អ្នកជំនាញបកស្រាយមូលហេតុដ៏ចម្លែក នៅក្រោយរូបថត មន្រ្តីជិះលើខ្នង គីម ជុងអ៊ុន

2017-03-27 02:57:30
ចំនួនមតិ 0 | ចំនួនចែករំលែក 0

ចន្លោះមិនឃើញ

រូបថតថ្មី និងចម្លែកមួយសន្លឹក ត្រូវបានរីកសុះសាយនៅលើបណ្ដាញអ៊ីនធឺណិត ដែលបង្ហាញឲ្យឃើញ មេដឹកនាំកូរ៉េខាងជើង លោក គីម ជុងអ៊ុន អនុញ្ញាតឲ្យបុរសម្នាក់ជិះនៅលើខ្នងរបស់ខ្លួន។

មេដឹកនាំផ្ដាច់ការរូបនេះ ជាធម្មតាតែងបញ្ចេញទឹកមុខមាំ ហើយសប្បាយចិត្តតែពេល បាញ់គ្រាប់មីស៊ីលបានជោគជ័យប៉ុណ្ណោះ។ មេដឹកនាំរូបនេះ គឺជាអ្នកអនុម័តរូបថតទាំងអស់ មុនពេលពួកវាចេញផ្សាយ។

ទោះជាយ៉ាងណា អ្នកជំនាញម្នាក់មានឈ្មោះថា Michael Madden បានអះអាង និងបកស្រាយរូបថតខាងលើថា មេដឹកនាំផ្ដាច់ការរូបនេះ អាចនឹងកំពុងតែព្យាយាមកែលម្អ ការបង្ហាញខ្លួននៅទីសាធារណៈរបស់លោក ឲ្យកាន់តែមានភាពរាក់ទាក់។

លោក Michael បានប្រាប់សារព័ត៌មាន BBC ថា «គ្មាននរណាម្នាក់ហ៊ានជិះខ្នងឪពុក ឬជីតា (មេដឹកនាំកូរ៉េខាងជើងពីមុន) របស់ លោក គីម ជុងអ៊ុន ឡើយ»។

«វាបង្ហាញន័យជាក់លាក់មួយ នៃទំនុកចិត្តផ្នែកនយោបាយ នៅក្នុងការគ្រប់គ្រង និងភាពជាអ្នកដឹកនាំប្រទេស របស់ លោក គីម ជុងអ៊ុន។ ប្រសិនបើលោកមិនមានអារម្មណ៍ថាមានសុវត្ថិភាពទេ នោះលោកក៏មិនអនុញ្ញាតឲ្យផ្សព្វផ្សាយរូបថតនោះដែរ»។ លោក Michael បានឲ្យដឹងបន្ថែម។

គួរបញ្ជាក់ផងដែរថា រូបថតខាងលើ ត្រូវគេជឿជាក់ថា បានថតរយៈពេល៣ថ្ងៃ ក្រោយពេលការបាញ់សាកល្បងគ្រាប់មីស៊ីលរបស់កូរ៉េខាងជើង ទទួលបរាជ័យ។

បើយោងតាមអង្គភាពកងកម្លាំងប្រដាប់អាវុធអាមេរិក US Pacific Command បានឲ្យដឹងថា គ្រាប់មីស៊ីលសាកល្បងរបស់កូរ៉េខាងជើងបានផ្ទុះ បន្ទាប់ពីបាញ់ចេញបានប៉ុន្មានវិនាទីប៉ុណ្ណោះ៕

ប្រភព៖ Dailystar ប្រែសម្រួល៖ សេង ឡុង