គ្រូបង្រៀនកាណាដា ឈ្នះរង្វាន់១លានដុល្លារ ក្រោយតស៊ូ៦ឆ្នាំ ធ្វើការងារដ៏ភ្ញាក់ផ្អើលមួយ
- 2017-03-20 08:38:47
- ចំនួនមតិ 0 | ចំនួនចែករំលែក 0
គ្រូបង្រៀនកាណាដា ឈ្នះរង្វាន់១លានដុល្លារ ក្រោយតស៊ូ៦ឆ្នាំ ធ្វើការងារដ៏ភ្ញាក់ផ្អើលមួយ
ចន្លោះមិនឃើញ
គ្រូបង្រៀនស្រីម្នាក់ បានទទួលរង្វាន់ជាទឹកប្រាក់ រហូតដល់ទៅ ១លានដុល្លារ សម្រាប់ការងារដ៏អស្ចារ្យរបស់នាង ដែលជួយកាត់បន្ថយអត្រានៃការធ្វើអត្តឃាតរបស់មនុស្សវ័យជំទង់ នៅក្នុងសហគមន៍ជនជាតិដើមភាគតិច ស្ថិតក្នុងតំបន់អាកទិចកាណាដា ដ៏ដាច់ស្រយាលមួយ ។
អ្នកស្រី Maggie MacDonnell ដែលជាគ្រូបង្រៀននៅឯសាលា Ikusik School នៃសហគមន៍ Salluit របស់ជនជាតិភាគតិច Inuit ស្ថិតក្នុងទីក្រុង Quebec ប្រទេសកាណាដា បានទទួលការកោតសរសើរ សម្រាប់សមិទ្ធផលរបស់នាងនៅក្នុងសហគមន៍ ដែលសម្បូរទៅដោយលក្ខខណ្ឌអាក្រក់ និងឧបសគ្គជាច្រើននៅក្នុងវិស័យអប់រំ។
Salluit ដែលជាតំបន់មួយ មានជនជាតិភាគតិចរស់នៅ មិនដល់ ១ ០០០នាក់នោះ មានភាពខ្វះខាតខ្លាំង ថែមទាំងដាច់ស្រយាល រីឯធនធានក៏មានកំណត់ ហើយមានអត្រានៃការប្រើប្រាស់គ្រឿងញៀន និងសម្លាប់ខ្លួន ខ្ពស់ខ្លាំងទៀតផង។ សីតុណ្ហភាពនៅទីនោះ ត្រជាក់ខ្លាំងរហូតដល់ -២៥អង្សាសេ ហើយសាលារៀនអាចចូលទៅបាន លុះត្រាតែជិះយន្តហោះ។
ទទួលយករង្វាន់ពីមូលនិធិសកល «Varkey Foundation Global Teacher Prize» ដែលត្រូវបានប្រកាសតាមរយៈស្ថានីយ «International Space Station» អ្នកស្រី MacDonnell បាននិយាយថា «ខ្ញុំបានឃើញ ការធ្វើអត្តឃាតចំនួន ១០លើក ក្នុងរយៈពេលត្រឹមតែជាង២ឆ្នាំ»។
គួរបញ្ជាក់ផងដែរថា អ្នកស្រី MacDonnell បានតស៊ូអស់រយៈពេល ៦ឆ្នាំ នៅក្នុងសហគមន៍ដាច់ស្រយាលខាងលើ ដោយបានផ្លាស់ប្ដូរជីវិតរបស់សិស្ស និងសហគមន៍នោះ ឲ្យប្រែទៅជាប្រសើរឡើងវិញ។ អ្នកស្រី MacDonnell ស្ថិតក្នុងចំណោមបេក្ខភាពចុងក្រោយ ចំនួន១០រូប ដែលត្រូវបានជ្រើសរើសចេញពី បេក្ខភាពចំនួន ២០ ០០០នាក់ មកពីបណ្ដាប្រទេស ចំនួន១៧៩៕