Brad Pitt និយាយបកស្រាយជុំវិញបញ្ហាលែងលះជាមួយ Angelina

2017-05-05 03:55:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងកិច្ចសម្ភាសន៍ជាមួយទស្សនាវដ្ដី GQ Style ថ្មីៗនេះ តារាសម្ដែង Bradd Pitt ជីកកកាយជុំវិញរឿងបែកបាក់គ្នាជាមួយ Angelina Jolie។

កាលពីខែកញ្ញាឆ្នាំ ២០១៦ តារាសម្ដែងជើងចាស់ Angelina ធ្វើឲ្យហូលីវូដភ្ញាក់ផ្អើលដោយដាក់ពាក្យបណ្ដឹងប្ដឹងលែងលះ Brad Pitt ដោយសារតែបញ្ហាកើតឡើងរវាង Brad និងកូន Maddox នៅលើយន្តហោះ។ តារាម្នាក់នេះត្រូវគេចោទប្រកាន់ថាស្រវឹងស្រា និងប្រើអំពើហិង្សាទៅកាន់កូនរបស់ខ្លួន ប៉ុន្តែក្រោយមកត្រូវគេសន្និដ្ឋានថាមិនបានប្រើអំពើហិង្សាទេ។

សម្រាប់ការសម្ភាសន៍ថ្មីៗជាមួយទស្សនាវដ្ដី GQ លោក Brad Pitt បានសារភាពថាខ្លួនបានផឹកស្រាច្រើនពេក ដែលជាហេតុធ្វើឲ្យមានបញ្ហា។ លោកបានបន្ថែមទៀតថា សព្វថ្ងៃនេះលោកសប្បាយចិត្តដែលខិតខំបន្សាបជាតិពុលក្នុងខ្លួនដែលបណ្ដាលមកការផឹកស្រាជាងកន្លះឆ្នាំហើយ។

"ខ្ញុំមិនបានចាំទេកាលពីខ្ញុំចាកចេញពីថ្នាក់សកលវិទ្យាល័យ មានថ្ងៃខ្លះខ្ញុំមិនផឹកស្រា មិនជក់បារីឫធ្វើអ្វីផ្សេងទៀត ប៉ុន្តែចាប់ពីខ្ញុំរៀបការមកខ្ញុំបញ្ឈប់គ្រប់យ៉ាង លើកលែងតែផឹកស្រា"។ Brad Pitt បន្តថាដូច្នេះ។ ជុំវិញបញ្ហាដែលលោកសោកស្ដាយចំពោះការបែកបាក់គ្រួសារ Brad បាននិយាយទាំងអួលដើមករថា៖ "ខ្ញុំឈ្នះឆ្នោតរង្វាន់ធំ ប៉ុន្តែនៅតែចំណាយពេលជាមួយរបស់អត់ប្រយោជន៍"។

សព្វថ្ងៃនេះបន្ទាប់ពីលែងលះពីតារាល្បី Angelina Jolie រួចមក Brad Pitt បានចំណាយពេលជាមួយអ្នកប្រឹក្សាចិត្តសាស្ត្រចំនួនពីររូប ទើបរកបានអ្នកប្រឹក្សាដែលតារាម្នាក់នេះពេញចិត្ត។ ពេលនេះលោកបានជម្នះការញៀនស្រាហើយ ដែលភេសជ្ជៈដែលលោកចូលចិត្តគឺទឹកក្រូច Cranberry Juice និងទឹកសុទ្ធ។

ម្យ៉ាងវិញទៀតតារារូបនេះបានបញ្ជាក់ថា លោកមិនមែនគ្រាន់តែញៀននឹងគ្រឿងអាល់កុលប៉ុណ្ណោះទេ គឺដោយសារតែរវល់ខ្លាំងពេកក្នុងការថតរឿងផងដែរ ដែលជាហេតុធ្វើឲ្យលោកមិនសូវបានជួបកូនៗ។ បន្ទាប់ពីលែងលះ Brad បានដេកផ្ទះមិត្តភ័ក្ដិខ្លួន៦អាទិត្យ ដោយសារតែពិបាកចិត្តពេកមិនអាចនៅផ្ទះខ្លួនឯងបាន។ ខណៈពេលដែល Angelina ប្ដឹងលែងលះ Brad ត្រូវបានតាមដានដោយ FBI នូវបញ្ហាដែលកើតឡើងលើ Maddox ដែលជាហេតុធ្វើឲ្យលោកមានភាពលំបាកដើម្បីមកជួបកូនៗ។ Brad Pitt បាននិយាយថា លោកនិង Angelina បានធ្វើការជាមួយគ្នា ដើម្បីដោះស្រាយបញ្ហានោះ។ ប៉ុន្តែមកដល់ពេលនេះ លោក Brad Pitt អាចមានសិទ្ធិទៅជួបកូនៗ របស់លោកវិញហើយ ទោះបីជាលែងលះជាមួយ Angelina ក៏ដោយ។ លោកបាននិយាយថាចំពោះពេលនេះអ្វីដែលលោក បារម្ភបំផុតគឺកូនៗ របស់លោក៕