ផ្លូវ៣កន្លែងនៅកម្ពុជា ទេសភាពស្អាតបំផុត មិនចាញ់បរទេស

2017-04-20 08:41:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ផ្លូវ ៣កន្លែងនៅក្នុងប្រទេសកម្ពុជា មានទេសភាពស្អាតបំផុត ប្រៀបដូចផ្ទាំងគំនូរ មិនចាញ់បរទេសប៉ុន្មានឡើយ។ ដូច្នេះ តើផ្លូវទាំង៣ កន្លែងនោះមាននៅខេត្តណាខ្លះ? តោះ ទៅទស្សនាទិដ្ឋភាពខាងក្រោមនេះទាំងអស់គ្នា៖

១. ផ្លូវទៅខេត្តកោះកុង

ធ្វើដំណើរតាមផ្លូវជាតិលេខ ៤៨ បំបែកពីស្រែអំបិល ឆ្ពោះទៅខេត្តកោះកុង ក្នុងចម្ងាយផ្លូវជាង ១៤០ គីឡូម៉ែត្រ អ្នកប្រាកដជានឹងលង់សម្រស់ធម្មជាតិតាមដងផ្លូវ វាលស្រែរំលេចពណ៌ខៀវស្រងាត់ ក្រោយរងដំណក់ទឹកភ្លៀងជោកជាំនាខែវស្សា និងទេសភាពរំលេចពណ៌មាសនារដូវប្រាំង ជាមួយភ្នំតូចធំយ៉ាងវែងអន្លាយនាំអារម្មណ៍ស្រស់ស្រាយ ទោះបីហត់នឿយក្នុងការធ្វើដំណើរយ៉ាងណាក៏ដោយ។

២. ផ្លូវពីរតនគីរីទៅមណ្ឌលគីរី

បើអ្នកដំណើរចេញពីទីរួមខេត្តរតនគីរីដល់ស្រុកលំផាត់ និងបន្តដំណើរឆ្ពោះទៅស្រុកកោះញែកខេត្តមណ្ឌលគីរី លោកអ្នកប្រាកដជាមានអារម្មណ៍ស្រស់ស្រាយ សប្បាយរីករាយ ភ្លេចអត់ទុក្ខហ្មងសៅនានាជាមួយនឹងសម្រស់ធម្មជាតិតាមដងសង្ខាងផ្លូវប្រៀបដូចជាផ្ទាំងគំនូរដែលផុសចេញពីវិចិត្រករដៃឯក។

ផ្លូវជាង២០០គីឡូម៉ែត្រហាក់ដូចជាឆ្ងាយ ប៉ុន្តែពេលធ្វើដំណើរលើងផ្លូវដែលពោរពេញដោយសម្រស់ធម្មជាតិ និងគ្មានអ្វីរំខានដល់ចរាចរណ៍ ស្រាប់តែទៅដល់ទីរួមខេត្តមណ្ឌលគីរីក្នុងរយៈពេលមួយដែលអារម្មណ៍របស់លោកអ្នកមិនទាន់អស់ចិត្តនឹងធម្មជាតិឡើយ។

៣. ផ្លូវទៅដាក់ដាំ

ធ្វើដំណើរចេញពីក្រុងសែនមនោរម្យ ខេត្តមណ្ឌលគិរី ឆ្ពោះទៅឃុំដាក់ដាំ ស្រុកអូររាំង រហូតដល់ទល់ដែនប្រទេសវៀតណាម ចម្ងាយផ្លូវប្រហែល ៣០គីឡូម៉ែត្រ លោកអ្នកនឹងឃើញមានទេសភាពដ៏ស្រស់ត្រកាល ប្រៀបដូចជានៅបណ្ដាប្រទេសអភិវឌ្ឍយ៉ាងដូច្នោះដែរ។

ជាមួយនឹងអាកាសធាតុត្រជាក់នៅតំបន់ឦសានខេត្តមណ្ឌលគិរី ផ្លូវទៅដាក់ដាំ ក្រាលដោយកៅស៊ូ ស្អាត ខណៈតាមផ្លូវមានឡើងភ្នំចុះភ្នំ ផ្លូវមានរៀងអក្សរ N បត់បែន ថែមទាំងមានដើមឈើតូចធំអមសងខាងផ្លូវ ជាពិសេសគឺមានដើមស្រល់ដុះលើភ្នំ និងមានស្មៅលើភ្នំពណ៌មាសទៀតនោះ ធ្វើឲ្យអ្នកស្ទើរតែមិនជឿថា ជាដែនដីរបស់ដូនតាខ្មែរយើងឡើយ៕

អត្ថបទ៖ វឌ្ឍនៈ