ជំនឿ និង ប្រផ្នូលតាមបែបបុរាណ ខណៈយុវវ័យមិនសូវជឿលើជំនឿខ្លះ តែ...

2017-04-09 02:05:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ជំនឿចាស់ៗសម័យមុនអាចជារឿង ដែលស្តាប់ទៅមិនសូវសមហេតុផលក្នុងផ្នត់គំនិតរបស់មនុស្សសម័យកុំព្យួទ័រយើងនេះ ជាពិសេសយុវវ័យ ប៉ុន្តែក្នុងទឹកស្អុយក៏នៅមានស្រមោលដួងច័ន្ទ ដូច្នេះជំនឿមួយចំនួនក៏បង្កប់នូវអត្ថន័យតថភាពដែរ។

ជំនឿប្រជ្រុយ៖

មនុស្សសម័យនេះមិនសូវចាប់អារម្មណ៍ចំពោះប្រជ្រុយផ្នូតខ្មៅ ឫផ្នូតក្រហមប៉ុន្មានឡើយ ព្រោះគ្រាន់តែបាញ់ឡេស័រតែម្តងក៏បាត់។ ប៉ុន្តែចំពោះចាស់បុរាណមានទស្សនៈផ្ទុយពីនេះ ដោយគិតថា មិនមែនជារឿងលេងសើចនោះទេព្រោះពួកគាត់មានជំនឿថា ក្មេង ដែលមានផ្នូតជាប់តាំងពីកំណើតមកនោះ គឺធ្លាប់កើតម្តងរួចហើយពីជាតិមុន ហើយគេសម្គាល់ដោយគេយកកំបោរក្រហមបៀកពេលស្លាប់ ដើម្បីឲ្យកើតជាតិក្រោយមានស្នាមផ្នូតក្រហម ប៉ុន្តែបើគេយកធ្យូងបៀក គឺពេលកើតមកមានផ្នូតខ្មៅ។

ជំនឿទឹកអប់

បើនិយាយពីជំនឿហាមយកទឹកអប់មិត្តភក្តិមកបាញ់នឹងបណ្តាលឲ្យមានរឿងឈ្លោះគ្នាពីព្រោះពាក្យទំនៀមបុរាណបានពោលថា ភ្នំមួយមិនអាចមានខ្លាពីរ។ ដូច្នេះក្លិនទឹកអប់ ដែលយើងប្រើក៏ដូចក្លិនសាខ្លាយ៉ាងដូច្នេះ។ កាលណាខ្លាពីរក្បាលមកជួបគ្នាក៏ត្រូវប្រយុទ្ធគ្នាស៊ីសាច់ហុតឈាម។

ក្រាស់សិតសក់

ចំពោះជំនឿពីក្រាស់សិតសក់បាក់មនុស្សសម័យមុនពួកគាត់មានជំនឿថា ប្រសិនបើអ្នកណាកំពុងតែសិតសក់សុខៗស្រាប់តែបាក់ក្រាស់នោះបញ្ជាក់ថានឹងមានរឿងអាក្រក់កើតឡើងដល់ខ្លួន។ បើគ្រោះស្រាលគឺគ្រាន់តែមានរឿងឈ្លោះទាស់ទែងគ្នា ឫ បាត់បង់របស់ជាទីស្រឡាញ់។ ប៉ុន្តែបើគ្រោះកាចវិញ គឺអាចដល់ថ្នាក់បាត់បង់ជីវិត។

ជំនឿការសង់ផ្ទះ

ជំនឿមួយទៀតគឺប្រសិនបើអ្នកសង់ផ្ទះថ្មីមុននឹងចូលទៅរស់នៅចាស់បុរាណគាត់តែងតែប្រាប់ថា ឲ្យលីបាវអង្ករចូលទៅសិន នោះនឹងធ្វើឲ្យផ្ទះរបស់អ្នកមានចំណីអាហារហូបចុកសម្បូរហូរហៀរ ហើយបើដាក់ខ្សែ-ក ចិញ្ចៀន មាស ប្រាក់ ចូលទៅក្នុងបាវអង្ករផងនោះ មាសប្រាក់នឹងហូរចូលមកខ្ជាក់ៗ ចាប់មុខរបរអ្វីក៏ចេះតែត្រូវ ចេះតែកាក់កប ចូលទៅរស់នៅក្នុងផ្ទះនេះជួបតែហេងហេងតែម្តង។

ជំនឿជំនឿដាក់ទូរសព្ទខាងឆ្វេងនៃតុ

ការដាក់ទូរស័ព្ទត្រូវជ្រើសរើសជ្រុង នេះជាជំនឿរបស់ជនជាតិយីបស៊ី (Gipsy) មានជំនឿថា បើដាក់ទូរស័ព្ទនៅជ្រុងខាងឆ្វេងនៃតុធ្វើការនោះ អ្នកដែលទូរស័ព្ទចូលមក ប្រាប់តែពីដំណឹងអាក្រក់ ដំណឹងមិនសប្បាយចិត្ត្។ ប៉ុន្តែបើដាក់ទូរស័ព្ទនៅជ្រុងខាងស្តាំនៃតុធ្វើការនោះអ្នកដែលទូរស័ព្ទចូលមក នឹងប្រាប់តែព័ត៌មានល្អៗ ដែលធ្វើឲ្យយើងសប្បាយចិត្ត៕

អត្ថបទ៖ ហេង នាង (CCJ)