អាយុ៨ឆ្នាំ កើតមកអត់ដៃ ជីវិតសែនជូរចត់ តែខំរៀនសូត្ររហូតបានលទ្ធផលមិនធម្មតា

2017-03-03 06:37:02
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រិយមិត្តមួយចំនួន ដែលធ្លាប់រៀនភាសាចិន ប្រាកដជាដឹងហើយថា វាមានការលំបាកយ៉ាងណាខ្លះ ចំពោះការសរសេរអក្សរចិន ហើយសាកគិតស្រមៃមើលថា ការសរសេរអក្សរចិនដោយប្រើជើង វារឹតតែលំបាកកម្រិតណា។

Jiang Tianjin

ក្មេងប្រុសជនជាតិចិន អាយុ៨ឆ្នាំម្នាក់ មានឈ្មោះថា Jiang Tianjin មានភាពខុសប្លែកពីមិត្តរួមថ្នាក់ នៅឯសាលាបឋមសិក្សាមួយ ស្ថិតក្នុងស្រុក Shehong ខេត្ត Sichuan ប្រទេសចិន។ នៅពេលដែលគ្រូ ចោទជាសំនួរទៅកាន់កូនសិស្ស ដើម្បីឲ្យលើកដៃឡើងឆ្លើយ Jiang បានមិនលើកដៃឡើយ ដោយសារតែវាសនាអភ័ព្វកើតមកគ្មានដៃទាំងគូដូចគេដូចឯង។

ទោះបីជាយ៉ាងណា Jiang មិនបណ្ដោយឲ្យវាសនាខ្លួនកាន់តែធ្លាក់ដុនដាបនោះទេ។ Jiang គឺជាសិស្សល្អម្នាក់ ដែលតែងតែអង្គុយនៅតុខាងមុខ និងខិតខំរៀនសូត្រ រហូតក្លាយជាសិស្សពូកែល្អឥតខ្ចោះប្រចាំថ្នាក់រៀន។ នៅពេលដែលអ្នកកាសែត បានទៅធ្វើទស្សនកិច្ចនៅសាលា គ្រូរបស់ Jiang បានបង្អួតពីលទ្ធផលធ្វើតេស្តរបស់ Jiang ដោយរូបគេទទួលបានពិន្ទុខ្ពស់ និងល្អឥតខ្ចោះជាងសិស្សដទៃទៀតនៅក្នុងថ្នាក់ ប្រើត្រឹមតែម្រាមជើង និងខួរក្បាលប៉ុណ្ណោះ។

យ៉ាងណាមិញ ជីវិតពិតជាមិនងាយស្រួលឡើយសម្រាប់ Jiang។ នៅពេល Jiang កើតមក ម្ដាយរបស់គេបានដួលសន្លប់ភ្លាមៗ ក្រោយដឹងថារូបគេគ្មានដៃទាំងគូ។ ខណៈពេលម្ដាយ Jiang បាត់បង់ស្មារតី ក្រុមគ្រួសាររបស់នាងបានយក Jiang ទៅឲ្យអ្នកបើកបរតាក់ស៊ីម្នាក់។ ក្រោយពេលម្តាយ Jiang ភ្ញាក់ដឹងខ្លួនវិញ នាងបានស្រែកយំយ៉ាងខ្លាំង។

ផ្ទុយទៅវិញ ជោគវាសនាបាននាំយក Jiang ឲ្យត្រលប់មករស់នៅជាមួយម្ដាយវិញ បន្ទាប់ពីអ្នកបើកបរតាក់ស៊ីខាងលើ បានដឹងថា Jiang គ្មានដៃ ហើយក៏បោះបង់រូបគេចោលនៅតាមផ្លូវ តែជាសំណាងល្អ ត្រូវបានប៉ូលិសប្រទះឃើញ និងនាំត្រលប់មកមន្ទីរពេទ្យវិញ។ នៅពេលនោះ ម្ដាយ Jiang បានអោបរូបគេ ហើយសន្យាថានឹងមិនបោះបង់ចោលកូនប្រុសម្ដងទៀតឡើយ។

បន្ទាប់ពីនាំរូបគេត្រលប់មកផ្ទះវិញ ឪពុកម្ដាយរបស់ Jiang បានចាប់ផ្ដើមបណ្ដុះបណ្ដាលរូបគេឲ្យប្រើជើងជំនួសដៃ។ នៅទីបំផុត Jiang អាចប្រើជើងជំនួសដៃ ហើយក៏បានរៀនពីរបៀបសរសេរអក្សរបន្តិចម្តងៗចាប់ពីពេលនោះមក៕