តារាហុងកុង Andy Lau លុបចោលការប្រគំតន្ត្រីភ្លាមៗ

2017-03-30 23:10:00
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងដ៏មានប្រជាប្រិយភាព Andy Lau បានរំសាយការប្រគំតន្ត្រីអបអរចូលឆ្នាំថ្មី នៅក្នុងទីក្រុងហុងកុងកាលពីពេលថ្មីៗនេះ។

នៅថ្ងៃទី ១៧ ខែមករា ឆ្នាំ២០១៧ នេះ តារាចម្រៀង និងជាតារាសម្ដែងរូបនេះបានរងរបួសដល់ថ្នាក់បាក់ឆ្អឹងខ្នង ពេលដែលថតពាណិជ្ជកម្ម ក្នុងប្រទេសថៃ។ បន្ទាប់ពីហេតុការណ៍នោះ លោកត្រូវបានទទួលការព្យាបាល រយៈពេលជាង៥០ថ្ងៃ ហើយឥលូវនេះលោកបានធូរស្បើយខ្លះហើយ។

ដំបូងឡើយ តារាប្រុសវ័យ ៥៥ឆ្នាំរូបនេះ មានគម្រោងប្រគំតន្ត្រីចូលឆ្នាំ នៅឯទីលានលេងកីឡា Hong Kong Coliseum ក្នុងឆ្នាំនេះ ប៉ុន្តែទីបំផុតត្រូវបានរំសាយចោល ដោយសាររបួសរបស់លោក។

ខាងក្រុមហ៊ុនរបស់លោកក៏បានលើកឡើងដែរថា Andy Lau កំពុងស្ថិតក្នុងការពិនិត្យព្យាបាលជាបន្ត ហើយក្រុមគ្រូពេទ្យព្យាបាលតារាប្រុសរូបនេះ បានតម្រូវឲ្យមានការសម្រាករយៈពេលយូរ ដើម្បីជាសះស្បើយទាំងស្រុង។ មូលហេតុនេះហើយ ទើបក្រុមហ៊ុនសម្រេច លុបចោលការប្រគំតន្ត្រីនេះ។

ទាក់ទងនឹងការងារផ្សេងៗរបស់ តារាប្រុសនេះក្នុងឆ្នាំ ២០១៧ ខាងក្រុមហ៊ុន នឹងរៀបចំជាបន្តបន្ទាប់ អាស្រ័យលើស្ថានភាពសុខភាពរបស់លោក។ ដោយសារតែរបួសដ៏ធ្ងន់ធ្ងរនេះ បានធ្វើឲ្យលោកបាត់បង់ចំណូលយ៉ាងតិច ២០លានដុល្លារហុងកុង៕

ប្រភព៖ jaynestars ប្រែសម្រួល៖ យី សុធារី