៥ កន្លែងក្នុងខេត្តមណ្ឌលគីរី ទេសភាពស្អាតដូចរូបគំនូរមិនសូវមានអ្នកទៅដល់

2017-04-10 04:54:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ខេត្តមណ្ឌលគីរី ស្ថិតនៅភាគឦសាននៃប្រទេសកម្ពុជា គឺជាដែនដីសម្បូរទៅដោយព្រឹក្សព្រៃ និងអាកាសធាតុដ៏ត្រជាក់។ ខេត្តនេះ មានតំបន់ទេសចរណ៍ធម្មជាតិជាច្រើនដែលលាក់ខ្លួនពួនអាត្មាមិនសូវមានអ្នកទៅដល់។ ខាងក្រោមនេះជាតំបន់ទេសចរណ៍ទាំង ៥កន្លែង នៃខេត្តមណ្ឌលគីរីមានទេសភាពល្អប្រណិតដូចរូបគំនូរ ដែលក្រុមការងារផ្លូវទៅស្រុករបស់ Sabay ធ្លាប់បានទៅដល។

១. ផ្លូវទៅដាក់ដាំ

ធ្វើដំណើរចេញពីក្រុងសែនមនោរម្យ ខេត្តមណ្ឌលគិរី ឆ្ពោះទៅឃុំដាក់ដាំ ស្រុកអូររាំង រហូតដល់ទល់ដែនប្រទេសវៀតណាម ចម្ងាយផ្លូវប្រហែល ៣០គីឡូម៉ែត្រ លោកអ្នកនឹងឃើញមានទេសភាពដ៏ស្រស់ត្រកាល ប្រៀបដូចជានៅបណ្ដាប្រទេសអភិវឌ្ឍយ៉ាងដូច្នោះដែរ។ ជាមួយនឹងអាកាសធាតុត្រជាក់នៅតំបន់ឦសានខេត្តមណ្ឌលគិរី ផ្លូវទៅដាក់ដាំ ក្រាលដោយកៅស៊ូ ស្អាត ខណៈតាមផ្លូវមានឡើងភ្នំចុះភ្នំ ផ្លូវមានរៀងអក្សរ N បត់បែន ថែមទាំងមានដើមឈើតូចធំអមសងខាងផ្លូវ ជាពិសេសគឺមានដើមស្រល់ដុះលើភ្នំ និងមានស្មៅលើភ្នំពណ៌មាសទៀតនោះ ធ្វើឲ្យអ្នកស្ទើរតែមិនជឿថា ជាដែនដីរបស់ដូនតាខ្មែរយើងឡើយ។

២. ដើមស្រល់ នៅមណ្ឌលគិរី

ធ្វើដំណើរចេញពីទីក្រុងសែនមនោរម្យ ទីរួមខេត្តមណ្ឌលគិរី ឆ្ពោះទៅឃុំដាក់ដាំ ស្រុកអូររាំង ចម្ងាយប្រហែល១៥គីឡូម៉ែត្រ លោកអ្នកប្រាកដជាបានឃើញដើមស្រល់ជាច្រើន ដុះអមសងខាងផ្លូវ លើភ្នំខ្ពស់ទាប និងបង្ហាញសម្រស់ធម្មជាតិស្រស់ស្អាត មិនចាញ់ដើម Christmas (គ្រីស្មាស) សិប្បនិម្មិត ដែលគេតុបតែងឡើយ។ នៅលើដងផ្លូវកៅស៊ូរលោងស្រិលដ៏សែនស្ងាត់ ដែលពុំសូវមានអ្នកដំណើរឆ្លងកាត់ ហើយពេលឃើញដើមស្រល់យ៉ាងច្រើនដុះលើភ្នំ ពិតជាធ្វើឲ្យអ្នកមានអារម្មណ៍ថា វាពិតជាស្អាតមែនទែន ប្រៀបដូចនឹងដើម Christmas ដែលគេតុបតែង ដើម្បីត្រៀមប្រារព្ធពិធីបុណ្យណូអែលឆាប់ៗខាងមុខនេះយ៉ាងដូច្នោះដែរ។

៣. ទឹកធ្លាក់រមនា

ទឹកធ្លាក់រមនាទីពីរជាកន្លែងកម្សាន្តដ៏រីករាយមួយនៅក្នុងខេត្តមណ្ឌលគីរី។ ពេលភ្ញៀវជាតិ និងអន្តរជាតិទៅដល់ទីនោះប្រាកដជាចម្លែកអារម្មណ៍នឹងសំឡេងពីរខុសគ្នាពោលគឺសំឡេងទឹកធ្លាក់ និងសំឡេងវារីអគ្គិសនីលាយបញ្ចូលគ្នាក្នុងពេលតែមួយ។ ទឹកធ្លាក់លើផ្ទាំងថ្មកម្ពស់ប្រហែលជា៥ម៉ែត្រ ប៉ុន្តែបើសរុបទាំងផ្នែកខាងលើ និងខាងក្រោមប្រហែលជា៣០០ម៉ែត្រដែលលេងកម្សាន្តបាន។នៅជាប់ទឹកធ្លាក់នោះមានវារីអគ្គិសនីខ្នាតតូចមួយដែលអាចបម្រើដល់អ្នកភូមិនៅទីនោះបានខ្លះ។

៤. ដើមជ្រៃយក្ស នៅទឹកធ្លាក់ជ្រៃធំ

នៅពេលធ្វើដំណើរទៅកម្សាន្តនៅទឹកធ្លាក់ជ្រៃធំក្នុងខេត្តមណ្ឌលគីរី លោកអ្នកប្រាកដជាចាប់អារម្មណ៍ខ្លាំងនឹងដើមជ្រៃយក្សមួយដើមដែលមានអាយុកាលរាប់រយឆ្នាំ និងមានបែកធំៗវែងអន្លាយគួរជាទីគយគន់ពេកក្រៃ។ នៅចម្ងាយពីដើមជ្រៃយក្សប្រហែលជា២០ម៉ែត្រមានទឹកធ្លាក់បែកសំពោងដែលទីនេះហៅថា ទឹកធ្លាក់ជ្រៃធំ។ វាមានទីតាំងនៅឃុំដាក់ដាំ ស្រុកអូររាំងដែលមានចម្ងាយប្រមាណ២០គីឡូម៉ែត្រពីក្រុងសែនមនោរម្យ ខេត្តមណ្ឌលគីរី។ ដើម្បីទៅដល់ទីនោះ លោកអ្នកអាចធ្វើដំណើរដោយរថយន្តក៏បាន ឬម៉ូតូក៏បាន។

៥.ទឹកជ្រោះសែនមនោរម្យ

ទឹកជ្រោះសែនមនោរម្យនៅកណ្តាលក្រុងសែនមនោរម្យ នៃខេត្តមណ្ឌលគីរីបានក្លាយជាកន្លែងងាយស្រួលបំផុតសម្រាប់អ្នកទេសចរទៅលំហែកាយ ខណៈទឹកធ្លាក់មានកម្ពស់រាប់ម៉ែត្រ និងដើមឈើធំៗដែលបង្កើតជាខ្យល់បកត្រជាក់ឆ្អឹងខ្នង។ វាមានទីតាំងនៅក្នុងស្រុកសែនមនោរម្យចម្ងាយត្រឹមតែ៥គីឡូម៉ែត្រប៉ុណ្ណោះពីទីរួមខេត្តតាមរយៈផ្លូវគ្រួសក្រហម។ តាមសងខាង ផ្លូវលំនោះមានឧស្សាហកម្មចម្ការកៅស៊ូ កាហ្វេ និងស្វាយចន្ទីផងដែរ។

ទឹកធ្លាក់មានកម្ពស់ជាង១០ម៉ែត្រដែលបង្កើតបានជាសំឡេងកងរំពងពេញត្រចៀកនៅពេលភ្ញៀវស្ថិតនៅផ្នែកខាងក្រោម។ នៅមាត់ទឹកធ្លាក់នោះមានដើមគគីរធំមួយដើមដែលមានអាយុកាលរាប់រយឆ្នាំមកហើយ៕

អត្ថបទ៖ វឌ្ឍនៈ