ម្ហូបអាហារប្រពៃណីប្រហែលជាង ២០មុខ ត្រៀមបង្អួតខ្លួន នៅពិព័រណ៍អាស៊ាន ២០១៧ ឆាប់ៗនេះ

2017-03-23 07:25:13
ចំនួនមតិ 0 | ចំនួនចែករំលែក 0

ចន្លោះមិនឃើញ

យ៉ាងតិចក៏មានម្ហូបអាហារជាង ៧០ មុខ ដើម្បីដាក់បង្ហាញឲ្យសាធារណជនអាចភ្លក់រសជាតិបាននៅឯពិព័រណ៍អាស៊ាន ២០១៧ ដែលប្រទេសកម្ពុជាធ្វើជាម្ចាស់ផ្ទះ។ «ពិព័រណ៍ម្ហូបអាហារអាស៊ាន» រៀបចំឡើងដោយអង្គការដើម្បីភាពញញឹមនៃកុមារ ដោយមានការគាំទ្រពេញទំហឹងពីក្រសួងការបរទេស ក្រសួងទេសចរណ៍ និង ក្រសួងអប់រំ ដែលនឹងប្រព្រឹត្តិទៅនៅពហុកីឡាដ្ឋានជាតិអូឡាំពិក ក្នុងរាជធានីភ្នំពេញ ពីថ្ងៃទី ០១-០២ ខែមេសា ឆ្នាំ ២០១៧។

អ្នកនាង អេលីហ្សាបែត បាដុង នាយិកាចាត់ការទូទៅនៃអង្គការ ប៉េ អេស អឺ បានមានប្រសាសន៍ថា "អង្គការនេះ មានកិត្តិយសរៀបចំព្រឹត្តិការណ៍សប្បុរសថម៌ ដែលឆ្លុះបញ្ចាំងពីភាពសម្បូរបែបនៃប្រជាជាតិអាស៊ាន។ អត្ថបទប្រយោជន៍ដែលមកពីការរៀបចំកម្មវិធីពីរថ្ងៃនេះ អាចជួយដល់កុមារក្រីក្រកាន់តែច្រើនឲ្យទទួលបានការអប់រំ ដែលមានគុណភាព។ តាមរយៈសកម្មភាពទាំងនេះយើងបានជួយឲ្យកុមាររាប់ពាន់នាក់ទទួលបានការងារធ្វើ។ ប៉េ អេស អឺ ក៏សូមសម្ដែងនូវការកោតសរសើរដោយស្មោះចំពោះការចូលរួមរបស់លោកអ្នក ហើយទាំងអស់គ្នាអាចអាចជួយប្រជាជនក្រីក្របំផុតឲ្យមានជីវិតរស់នៅប្រសើរជាងមុន និង មានមោទនភាពក្នុងការរស់នៅក្នុងប្រទេសមួយដែលជាកន្លែងដែលអ្នករាល់គ្នាអាចរស់នៅក្នុងសន្តិភាព និង សេចក្ដីថ្លៃថ្នូរ"។

ផ្អែកតាមសេចក្ដីប្រកាសព័ត៌មានរបស់ អង្គការដើម្បីភាពញញឹម នៃកុមារ (ប៉េ អេស អឺ) បានឲ្យដឹងថា «ពិព័រណ៍ម្ហូបអាហារអាស៊ាន» នឹងគាស់កកាយនូវម្ហូបអាហារប្រពៃណីជាង ៧០មុខ ដើម្បីយកមកបង្ហាញជូនឲ្យប្រជាជនទាំងអស់គ្នាបានស្គាល់ និង បានភ្លក់រសជាតិ។ នៅក្នុងកម្មវិធីនេះ នឹងមានតូបលក់អាហារ និង ភេសជ្ជៈចំនួន ១០០ ដោយមានទាំងអាហារខ្មែរ ទាំងអាហាររបស់ប្រទេសជាសមាជិកអាស៊ានយ៉ាងសម្បូរបែប។

រឹតតែពិសេសជាងនេះទៅទៀត នៅរាត្រីថ្ងៃទី ១ និង ទី ២ ខែមេសា នឹងមានការសម្ដែងសិល្បៈ និង ការប្រគំតន្ត្រី ដែលមានការចូលរួមពីសិល្បករ សិល្បការិនី ជាច្រើនរូប។ ទន្ទឹមនឹងគ្នានេះ ក៏មានការតាំងបង្ហាញ និង លក់ផលិតផលផ្សេងៗពីបណ្ដាក្រុមហ៊ុនជាច្រើនកន្លែងកម្សាន្តជាលក្ខណៈអប់រំកុមារ និង មានការរាំលេងកម្សាន្តដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ដែលនឹងមកដល់ក្នុងពេលឆាប់ៗខាងមុខនេះ។

សេចក្ដីប្រកាសព័ត៌មានដដែល បានបញ្ជាក់ទៀតថា នេះជាលើកទី ២ហើយ ដែលអង្គការដើម្បីភាពញញឹម នៃកុមារបានទទួលរៀបចំកម្មវិធី «ពិព័រណ៍ម្ហូបអាហារអាស៊ាន» បន្ទាប់ពីបានទទួលនូវភាពជោគជ័យក្នុងការរៀបចំ «ពិព័រណ៍ម្ហូបអាហារខ្មែរ» ក្នុងរយៈពេល ១១ ឆ្នាំកន្លងមក ដោយមានអ្នកចូលរួមជិត ១២ ០០០ នាក់ ជារៀងរាល់ឆ្នាំ។

ចំពោះសំបុត្រចូលរួម ១ សន្លឹកមានតម្លៃ ៣ដុល្លារ ដែលអ្នកចូលរួមអាចប្ដូរយកបាននូវភេសជ្ជៈ សម្រាប់ពិសា ឬ ធ្វើការចាប់រង្វាន់ពីកម្មវិធី។ សំបុត្រអាចរកទិញបាននៅ៖ ភោជនីយដ្ឋានលូទូសប្លង់ (ប៉េ អេស អឺ) ពហុកីឡាដ្ឋានជាតិអូឡាំពិក និង គ្រប់សាខា Chatime ឬ ទំនាក់ទំនងតាមលេខទូរសព្ទ៖ ០១២ ៩១៨ ៣២១ / ០៩៦ ៦៤៥ ២៥២៕

អត្ថបទ៖ ដៃគូសហការ