សមត្ថភាព ចាន់ វឌ្ឍនាកា សមតែលេងនៅលីគកំពូលជប៉ុន មិនមែនលីគ៣ទេ

2017-03-21 04:55:29
ចំនួនមតិ 0 | ចំនួនចែករំលែក 0

ចន្លោះមិនឃើញ

“សមត្ថភាពរបស់ ចាន់ វឌ្ឍនាកា សមតែបានលេងនៅលីគកំពូលជប៉ុន ព្រោះគាត់ជាកីឡាករកំពូលម្នាក់នៅក្នុងតំបន់។ ខ្ញុំសប្បាយចិត្តដែលមានកីឡាករល្អៗនៅក្នុងក្រុម”។ ការបញ្ជាក់របស់លោក Leonardo Vitorino គ្រូបង្វឹកក្រុមជម្រើសជាតិកម្ពុជា។

ក្នុងសន្និសីទសារព័ត៌មានការប្រកួតអន្តរជាតិ Clear រវាងកម្ពុជានិងឥណ្ឌាមុននេះបន្តិច លោក Leonardo បានបញ្ជាក់ថាកូនក្រុមរបស់ខ្លួនត្រៀមរួចរាល់ហើយសម្រាប់អ្នកគាំទ្រទាំងអស់គ្នា។ ឥណ្ឌា ជាក្រុមខ្លាំង ប៉ុន្តែកម្ពុជាក៏មិនអន់ដែរ ព្រោះមានកីឡាករល្អៗដែលអាចលេងបាន ហើយប្រសិនបើលេងជាក្រុមបានល្អ នោះកម្ពុជានឹងមានឱកាសធ្វើឱ្យអ្នកគាំទ្រសប្បាយចិត្តជាក់ជាមិនខាន។

ក្នុងឱកាសនោះដែរ គ្រូបង្វឹកប្រេស៊ីលក៏បានលើកឡើងចំពោះ ចាន់ វឌ្ឍនាកា ផងដែរថា រូបគេជាកំពូលកីឡាករម្នាក់ ដែលមានសមត្ថភាពនិងនៅក្មេងថែមទៀត។ កីឡាករដើមកំណើតនៅកំពតរូបនេះ មានកម្រិតលេងអាចចូលលេងនៅលីគកំពូលរបស់ជប៉ុនបាន មិនត្រឹមលេងនៅលីគទី៣នោះទេ។

យ៉ាងណាមិញ គ្រូបង្វឹកថ្មីរបស់កម្ពុជាក៏មិនភ្លេចផ្ដាំដល់អ្នកគាំទ្រផងថា កុំគិតតែលើលទ្ធផលពេក មិនមែនឈ្នះសំខាន់ ហើយចាញ់អន់នោះទេ។ ការប្រកួតនៅថ្ងៃស្អែកគ្រាន់តែជាការប្រកួតមិត្តភាពមួយនៃការបើកឆាកដំបូងរបស់កម្ពុជាក្រោមការដឹកនាំរបស់លោកប៉ុណ្ណោះ ដោយវាមិនអាចកំណត់អ្វីបានឡើយ៕

អត្ថបទ៖ មុន្នីរម្យ