ក្តៅៗ និស្សិត IT ហេង សៅឌី ក្លាយជាស្តេចអុកអង្គរសង្ក្រាន្តទឹកប្រាក់៣២លានរៀល

2017-04-16 04:19:38
ចំនួនមតិ 0 | ចំនួនចែករំលែក 0

ចន្លោះមិនឃើញ

តារារះថ្មីក្នុងវិស័យកីឡាអុកហេង សៅឌីបានក្លាយជាស្តេចអុកអង្គរសង្ក្រាន្តឆ្នាំ២០១៧ដោយទទួលបានប្រាក់រង្វាន់រហូតដល់២០លានរៀលពីសម្តេច ហ៊ុន សែប និងប្រាក់ឧបត្ថម្ភផ្សេងៗ១២លានរៀលទៀតដែលសរុបទាំងអស់៣២លានរៀល។ ចំពោះចំណាត់ថ្នាក់លេខ២បានកីឡាករ ប៊ិន គាសេង និងលេខ៣បានទៅកីឡាករ ឆយ វីរ៉ា។

ហេង សៅឌី អាយុ២៤ឆ្នាំជានិស្សិតព័ត៌មានវិទ្យា (IT) និងមានស្រុកកំណើតនៅខេត្តកណ្តាល។ តាមពិតទៅរូបគេធ្លាប់បានចូលរួមប្រកួតក្នុងព្រឹត្តិការណ៍ស្តេចអុកអង្គរសង្ក្រាន្តនេះ២ដងហើយ ប៉ុន្តែពីរលើកកន្លងមកមិនទទួលបានលទ្ធផលល្អឡើយ។ យ៉ាងណាមិញឆ្នាំនេះរូបគេពិតជាបង្កើនសមត្ថភាពខ្លាំងមែនទែនដោយបានផ្តួលជើងខ្លាំងទាំងអស់ដើម្បីក្លាយជាស្តេចអុកឆ្នាំ២០១៧នេះតែម្តង។

សៅឌីបាននិយាយថា កត្តាដែលជំរុញឲ្យរូបគេទទួលបានជ័យជម្នះសម្រាប់ការប្រកួតឆ្នាំនេះមាន២យ៉ាង។ ទី១ ការលេងអុកម្តងៗត្រូវការភាពវ័យឆ្លាត និងទី២ត្រូវមានស្មារតីរឹងមាំដោយមិនត្រូវចុះញមឬខ្លបខ្លាចដៃគូឡើយ បើទោះជាដឹងថា ដៃគូខ្លាំងយ៉ាងណាក៏ដោយ។

ជយលាភីទាំង៣រូប

សម្រាប់ជយលាភី ហេង សៅឌី លេខ១ទទួលបានប្រាក់រង្វាន់២០លានរៀល និងប្រាក់រង្វាន់ឧបត្ថម្ភផ្សេងៗទៀត១២លានរៀលដែលសរុបទាំងអស់ចំនួន៣២លានរៀល។ លេខ២ ប៊ិន គាសេងអាយុ៤០ឆ្នាំទទួលបាន១២លានរៀលពីសម្តេច ហ៊ុន សែន និងប្រាក់រង្វាន់ផ្សេងទៀត៨លានរៀលដែលសរុប២០លានរៀល និងលេខ៣ ឆយ វីរ៉ាអាយុ៣៧ឆ្នាំទទួលបាន៨លានរៀលពីសម្តេច ហ៊ុន សែន និង៤លានរៀលពីការឧបត្ថម្ភផ្សេងៗទៀតដែលសរុបទាំងអស់១២លានរៀល។ លេខ៤បានទៅ ឈាន បូរ៉ា អាយុ២៧ឆ្នាំទទួលបាន៤លានរៀលពីសម្តេច ហ៊ុន សែន និងលេខ៥ដល់៨ទទួលបាន២លានរៀលដូចគ្នាពីសម្តេចតេជោ៕