ខាំ ខ្លានាង ប្រាប់ចំណុចខ្សោយត្រូវកែប្រែក្រោយភ្លាត់ច្រើនដង

2017-04-24 06:56:36
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកប្រដាល់ដែលកំពុងសាងភាពចាប់អារម្មណ៍ដល់អ្នកទស្សនាគុនខ្មែរ ខាំ ខ្លានាង ប្រាប់ចំណុចខ្សោយរបស់ខ្លួនដែលត្រូវតែកែប្រែព្រោះវាប៉ះពាល់ខ្លាំងនាពេលកន្លងមកជាក់ស្ដែងប្រកួតភាពមិត្តភាពអន្តរជាតិម្សិលមិញនេះតែម្ដង។

កីឡាករ ខាំ ខ្លានាង ត្រូវអាជ្ញាកណ្ដាលរាប់

កីឡាករវ័យក្មេង ខាំ ខ្លាំនាង បានឲ្យដឹងកាលពីម្សិលមិញនេះថា គិតមកដល់ពេលនេះ គេឡើងប្រកួតគុនខ្មែរបានប្រហែលជា៨០ដងមកហើយ ក្នុងនោះឈ្នះប្រហែល៧០ដង។ បើទោះជាមានស្ថិតិឈ្នះច្រើនលើសលុកក្ដីតែ ជើងខ្លាំងទម្ងន់ ៥១គីឡូក្រាមរូបនេះប្រាប់ថាខ្លួនធ្វើមិនទាន់បានល្អត្រង់ចំណុចតាំងឃុំបានល្អនោះឡើយ ហើយលើកតាំងឃុំយឺត។

កីឡាករ ខាំ ខ្លានាង ក្រហម

ជាក់ស្ដែងដូចការប្រកួតជាមួយកីឡាករថៃ Anon ម្សិលមិញនៅ PNN អញ្ចឹង គេភ្លាត់រហូតទៅដល់ពីរលើក ដែលបណ្ដោយឲ្យកីឡាករថៃទាត់កាប់ចានត្រូវ រហូតដល់អាជ្ញាកណ្ដាលរាប់ដល់ទៅពីរដង។ នៅពេលចូលអោបឬនៅកៀកគ្នាកូនសិស្សរបស់អតីតជើងខ្លាំង ប៉ឺត ខាំ ម្នាក់នេះមិនសូវពឹតខ្លួនបិទពីការវ៉ៃរបស់ដៃគូឡើយបានល្អទេ។ កីឡាករមាឌល្អិតរូបនេះបន្តទៀតថា គេនឹងខំប្រឹងប្រែងហាត់ឲ្យខ្លាំងជាងនេះ ហើយចំណុចខ្វះខាតខាងលើត្រូវតែខំហាត់កែប្រែវាឲ្យល្អឡើងវិញ ដើម្បីបន្តស្វែងរកជ័យជម្នះនិងមិនបណ្ដោយឲ្យមានកំហុសដដែលនេះទៀតទេ។

កីឡាករ ខាំ ខ្លានាង ក្រហម

ខាំ ខ្លាំនាង ជាកូនសិស្សរបស់អតីតកីឡាករកំពូលល្បិចមានស្នៀតប្រយុទ្ធគ្រប់បែប ប៉ឺត ខាំ មកពីក្លឹបរហាប់ស្វាយប៉ាក។ បច្ចុប្បន្ននេះកីឡាករវ័យក្មេងម្នាក់នេះកំពុងសាបព្រោះកេរ្តិ៍ឈ្មោះជាខ្លាំងក្នុងវិស័យប្រដាល់គុនខ្មែរ ហើយរយៈពេលចុងក្រោយគេឃើញកីឡាកររូបនេះភាគច្រើនប្រកួតជាគូមិត្តភាពអន្តរជាតិរហូត៕

អត្ថបទ៖ នួន ស៊ីណា