បន្ថែមជុំវិញរឿងគំនូរជីវចល "Funan, the New People”

2017-03-06 10:02:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ភាពយន្តគំនូរជីវចលស្ដីពីទិដ្ឋភាពក្នុងរបបខ្មែរក្រហមមានចំណងជើងថា "Funan” បានធ្វើឲ្យមានការចាប់អារម្មណ៍កាលពីសប្ដាហ៍មុន ដែលភាពយន្តនេះផលិតដោយបុរសវ័យ ៣២ឆ្នាំកូនខ្មែរ កាត់បារាំងម្នាក់។

Dennis Do គឺជាអ្នកដឹកនាំរឿង និងនិពន្ធរឿងខាងលើផ្ទាល់ដោយបានចាប់ផ្ដើមថតនៅក្នុងឆ្នាំ ២០១៦ និងគ្រោងបញ្ចប់ចុងឆ្នាំនេះ។ យ៉ាងណា ឆ្អឹងនៃរឿងបានកើតតាំងពីពេលលោកមានវ័យត្រឹម ៦-៧ឆ្នាំ តាមរយៈការតំណាលរបស់ម្ដាយលោក ដែលបានឆ្លងកាត់របបអាវខ្មៅ និយាយអំពីការបែកបាក់ព្រាត់ប្រាស់គ្នារវាងម្ដាយ និងបងប្រុសរបស់លោកម្នាក់។

នេះមិនមែនជាភាពយន្តទី១ទេ ដែលបើកបង្ហាញរបបខ្មែរក្រហម ជាក់ស្ដែងរឿង "មុនដំបូងខ្មែរក្រហមសម្លាប់ប៉ារបស់ខ្ញុំ" ផលិតដោយ អេនជែលីណា ចូលី។ យ៉ាងណា បញ្ជាក់ថា លោកនៅតែតាំងចិត្តធ្វើ ព្រោះលោកមានជំនឿថា មនុស្សគ្រប់ជំនាន់ ត្រូវតែដឹងអំពីរឿងដែលកើតឡើងពីរបបខ្មែរក្រហមនេះ។

យ៉ាងណា រឿង "Funan” មិនមែននិយាយតែក្នុងរបបខ្មែរក្រហមទេ ប៉ុន្តែសាច់រឿងក្ដោបតាំងពីសម័យអាណាចក្រភ្នំ និងសង្កត់ធ្ងន់ពីមនុស្សថ្មី(មនុស្សសេសសល់ពីរបបខ្មែរក្រហម)។ រឿងនេះ មានការសហការជួយពីក្រុមផលិតមកពីប្រទេស៤ គឺ ប៊ែលហ្សិក លុចហ្សំបួរ បារាំង និងកម្ពុជា។ សម្រាប់កម្ពុជា "Funan” ចាប់ដៃគូសហការជាមួយក្រុម I Think Asia ដែលផ្ដុំទៅដោយយុវវ័យក្មេងៗ ។

“ដំបូងខ្ញុំមិនដឹងថា សហការជាមួយអ្នកណាទេនៅកម្ពុជា តែបានមិត្តរួមថ្នាក់ខ្ញុំ ប៉ាទ្រីក ណែនាំពី I Think Asia ហើយពួកយើង ក៏ធ្វើការជាមួយគ្នា។ Dennis Do ថ្លែង។ ខ្សែភាពយន្តគំនូរជីវចលមួយនេះ បានចេញ Teaser សប្ដាហ៍មុន ទទួលបានការចាប់អារម្មណ៍យ៉ាងច្រើន។ តាមអ្នកដឹកនាំវ័យ ៣២នេះ ភាពយន្តដែលលោកផលិតលើកដំបូងនេះ គ្រោងបញ្ចប់ចុងឆ្នាំនេះ មានរយៈពេលជាង៧០នាទី ដោយនឹងដាក់បញ្ចាំងនៅកម្ពុជា មុនពេលបន្តទៅប្រទេសផ្សេងៗទៀត៕

អត្ថបទ៖ ទារិកា