើមអាជីវកម្មផលិតអ្វីមួយ ចំណុចសំខាន់បំផុតគួរតែផ្ដោតទៅលើធនធានក្នុងប្រទេសកម្ពុជា ថាតើមានធនធានធម្មជាតិអ្វីខ្លះអាចយកមកកែច្នៃបាន? ប្រសិនបើសិក្សាដឹងថាសម្បូរធនធានអ្វី គួរផលិតផលិតផលណាដែលទាក់ទងនឹងធនធាននោះ។ លោកជំទាវឧកញ៉ា កែវ មុំ បានឱ្យដឹងផងដែរថា បច្ចុប្បន្ននេះកម្ពុជាមានធនធានកសិកម្មជាច្រើនដែលមិនទាន់មានការកែច្នៃ ដូច្នេះការកែច្នៃធនធានកសិកម្មទៅជាផលិតផលសម្រេចក៏ងាយនឹងទទួលជោគជ័យដែរ។
២. កំណត់អតិថិជនគោលដៅ
ប្រធានសមាគមសហគ្រិនស្រ្តីកម្ពុជា បានបន្តទៀតថា ការកំណត់អតិថិជនគោលដៅ គឺជារឿងសំខាន់ មុនចាប់ផ្ដើមអាជីវកម្មអ្វីមួយត្រូវកំណត់អតិថិជនឱ្យច្បាស់សិនថា ជាមនុស្សចាស់ ក្មេង ឬធនកណ្ដាល ដើម្បីងាយស្រួលក្នុងការផ្សព្វផ្សាយឱ្យចំគោលដៅ និងងាយទទួលបានភាពជោគជ័យ។
៣. ការគ្រប់គ្រងហិរញ្ញវត្ថុ
ការធ្វើអាជីវកម្ម សំខាន់បំផុតគឺការគ្រប់គ្រងហិរញ្ញវត្ថុឱ្យបានល្អ ត្រូវកំណត់ការបែងចែកឱ្យបានត្រឹមត្រូវរាល់ការចំណាយទាំងអស់ បើមិនដូច្នោះទេអាចនឹងមានហានិភ័យហិរញ្ញវត្ថុ ហើយជាកត្តានាំឱ្យអាជីវកម្មបរាជ័យផងដែរ។ ឧកញ៉ា ជំទាវ កែវ មុំ បន្ថែម។
៤. គុណភាព
សហគ្រិនជាស្ត្រី កំពុងជោគជ័យក្នុងមុខជំនួញរូបនេះ ប្រាប់ទៀតថា ផលិតផលដែលផលិតចេញត្រូវតែមានគុណភាពល្អ ភាពទាក់ទាញ និងការកែច្នៃយ៉ាងម៉េចឱ្យត្រូវនឹងចំណង់ចំណូលចិត្តរបស់អតិថិជនដែលបានកំណត់។ ដូច្នេះហើយត្រូវផ្ដោតទៅលើគុណភាពជាចម្បង មុនចេញលក់ ឬប្រកួតប្រជែងនៅទីផ្សារទើបអាចកាត់បន្ថយហានិភ័យបាន។
៥. កាត់បន្ថយថ្លៃដើមឱ្យនៅកម្រិតទាប
អាជីវកម្មដែលងាយទទួលបានភាពជោគជ័យ គឺធ្វើយ៉ាងម៉េចកាត់បន្ថយថ្លៃដើមផលិតឱ្យនៅកម្រិតទាប។ លោកជំទាវ ឧកញ៉ាកែវ មុំ ប្រាប់ថា ប្រសិនបើចំណាយថ្លៃដើមលើការផលិតខ្ពស់ពេកនោះអាជីវកម្មងាយនឹងបរាជ័យណាស់ ដូច្នេះត្រូវកាត់បន្ថយថ្លៃដើមផលិតឱ្យកាន់តែទាប កាន់តែល្អ៕