មានដំណឹងក្រុមម៉ូដែលផ្ដុំដោយតារាល្បីៗ Cambodia Super Model បែកក្រុម?

2017-04-26 03:07:10
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមតារាម៉ូដែលល្បីឈ្មោះមួយក្រុម គឺក្រុម Cambodia Super Model ដែលមានកញ្ញា ដួង ហ្សូរីដា ជាប្រធាននោះ បានរងព័ត៌មានថា ពួកគេបានបែកបាក់ក្រុមហើយ ក្រោយមួយរយៈចុងក្រោយនេះ ស្ងប់ស្ងាត់សកម្មភាពដែលពីមុនធ្លាប់តែមមាញឹកអត់ស្វាង។

ព័ត៌មាននេះ បានធ្លាយចេញពីតារាប្រុសម្នាក់ ដែលមានអតីតភាពជាសមាជិកក្រុមម៉ូដែលមួយនេះដែរ។ នៅគ្រាមួយដែលក្រុមការងារយើងសាកសួរពីការងាររបស់ពួកគេ តារាប្រុសដែលសុំមិនបញ្ចេញឈ្មោះម្នាក់នោះ អះអាងថា គេមិនមានអ្វីត្រូវនិយាយទៀតទេ ពាក់ព័ន្ធនឹងក្រុមម៉ូដែលនេះ ដោយហេតុថា គេបានចាកចេញ ហើយក្រុមទៀតសោត ក៏បែកខ្ញែកគ្នាដែរ។

“មិនបាច់និយាយអីពីក្រុមហ្នឹងទៀតទេបង បែកគ្នាអស់ហើយ"។ ទន្ទឹមនឹងការបង្ហើបនេះ គេក៏ឃើញថា សមាជិកមួយចំនួន បានចេញមកបើកក្រុមហ៊ុនពិធីការផ្ទាល់ខ្លួនរៀងៗខ្លួន ក្នុងនោះមានដូចជា យ៉ែម សំអូន អេឡិច ច័ន្ទត្រា ជាដើម។ ក្រៅពីនេះទៀតសោត សមាជិកស្រីៗ ខ្លះក៏មានស្វាមីចេញទៅរស់នៅក្រៅប្រទេសរៀងខ្លួនដែរ ដូចជា សារ៉ាយ សក្ខណា លី ម៉ារីណា ជាដើម។

យ៉ាងណាក៏ដោយ ជុំវិញបញ្ហានេះ ត្រូវបានច្រានចោលដោយប្រធានក្រុមរបស់ក្រុមបង្ហាញម៉ូដនេះតែម្ដង។ កញ្ញា ដួង ហ្សូរីដា ប្រាប់ថា ក្រុមរបស់នាង មិនបានបែកបាក់ទេ គឺនៅតែជាក្រុមដដែល។ ប៉ុន្តែ នាងបានទទួលស្គាល់ថា ពួកនាងរយាលការងារខ្លះពិតមែន ដោយសារទី១ការប្រកួតប្រជែង និងទី២ ទំនោររបស់អតិថិជនមានការផ្លាស់ប្ដូរផង។

ក្រុម Cambodia Super Model ក្នុងកម្មវិធី "រាត្រីកតញ្ញូ"

“រឿងបែកបាក់ គឺអត់មានបែកបាក់ផងបង...គ្រាន់តែឥឡូវ...និយាយឲ្យត្រង់ទៅ ឥឡូវគេអត់សូវចង់បានម៉ូដែលចាស់ៗប៉ុន្មានទេបង អីចឹងខ្ញុំច្រើនប្រើតែម៉ូដែលក្មេងៗច្រើនជាង ដល់ម៉ូដែលក្មេងៗ គេអត់សូវស្គាល់ គេថាមកពីក្រុមហ៊ុននេះ ក្រុមហ៊ុននោះអីចឹងទៅ...តែភាគច្រើនការងារម៉ូដែលចេញពីខាងយើងទៅច្រើន គ្រាន់មិនសូវបានបង្ហោះ"។

សមាជិកក្រុម Cambodia Super Model (រូបភាព៖ផ្ដល់ដោយ ហ្សូរីដា)

ក្រៅពីនេះ ហ្សូរីដា នៅបានអះអាងបន្តទៀតថា សម្រាប់ម៉ូដែលចាស់ៗរបស់នាង គឺជ្រើសរើសកម្មវិធីសម្រាប់ចេញមុខ មិនចេញគ្រប់កម្មវិធីទាំងតូចទាំងធំនោះទេ ព្រោះក្រុមរបស់នាងមានចុះបញ្ជីជាក្រុមបង្ហាញម៉ូដត្រឹមត្រូវ។

“ជារួមទៅ ការងារណាតម្លៃថោកពេក ឬភ្ញៀវខ្លះពិបាកទារលុយពេក ក៏ខ្ជិលតែម្ដងទៅ។ ម្យ៉ាងម៉ូដែលយើង មានការងារច្រើនដែរ ជាមួយក្រុមហ៊ុនផ្ទាល់ខ្លួន រវល់ពេក ទើបខ្ជិលបង្ហោះទៅ"។ ហ្សូរីដា បន្ថែម។

ទន្ទឹមនឹងច្រានចោលព័ត៌មានបែកបាក់ក្រុមម៉ូដែល ដួង ហ្សូរីដា បញ្ជាក់ទៀតថា នៅកម្មវិធីរាត្រីកតញ្ញូដែលបានប្រារព្ធកាលពីដើមខែនេះនោះ ម៉ូដែលរបស់ពួកនាង ក៏ចូលរួមទាំងក្រុមដែរ៕

អត្ថបទ៖ ស៊ុនហួត