ប្រតិកម្មរុស្ស៊ីពេលអាមេរិកបាញ់មីស៊ីល ៥៩ដើម លើមូលដ្ឋានទ័ពអាកាសស៊ីរី
- 2017-04-07 09:36:37
- ចំនួនមតិ 0 | ចំនួនចែករំលែក 0
ប្រតិកម្មរុស្ស៊ីពេលអាមេរិកបាញ់មីស៊ីល ៥៩ដើម លើមូលដ្ឋានទ័ពអាកាសស៊ីរី
ចន្លោះមិនឃើញ
ប្រធានាធិបតីអាមេរិកលោកដូណាល់ ត្រាំ បានបញ្ជាឲ្យបាញ់មីស៊ីលចំនួន ៥៩ដើម សំដៅទៅរកមូលដ្ឋានទ័ពអាកាសរដ្ឋាភិបាលស៊ីរីរបស់លោកអាសាដ កាលវេលាម៉ោង ៣៖៤៥នាទីព្រលឹមថ្ងៃសុក្រទី ៧មេសានេះ។
ការប្រកាសបាញ់ដែលកំពុងធ្វើឲ្យពិភពលោកព្រួយបារម្ភនេះ គឺបន្ទាប់ពីមានការវាយប្រហារតាមអាកាសប្រើសារធាតុគីមីសារីនរបស់លោកអាសាដ ដាក់ពលរដ្ឋស្លូតត្រង់នៅទីក្រុង Khan Sheikhoun កាលពីព្រឹកថ្ងៃអង្គារទី ៤មេសា បណ្ដាលឲ្យស្លាប់យ៉ាងតិច ៨៦នាក់ រួមមានកុមារ ២៧នាក់ និងរបួសជាង ៥០០នាក់ផ្សេងទៀត។
មីស៊ីលបាញ់ពេលនេះប្រភេទ Tomahawk Land Attack Missiles ឬហៅកាត់ថា TLAMs ដោយបាញ់ចេញពីនាវាពិឃាតអាមេរិកចំនួន ២គ្រឿង ឈ្មោះ USS Ross និង USS Porter ដែលកំពុងបណ្ដែតខ្លួនលើសមុទ្រមេឌីទែរ៉ាណេភាគខាងកើត។
មីស៊ីល TLAMs ទាំង ៥៩ដើម បាញ់ឆ្ពោះទៅមូលដ្ឋានទ័ពអាកាសមានកន្លែងចតយន្តហោះ កន្លែងស្តុកប្រេងយន្តហោះ លេណដ្ឋានរក្សាទុករំសេវផ្ទុះ ប្រព័ន្ធបញ្ជាទ័ពអាកាស និងប្រព័ន្ធរ៉ាដា។ នេះបើតាមអ្នកនាំពាក្យក្រសួងការពារជាតិអាមេរិកលោក Jeff Davis បញ្ជាក់ក្នុងសេចក្ដីថ្លែងការណ៍។
បើតាមប្រភពខាងលើ ក្រៅពីនាវាពិឃាត នៅមាននាវាមុជទឹក និងនាវាចម្បាំងផ្សេងទៀតដោយមីស៊ីលមួយដើមបំពាក់ក្បាលគ្រាប់ទម្ងន់ប្រមាណ ៤៥៣គីឡូក្រាម និងបញ្ជាឲ្យប្រព័ន្ធ GPS ផ្កាយរណបទៀតផង។ សមត្ថភាពរបស់វាអាចបាញ់បានចម្ងាយឆ្ងាយរហូតដល់ ២ ៤១៤គីឡូម៉ែត្រ។
TLAM មួយដើមមានទម្ងន់សរុប ១៥៨៧គីឡូក្រាម ប្រវែង ៦ម៉ែត្រ អាចហោះចេញបាន ២៤៥ម៉ែត្រក្នុងមួយវិនាទី។ ចំណែកតម្លៃមីស៊ីលមួយដើមប្រមាណ ៨៣,២ម៉ឺនដុល្លារ បើសរុបទាំង ៥៩ដើម ចំណាយអស់ ៤៩លានដុល្លារអាមេរិក។
យោងតាមយោធាអាមេរិកជំនាញខាងមីស៊ីលបង្ហើបថា Tomahawk មានជំនាញកម្ទេចយន្តហោះដ្រូនធំៗ ហើយអាចដូរទិញដៅបាន ទោះបាញ់ចេញបានពាក់កណ្ដាលផ្លូវក៏ដោយ។
ក្រុមឃ្លាំមើលសិទ្ធិមនុស្សស៊ីរីមានស្នាក់ការនៅអង់គ្លេសបានបញ្ជាក់ការបាញ់របស់អាមេរិកនេះថា ចំគោលដៅល្អ ហើយវាលយន្តហោះនោះស្ទើរខ្ទេចទាំងស្រុង ដោយទាហានស៊ីរីចំនួន ៤នាក់បានស្លាប់។ ទូរទស្សន៍រដ្ឋស៊ីរីបានហៅការវាយប្រហារខាងលើ គឺជាការឈ្លានពានដែលនាំទៅរកការបាត់បង់ជីវិតមនុស្ស។ ងាកទៅមើលប្រទេសរុស្ស៊ីដែលជាបងធំរបស់ស៊ីរី និងតែងតែជួយជ្រោមជ្រែងរដ្ឋាភិបាលរបស់លោកអាសាដវិញ គឺតាមរយៈលោក Vladimir Safronkov ជាប្រេសិតរងអង្គការសហប្រជាជាតិរុស្ស៊ី បានព្រមានពីផលវិបាកអវិជ្ជមាននានាអាចកើតមាន ក្រោយអាមេរិកវាយហារប្រហារលើទ័ពស៊ីរី ដោយលោកលើកឧទាហរណ៍ឲ្យក្រឡេកមើលស្ថានភាពប្រទេសអ៊ីរ៉ាក់ និងលីប៊ីបច្ចុប្បន្ន៕