កម្មវិធីទូរសព្ទកុម្ម៉ង់អាហារសម័យថ្មី មាន ៥០ហាង ប្រើកាតធនាគារទើបទិញបានញាំ

2017-03-31 01:29:00
ចំនួនមតិ 0 | ចំនួនចែករំលែក 0

ចន្លោះមិនឃើញ

កម្មវិធីទូរសព្ទសម្រាប់កុម្ម៉ង់អាហារថ្មីឈ្មោះ Tesjor ឬភាសាខ្មែរអានថា "ទេសចរណ៍" ទើបត្រូវប្រកាសដាក់ឲ្យប្រើប្រាស់ផ្លូវការព្រឹកមិញ ដោយមុខងារបញ្ជាទិញអាហារប្រើសុទ្ធតែកាតធនាគារ។

លោក Steven Path នាយកក្រុមហ៊ុន Pathmazing បញ្ជាក់ថាកម្មវិធីកុម្ម៉ង់ម្ហូបអាហារ Tesjor ដែលក្រុមហ៊ុនលោកទើបបង្កើតនេះ ផ្ដោតសំខាន់ទៅលើការចាយប្រាក់អនឡាញ លែងប្រើលុយសុទ្ធផ្ទាល់កុម្ម៉ង់អាហារលើអ៊ីនធឺណិតដូចកន្លងទៅឡើយ។

លោកអះអាងថា Tesjor បង្កើតឡើងដើម្បីជំរុញវិស័យជំនួញអនឡាញ (Ecommerce) ក្នុងស្រុកកាន់តែទូលំទូលាយជាងមុន។ បច្ចុប្បន្ន ពលរដ្ឋខ្មែរ ពិសេសអ្នកភ្នំពេញភាគច្រើនមានកាតធនាគារនិងប្រើប្រាស់សេវាបង់ប្រាក់អេឡិចត្រូនិក ដូច្នេះវាដល់ពេលដែលត្រូវបង្កើតអ្វីមួយ ដើម្បីឲ្យការចាយប្រាក់ដោយប្រើកាតធនាគាររបស់ពួកគេកាន់តែងាយនិងទំនើបជាងមុន។

នាយកក្រុមហ៊ុនរូបនេះបន្ថែមថា បច្ចុប្បន្ន Tesjor បានសហការជាមួយភោជនីយដ្ឋានធំៗនិងល្បីឈ្មោះទូទាំងភ្នំពេញប្រហែល ៥០ ដើម្បីផ្ដល់ជម្រើសអាហារច្រើនបែបដល់អតិថិជន។ ចំពោះការបង់ប្រាក់វិញ លោក Path ថា អ្នកប្រើប្រាស់អាចបង់ តាម Wing, កាតអេស៊ីលីដា, Paygo, Visa និង MasterCard ជាដើម។

គ្រាន់តែថ្ងៃដំបូងមានអ្នកប្រើប្រាស់ Tesjor ដល់ទៅប្រហែល ១ពាន់នាក់ ហើយរំពឹងថានឹងកើនដល់ ១ម៉ឺននាក់នៅប៉ុន្មានថ្ងៃបន្ទាប់។ នាយកក្រុមហ៊ុនរូបនេះបញ្ជាក់។

ដោយឡែកលោក ជី សិលា នាយកក្រុមហ៊ុន CBM ដែលកំពុងកាន់កាប់ជំនួញច្រើនក្នុងដៃមាន Loteria, The Asian Kitchen, Domino's Pizza និង TOUS les JOURS ជាដើម ឲ្យដឹងថា ការសហការជាមួយ Tesjor គឺជាបដិវត្តន៍ថ្មីមួយសម្រាប់ប្រទេសកម្ពុជា។ លោកចង់បានន័យថា វាជាបដិវត្តន៍ក្នុងការចាយប្រាក់ទៅលើទំនិញអនឡាញថ្មី មិនមែនត្រឹមតែសំលៀកបំពាក់ ឬគ្រឿងអេឡិចត្រូនិកប៉ុណ្ណឹងឡើយ តែអាចទិញអាហារអនឡាញគ្រប់ប្រភេទបានយ៉ាងងាយដូចគ្នា។

លោកថា បច្ចុប្បន្នពលរដ្ឋខ្មែរចាយប្រាក់លើទំនិញអនឡាញច្រើន ហើយអ្នកទាំងនោះក៏នឹងអាចទទួលយករបៀបចាយប្រាក់ថ្មីលើផ្នែកម្ហូបអាហារ ដែលកាន់តែងាយស្រួលនិងទំនើប។

Tesjor ផ្តល់ជម្រើសបីសម្រាប់អ្នកប្រើប្រាស់ រួមមាន៖

Dine In ៖ កុម្ម៉ង់អាហារញាំក្នុងភោជនីយដ្ឋានផ្ទាល់តែម្តង។
Take Out ៖ កុម្ម៉ង់អាហារហើយយកទៅញាំនៅខាងក្រៅ។
Delivery ៖ កុម្ម៉ង់អាហារហើយឲ្យភ្នាក់ងារដឹកដល់ទីកន្លែង។

រាល់អាហារដែលអ្នកបានកុម្ម៉ង់ត្រូវបង់ប្រាក់តាមប្រព័ន្ធបង់ប្រាក់អេឡិចត្រូនិក Wing, កាតអេស៊ីលីដា, Paygo, Visa និង MasterCard ជាមុនសិន។ ក្រោយពេលខាងភោជនីយដ្ឋានអនុញ្ញាតការកុម្ម៉ង់របស់អ្នក អ្នកមានពេលតែ ១៥ នាទីប៉ុណ្ណោះដើម្បីបង់ប្រាក់។ បើហួស ១៥នាទី ការកុម្ម៉ង់នឹងត្រូវលុបចោល៕

ទាញយក Tesjor លើ iOS / Android

អត្ថបទ៖ ផាន់និត