លក្ខណៈសម្បត្តិ៧យ៉ាងរបស់កូនប្រសាប្រុស ដែលម្ដាយក្មេកគ្រប់រូបប្រាថ្នាចង់បាន
- 2017-03-21 09:54:57
- ចំនួនមតិ 0 | ចំនួនចែករំលែក 0
លក្ខណៈសម្បត្តិ៧យ៉ាងរបស់កូនប្រសាប្រុស ដែលម្ដាយក្មេកគ្រប់រូបប្រាថ្នាចង់បាន
ចន្លោះមិនឃើញ
បុរសភាគច្រើន ក្រោយពេលរៀបការរួចច្រើនទៅរស់នៅផ្ទះខាងស្រី ហើយការធ្វើជាកូនប្រសាប្រុសដែលម្ដាយក្មេកស្រឡាញ់ពេញចិត្តខ្លាំង គឺជារឿងមួយដែលបុរសភាគច្រើនចង់ដឹងដូចគ្នា។ ដូចនេះដើម្បីក្លាយជាកូនប្រសាប្រុសដ៏ល្អ គួរមានលក្ខណៈសម្បត្តិបែបណាខ្លះទៅ? ខាងក្រោមនេះជាការលើកឡើងរបស់ម្ដាយដែលមានកូនស្រី ហើយប្រាប់ពីលក្ខណៈសម្បត្តិរបស់កូនប្រសាប្រុស ដែលម្ដាយក្មេកទូទៅចង់បាន។
១. មិនចេះប្រកាន់ខ្លួន
តាមការលើកឡើងរបស់អ្នកស្រី ប៊ុន ណារ៉េម ដែលបានរៀបចំមង្គលការឱ្យកូនប្រុសស្រី ៤នាក់រួចហើយនោះ បាននិយាយថា មិនថាម្ដាយក្មេកណាក៏ប្រាថ្នាចង់បានកូនប្រសាប្រុសមានលក្ខណៈសម្បត្តិបែបនេះដែរ។ អ្នកស្រីបន្តទៀតថា កូនប្រសាប្រុសដែលមិនចេះប្រកាន់ខ្លួន គឺសំដៅទៅលើការចេះធ្វើការងារផ្ទះគ្រប់ប្រភេទនៅពេលដែលមានពេលនៅផ្ទះ មិនថាតែជាការចម្អិនម្ហូប រៀបចំលម្អគេហដ្ឋាន បោកគក់សំលៀកបំពាក់នោះទេ ពោលគឺមិនចេះប្រកាន់ខ្លួនឱ្យតែមានអ្វីគឺធ្វើហ្នឹង។
២. ផ្ដល់តម្លៃឱ្យសាច់ញាតិខាងស្រី
អ្នកស្រី ប៊ុន ណារ៉េម ដែលជាគ្រូបង្រៀននៅវិទ្យាល័យមួយក្នុងខេត្តកំពង់ស្ពឺ បានបន្តទៀតថា នៅត្រង់ចំណុចនេះពិតជាសំខាន់ណាស់ គ្មានម្ដាយក្មេកឯណាចង់បានកូនប្រសាប្រុសក្រអឺតក្រទម មិនស្គាល់សាច់ញាតិនោះទេ។ អ្នកស្រី និយាយថា ទាំងម្ដាយបង្កើត និងម្ដាយក្មេកប្រាកដជាមានមោទនភាព ដែលមានកូនប្រសាចេះគួរសមរាក់ទាក់ជាមួយសាច់ញាតិ ព្រោះនេះគឺជាការបង្ហាញអំពីសីលធម៌ ហើយអ្នកជិតខាង ឬសាច់ញាតិប្រាកដជាសរសើរថារើសកូនប្រសាប្រុសនេះពិតជាមិនខុសមែន។
៣. ជាបង្គោលដ៏រឹងមាំក្នុងគ្រួសារ
ដោយឡែក អ្នកស្រី ឡា ថារី រស់នៅរាជធានីភ្នំពេញ ហើយទើបតែរៀបចំមង្គលការឱ្យកូនស្រីហើយថ្មីៗ បាននិយាយថា កូនប្រសាប្រុសដែលម្ដាយក្មេកពេញចិត្តនោះ គឺជាមនុស្សប្រុសពេញលក្ខណៈដ៏រឹងមាំម្នាក់មិនមែនទន់ជ្រាយនោះទេ។ កូនប្រសាប្រុសដែលជាបង្គោលរឹងមាំក្នុងគ្រួសារ មានន័យថា អាចជាពំនាក់អាស្រ័យរបស់គ្រួសារនៅពេលមានអាសន្នកើតឡើង ចេះដោះស្រាយបញ្ហាក្នុងគ្រួសារ អាចរត់បោលយប់ព្រលប់ពេលមានប្រពន្ធ ឬអ្នកណាឈឺថ្កាត់។ ដូច្នេះហើយប្រសិនបើមានលក្ខណៈសម្បត្តិបែបនេះហើយ ម្ដាយក្មេកណាក៏ស្រឡាញ់ដែរ។
៤. មិនមានមិត្តភក្ដិផឹកស៊ីច្រើន
មនុស្សប្រុសភាគច្រើនចូលចិត្តផឹកស៊ី ជាពិសេសមានមិត្តភក្ដិបនភឿន ខាងផឹកស៊ីច្រើន តែត្រូវចាំថា នៅពេលដែលទៅដណ្ដឹងកូនស្រីគេ បើគេស៊ើបដឹងពូកែរឿងផឹកស៊ីប្រាកដជាមិនចង់លើកកូនស្រីឱ្យនោះទេ។ មូលហេតុនេះ ព្រោះមនុស្សប្រុសដែលពូកែរឿផឹកស៊ីមិនសូវមានពេលវេលាឱ្យប្រពន្ធកូន លុយក៏សូវសល់ ហើយអាចបង្កជាអំពើហិង្សាចំពោះប្រពន្ធកូនទៀតផង។ នេះជាការលើកឡើងបន្ថែមទៀតរបស់អ្នកស្រី ឡា ថារី។
៥. មិនសុភាពខ្លាំងពេកតែក៏មិនកាច
ចំពោះអ្នកស្រី ឡោម សារ៉េត ជាអាជីវករលក់នៅក្នុងផ្សារបឹងព្រលិតវិញ បានឱ្យដឹងថា ប្រសិនបើអ្នកស្រីលើកកូនស្រីទៅឱ្យបុរសណាម្នាក់ គឺមិនចង់បានកូនប្រសាដែលមឹះៗ មិនចេះមាត់កនោះទេ គឺត្រូវចេះលែងសើចខ្លះ តែក៏មិនមែនអាឡិអាឡក់ខ្លាំងពេកនោះដែរ។ អ្នកស្រីបន្តទៀតថា កូនប្រសាប្រុសដែលម្ដាយក្មេកភាគច្រើនចង់បាន គឺមិនសុភាពខ្លាំងពេក តែក៏មិនត្រូវកាចច្រងេងច្រងាងមិនដឹងខុសត្រូវឡើយ បើកាចគឺកាចឱ្យមានហេតុផលច្បាស់លាស់។
៦. ចេះអ្វីមួយឱ្យប្រាកដប្រជា
នៅត្រង់ចំណុចនេះ គឺមានន័យថា មុននឹងគេលើកកូនស្រីឱ្យទៅបុរសណាម្នាក់ គឺមើលទៅសមត្ថភាពដែរថា ចេះអ្វីឱ្យប្រាកដ បើរកស៊ីឱ្យច្បាស់រកស៊ី បើធ្វើការក៏ត្រូវមានការងារមួយច្បាស់លាស់មានស្ថិរភាព ទើបគេសម្រេចចិត្តផ្ញើវាសនាកូនស្រីឱ្យទៅបុរសម្នាក់នោះ។ នេះជាការលើកឡើងបន្ថែមទៀត របស់អ្នកស្រី ឡោម សារ៉េត។
៧. មានផែនការទៅថ្ងៃអនាគត
ផែនការនៅក្នុងគ្រួសារ គឺជារឿងសំខាន់ណាស់ ជាប្ដីដ៏ល្អ ជាកូនប្រសាប្រុសដ៏ល្អ គឺត្រូវចេះរៀបផែនការសម្រាប់ថ្ងៃអនាគត ថាចង់មានអ្វី ចង់ធ្វើអ្វីដើម្បីគ្រួសារមានភាពរីកចម្រើន។ អ្នកស្រី ឡោម សារ៉េត បន្ថែម៕