ក្រោយទិញផ្ទះបង់រំលស់ ប្ដីប្រពន្ធគួរធ្វើបែបណា ដើម្បីមានលុយទិញសម្ភារៈ

2017-04-20 04:59:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ទិញផ្ទះបង់រំលស់ គឺជាវិធីសាស្ត្រល្អបំផុត ចំពោះអ្នកមិនមានលទ្ធភាពយកលុយទៅទិញទាំងដុល ជាពិសេសប្ដីប្រពន្ធដែលទើបតែរៀបការហើយថ្មីៗ ចង់មានលំនៅឋានផ្ទាល់ខ្លួន។ ក្រោយទិញផ្ទះហើយ ទាំងពីរនាក់ប្ដីប្រពន្ធអាចអស់លុយពីខ្លួន ចំណែកក្នុងផ្ទះពុំមានទ្រព្យសម្បត្តិអ្វីសោះ។ ដូច្នេះប្រសិនបើចង់មានទ្រព្យរបស់ដាក់ផ្ទះ តើប្ដីប្រពន្ធគួរធ្វើបែបណាទៅ? ខាងក្រោមនេះជាការចែករំលែកពីអ្នកមានបទពិសោធន៍ ក្នុងបញ្ហានេះដោយផ្ទាល់៖

១. ដាក់ផែនការរយៈពេលខ្លី

លោក ប្រាក់ ចាន់រ៉ា ជាបុគ្គលិកក្នុងក្រុមហ៊ុនឯកជនមួយកន្លែង ហើយបានរួមគ្នាពីរនាក់ប្ដីប្រពន្ធទិញផ្ទះបង់រំលស់ ប្រាប់ថា ក្រោយលោកទិញផ្ទះហើយ មានតែសំបកប៉ុណ្ណោះអ្វីក៏មិនមានដែរ តែដើម្បីមានទ្រព្យដាក់ផ្ទះ គឺត្រូវដាក់ផែនការរយៈពេលខ្លីមួយ ថាតើក្នុងរយៈពេល១ខែទៀតត្រូវមានអ្វី ២ខែទៀតត្រូវមានអ្វី។ បន្ទាប់ពីកំណត់ផែនការរួច ត្រូវរៀបចំសន្សំលុយមួយចំណែកដែលសល់ពីការរំលស់ផ្ទះ ដាក់ចូលក្នុងកញ្ចប់ប្រាក់សន្សំទិញរបស់។ លោកប្រាប់ថា ត្រូវតែកំណត់បែបនេះដាច់ខាត ព្រោះបើមិនដូច្នោះទេ ប្រាកដជាចាយលុយគ្មានគោលដៅអស់លុយអត់ប្រយោជន៍។

២. ផ្ដល់អាទិភាពទ្រព្យសម្បត្តិណាដែលជាតម្រូវការចាំបាច់

មកដល់ចំណុចនេះ លោក ប្រាក់ ចាន់រ៉ា លើកឡើងថា វិធីសាស្រ្តល្អមួយទៀត គឺត្រូវទិញទ្រព្យទៅតាមដំណាក់កាល និងទៅតាមតម្រូវការជាក់ស្ដែង។ លោកនិយាយថា ក្រោយទិញផ្ទះរួចប្រពន្ធលោករអ៊ូថា ក្ដៅគេងមិនកើត ដូច្នេះតម្រូវការចាំបាច់គឺម៉ាស៊ីនត្រជាក់។ បន្ទាប់ពីដឹងពីតម្រូវការហើយ ត្រូវយកលុយទិញរបស់នោះមុនគេ ហើយបន្តមកទៀតនៅបន្តទិញទៅតាមដំណាក់កាល យូរៗទៅគង់តែកើនទ្រព្យសម្បត្តិ ដោយមិនដឹងខ្លួន។

៣. បែងចែកលុយដែលរកបានពីរនាក់ប្ដីប្រពន្ធឱ្យច្បាស់

ត្រង់ចំណុចនេះមានន័យថា ទាំងពីរនាក់ប្ដីប្រពន្ធសុទ្ធតែមានប្រាក់ខែរៀងខ្លួន។ ដូចនេះត្រូវបែងចែកលុយឱ្យច្បាស់ថា លុយអ្នកណាច្រើនជាងត្រូវទុកសន្សំ និងចាយវាយ ចំណែកលុយអ្នកណាតិចជាងល្មមអាចរំលស់ផ្ទះប្រចាំខែ គួរទុកលុយអ្នកនឹងទៅ។ ធ្វើបែបនេះងាយស្រួលឱ្យពីរនាក់ប្ដីប្រពន្ធចេះគ្រប់គ្រងលុយបានល្អ មិនត្រឹមតែប៉ុណ្ណោះអាចសល់លុយទិញទ្រព្យសម្បត្តិទៀតផង។ នេះបើតាមការលើកឡើងបន្ថែមទៀតរបស់លោក ប្រាក់ ចាន់រ៉ា។

៤. លុបបំបាត់ការចំណាយដែលមិនចាំបាច់ទាំងអស់

ការចំណាយមិនចាំបាច់ក្នុងជីវភាពរស់នៅប្រចាំថ្ងៃដូចជា៖ បង្កើនការទិញរបស់ប្រើប្រាស់ខោអាវ ស្បែកជើង ការចំណាយលើការហូបចុកក្រៅផ្ទះ ចំណាយលើមនុស្សមិនបានផលចូលចិត្តប៉ាវអ្នកដទៃ សេវាមិនចាំបាច់ផ្សេងៗអ៉ីនធើណេត ទម្លាប់បង្កើតបំណុលលេងតុងទីន ជាដើម គឺត្រូវលប់បំបាត់ទាំងអស់។ ដូច្នេះហើយ ប្ដីប្រពន្ធកាន់តែសល់ដើម្បីទុកទិញទ្រព្យសម្បត្តិសំខាន់ៗវិញ៕

អត្ថបទ៖ វឌ្ឍនៈ