យុវវ័យសរសើរ ខ្លោងទ្វារអង្គរសង្ក្រាន្ត ២០១៧ថា ស្អាត និង ស័ក្ដិសមរចនាបថខ្មែរ
- 2017-03-26 03:30:40
- ចំនួនមតិ 0 | ចំនួនចែករំលែក 0
យុវវ័យសរសើរ ខ្លោងទ្វារអង្គរសង្ក្រាន្ត ២០១៧ថា ស្អាត និង ស័ក្ដិសមរចនាបថខ្មែរ
ចន្លោះមិនឃើញ
ក្រុមយុវវ័យបានកោតសរសើរចំពោះប្លង់ខ្លោងទ្វារអង្គរសង្ក្រាន្តលើកទី ៥ ថា រូបរាងដូចខ្លោងទ្វារប្រាសាទបុរាណ និង ស្រស់ស្អាតជាងបណ្ដាឆ្នាំមុនៗ។ ការលើកឡើងរបស់យុវវ័យនេះធ្វើឡើងបន្ទាប់ពីមានការបង្ហាញរូបរាងប្លង់មេខ្លោងទ្វារអង្គរសង្ក្រាន្ត ២០១៧ តាមរយៈបណ្ដាញសារព័ត៌មានកាលពីម្សិលមិញ។
យុវជន សុធី និស្សិតឆ្នាំ ទី០៣ នៃសាកលវិទ្យាល័យភូមិន្ទនីតិសាស្ត្រ និង វិទ្យាសាស្ត្រសេដ្ឋកិច្ច បានប្រាប់ Sabay នៅព្រឹកនេះថា ក្រោយពីបានមើលរូបរាងគំរូខ្លោងទ្វារអង្គរសង្ក្រាន្តនេះ ឃើញថា ស្អាត ហើយសមរចនាបថខ្មែរ។ "និយាយរួមខ្ញុំពេញចិត្ត ខ្ញុំសរសើរអំពីស្នាដៃនៃរចនាបថមួយនេះ"។
ចុចត្រង់នេះ ខ្លោងទ្វារអង្គរសង្ក្រាន្តឆ្នាំ ២០១៧ ស្រស់ស្អាត យករចនាបថខ្លោងទ្វារប្រាសាទបុរាណ
ជាគ្រូបង្រៀនភាសាអង់គ្លេសនៅសាលាឯកជនមួយ លោក មិថុនា បានបញ្ចេញទស្សនៈដែរថា ព្រឹត្តិការណ៍អង្គរសង្ក្រាន្ត គឺជាព្រឹត្តិការណ៍របស់ខ្មែរ ដូច្នេះ រាល់ការតុបតែងត្រូវតែមានការប្រុងប្រយ័ត្នខ្ពស់។ តួយ៉ាងខ្លោងទ្វារនេះ បើពុំយកចិត្តទុកដាក់ឲ្យមែនទែនទេ គឺប្រាកដនឹងមានប្រតិកម្ម។
"ខ្ញុំសរសើរខាងស.ស.យ.ក ឆ្នាំនេះ ចេះធ្វើវេទិកាឲ្យមហាជនរិះគន់ ហើយការធ្វើខ្លោងទ្វារសហការជាមួយក្រសួងវប្បធម៌ ធ្វើបែបនេះ ទើបរចនាបថស័ក្ដិសមជារបស់ខ្មែរ ហើយមហាជនគាំទ្រ"។ មិថុនា បន្ថែម។
កាលពីម្សិលមិញ សហភាពសហព័ន្ធយុវជនកម្ពុជា (ស.ស.យ.ក) បានរៀបចំវេទិកាមួយស្ដីពី "ស្វែងយល់អំពីទិដ្ឋភាពនៃព្រឹត្តិការណ៍អង្គរសង្ក្រាន្តឆ្នាំ២០១៧" នៅសាលពហុបំណងមជ្ឈមណ្ឌលសហប្រតិបត្តិការកម្ពុជា-កូរ៉េ ដើម្បីបើកចំហឲ្យមហាជន ជាពិសេសយុវវ័យបានដឹងអំពីគោលបំណងរបស់ព្រឹត្តិការណ៍អង្គរសង្ក្រាន្ត ២០១៧ និង ចង់ស្ដាប់មតិរបស់យុវវ័យលើគំរូប្លង់ខ្លោងទ្វារអង្គរសង្ក្រាន្តឆ្នាំនេះផងដែរ។
មិនមែនជារឿងចៃដន្យនោះទេ ដែល ស.ស.យ.ក បានរៀបចំវេទិកានេះឡើង ព្រោះកាលពីឆ្នាំ ២០១៥ ខ្លោងទ្វារ អង្គរសង្ក្រាន្ត ធ្លាប់រងការរិះគន់ខ្លាំងៗ អំពីរចនាបថដូចទៅនឹងបរទេសច្រើនជាងខ្មែរ។ ម៉្លោះហើយមិនចង់ឲ្យមានប្រតិកម្មនៅពេលសាងសង់ខ្លោងទ្វារ ស.ស.យ.ក បានបើកវេទិកា និង ត្រៀមបង្ហោះរូបរាងខ្លោងទ្វារអង្គរសង្ក្រាន្ត ២០១៧ ដើម្បីស្វាគមន៍មតិរិះគន់ ក្នុងន័យស្ថាបនា។