សីឈិនឡូន នឹងហាត់នៅមីយ៉ាន់ម៉ា២ខែ សង្ឃឹមឈ្នះមេដាយមាសលើកទី២នៅស៊ីហ្គេម

2017-04-28 03:55:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមកីឡាករ សីឈិនឡូនជម្រើសជាតិកម្ពុជា នឹងធ្វើដំណើរទៅហាត់នៅប្រទេសមីយ៉ាន់ម៉ាចំនួន២ខែគិតចាប់ពីដើមខែមិថុនា ដល់ដើមខែសីហា ឆ្នាំ២០១៧ ដើម្បីត្រៀមដណ្ដើមមេដាយមាសជាលើកទី២ក្នុងព្រឹត្តិការណ៍កីឡាស៊ីហ្គេម។

លោក ជាតិ ខេមរា (កណ្ដាល)

ក្រុមកីឡាសីឈិនឡូនកម្ពុជា ធ្លាប់ដណ្ដើមបានមេដាយមាសម្ដងរួចមកហើយកាលពីឆ្នាំ២០១៥ កន្លងទៅពីព្រឹត្តិការណ៍កីឡាស៊ីហ្គេមលើកទី២៨នៅប្រទេសសិង្ហបុរី ។ ដោយឡែកឆ្នាំ២០១៧ព្រឹត្តិការណ៍ដ៏ធំប្រចាំតំបន់មួយនេះ នឹងធ្វើឡើងនៅប្រទេសម៉ាឡេស៊ីចន្លោះពីថ្ងៃទី១៩ ដល់ថ្ងៃទី៣០ ខែសីហា ឆ្នាំ២០១៧។

ទាក់ទងនឹងការចូលរួមប្រកួតព្រឹត្តិការណ៍នេះលោក ជាតិ ខេមរា គ្រូបង្វឹកក្រុមកីឡាសីប៉ាក់តាក្រកម្ពុជាបានឲ្យដឹងថា ក្រុមកីឡាកររបស់លោកទៅហាត់នៅមីយ៉ាន់ម៉ា ដោយសារប្រទេសនោះមានគ្រូល្អៗ ដែលអាចទទួលបានបទពិសោធល្អផងដែរ។ ឆ្នាំនេះក្រុមកីឡាកររបស់លោកនៅតែរំពឹងឈ្នះមេដាយមាស ពីព្រោះការប្រកួតត្រូវតែមានសង្ឃឹម។

ក្រុមកីឡាកររបស់លោក នឹងត្រឡប់ពីប្រទេសមីយ៉ាន់ម៉ាមុនការប្រកួតស៊ីហ្គេមចាប់ផ្ដើមមួយសប្ដាហ៍។ ក្រៅពីមេដាយមាស សីឈិនឡូនកម្ពុជា ក៏ធ្លាប់ឈ្នះមេដាយប្រាក់មួយគ្រឿងផងដែរក្នុងព្រឹត្តិការណ៍ស៊ីហ្គេមកាលពីឆ្នាំ២០១៣ ដែលពេលនេះគឺធ្វើឡើងនៅប្រទេសមីយ៉ាន់ម៉ា។

កម្ពុជាបានបញ្ជូនប្រភេទកីឡាចំនួន ២៨ ទៅចូលរួមព្រឹត្តិការណ៍កីឡាស៊ីហ្គេមឆ្នាំ២០១៧នេះ៕