នារីអូសតេសក្រុមហ៊ុន Vietjet វៀតណាម ជាប់លេខ២ មានភាពទាក់ទាញបំផុតក្នុងលោក

2017-04-20 10:25:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនអាកាសចរណ៍វៀតណាម Vietjet ដែលល្បីខាងនារីអូតេសស្លៀកឈុតប៊ីគីនីធ្វើឲ្យក្រុមហ៊ុនកើបចំណូលយ៉ាងច្រើន ពេលនេះបានជាប់ជាក្រុមហ៊ុនមាននារីអូសតេសទាក់ទាញបំផុតលំដាប់ទី២ ក្នុងលោក។ នេះបើតាមគេហទំព័រទេសចរណ៍កាណាដា VIVA Lifestyle and Travel។

ចំណាត់ថ្នាក់ក្រុមហ៊ុនអាកាសចរណ៍ Vietjet នេះ តាមពីក្រោយដោយក្រុមហ៊ុនអាកាសចរណ៍ Air Serbia, Air France និង Singapore Airlines ដែលស្ថិតនៅកំពូលគេទាំង ៥។

គេហទំព័រ VIVA ជឿថា ក្រុមហ៊ុន Vietjet ជាប់ចំណាត់ថ្នាក់មាននារីទាក់ទាញបំផុតទី ២ គឺដោយសារតែឯកសណ្ឋានប៊ីគីនីដ៏ប៉ិនប្រសព្វ ដែលបានចូលរួមចំណែកនាំឲ្យក្រុមហ៊ុនជោគជ័យខ្លាំង។ កត្តានេះដែរ បានធ្វើឲ្យនាយកប្រតិបត្តិក្រុមហ៊ុនអ្នកស្រី Nguyen Thi Phuong Thao បានក្លាយជាមហាសេដ្ឋីពាន់លានដុល្លារភេទស្រីដំបូងគេនៅវៀតណាមកាលពីពេលថ្មីៗនេះ ជាមួយទ្រព្យសម្បត្តិ ១,២ពាន់លានដុល្លារ។

អ្នកស្រី Thao បានបើកដំណើរការ Vietjet ក្នុងឆ្នាំ ២០១១។ គ្រាន់តែក្នុងឆ្នាំ ២០១៦ ក្រុមហ៊ុន Vietjet ស្រូបយកអ្នកដំណើរបានជិត ១៥លាននាក់ និងរកចំណូលបាន ១០៥លានដុល្លារអាមេរិក។

ចំណែកក្រុមហ៊ុនអាកាសចរណ៍មាននារីអូតេសទាក់ទាញបំផុតលំដាប់លេខ១ គឺ Air Emirates ស្ថិតនៅទីក្រុងឌូបៃ ប្រទេសអារ៉ាប់រួម។ Air Emirates បានទទួលកេរ្តិ៍ឈ្មោះជាយូរមកហើយនៅលើបណ្ដាញសង្គមតាមរយៈឯកសណ្ឋានគ្មានពីរ ងាយចំណាំ និងរូបរាងនារីអូតេសស្រស់ស្អាត៕