ស្ត្រីជំនួញហ្វីលីពីនបាត់បង់ជីវិត ក្រោយវះកាត់កែសម្ផស្សច្រើនកន្លែង

2017-03-30 03:02:56
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ត្រីអ្នកជំនួញមានមុខមានមាត់ជនជាតិហ្វីលីពីនអ្នកនាង Shiryl Saturnino ដែលវះកាត់កែសម្ផស្សច្រើនកន្លែងក្នុងពេលតែមួយ បានបាត់បង់ជីវិតហើយកាលពីថ្ងៃអាទិត្យទី ២៦ មិនា កន្លងទៅ។

ស្ត្រីវ័យ ២៩ឆ្នាំខាងលើ សម្រេចវះកាត់ពង្រីកសុដន់ ត្រគាក និងសម្រកទម្ងន់នៅគ្លីនិក Icon Clinic ក្នុងទីក្រុង Mandaluyong ភាគខាងកើតទីក្រុងម៉ានីល កាលពីថ្ងៃសៅរ៍ ទី ២៥ មិនា ចាប់ពីម៉ោង ៥ល្ងាច ដល់ ២៖៤០នាទីយប់។

ក្រុមវេជ្ជបណ្ឌិតនិយាយថា បេះដូងរបស់នាង Saturnino បានឈប់ដើរបន្ទាប់ពីវះកាត់រួច។ ពួកគេបានព្យាយាមសង្គ្រោះដោយមានជំនួយពីមជ្ឈមណ្ឌល Makati Medical Center ដែរ ប៉ុន្តែវាហួសពេលទៅហើយ ដោយនាងបានស្លាប់នៅម៉ោង ៣៖២១នាទីទៀបភ្លឺ។

អាជ្ញាធរកំពុងរង់ចាំធ្វើកោសល្យវិច័យដើម្បីកំណត់មូលហេតុនៃការស្លាប់ ហើយនឹងស៊ើបអង្កេតថាតើជាការធ្វេសប្រហែសរបស់គ្រូពេទ្យពេលវះកាត់ ឬយ៉ាងណា។

បើតាមក្រុមប្រឹក្សាច្បាប់របស់គ្លីនិក Icon Clinic បញ្ជាក់ក្នុងសេចក្ដីថ្លែងការណ៍ថា "អ្នកនាង Saturning គឺជាអតិថិជនប្រចាំគ្លីនិក ដែលពួកយើងមើលថែគាត់អស់រយៈពេលជាច្រើនឆ្នាំមកហើយ។" ទោះជាយ៉ាងណា ខាងមន្ទីរពេទ្យមិនបានរត់គេច ឬបដិសេធអ្វីទេ តែស្វាគមន៍សហការជាមួយអាជ្ញាធរក្នុងការស៊ើបអង្កេតរឿងនេះ៕