ដើរចូលហាងម៉ូតូ អ្នកលក់អត់អើពើ ចុងក្រោយ ទិញម៉ូតូមួយគ្រឿង តម្លៃជិត២ម៉ឺនដុល្លារ

2017-05-05 06:33:15
ចំនួនមតិ 0 | ចំនួនចែករំលែក 0

ចន្លោះមិនឃើញ

បុរសជនជាតិថៃ វ័យចំណាស់ម្នាក់ មានឈ្មោះថា Lung Decha បានចូលហាងលក់ម៉ូតូ ពីមួយកន្លែងទៅមួយកន្លែងទៀត ដោយក្នុងចិត្តគិតចង់ទិញម៉ូតូមួយគ្រឿង។ ផ្ទុយទៅវិញ ដោយសារតែការស្លៀកពាក់របស់លោក គឺពាក់អាវយឺត ខោជើងវែង និងស្បែកជើងផ្ទាត់ដ៏កង្វក់ បានធ្វើឲ្យអ្នកលក់ភាគច្រើន មិនរវល់អើពើជាមួយលោកឡើយ។

លោក Lung Decha

នៅទីបំផុត លោក Lung បានរកឃើញហាងលក់ម៉ូតូមួយកន្លែង ដែលយកចិត្តទុកដាក់ជាមួយលោកយ៉ាងសមរម្យ ដូចអតិថិជនដទៃអីចឹង។ លោក Lung បានដើរជុំវិញហាងលក់ម៉ូតូនោះ រួចសញ្ជឹងគិតរយៈពេល ១០នាទី។ អ្វីដែលធ្វើឲ្យគ្រប់គ្នាភ្ញាក់ផ្អើលនោះគឺ លោក Lung បានសម្រេចចិត្តទិញយកម៉ូតូ ម៉ាក Harley-Davidson មួយគ្រឿង ដែលមានតម្លៃជាង ១៧ ០០០ដុល្លារ ហើយឲ្យជាប្រាក់សុទ្ធថែមទៀតផង។

លោក Lung Decha ជាមួយម៉ូតូថ្មី

បើយោងតាមប្រភពព័ត៌មាន បានឲ្យដឹងថា លោក Lung គឺជាជាងមេកានិចចូលនិវត្តន៍ម្នាក់ ដែលបានខិតខំធ្វើការពេញមួយជីវិត ហើយបានសម្រេចចិត្តចំណាយប្រាក់ញើសឈាម ទៅលើម៉ូតូក្នុងក្ដីសុបិនរបស់លោក។

យ៉ាងណាមិញ រូបថតជាច្រើនសន្លឹក បង្ហាញឲ្យឃើញលោក Lung និងម៉ូតូថ្មីម៉ាក Harley-Davidson ត្រូវបានបង្ហោះ និងចែកចាយពាសពេញបណ្ដាញសង្គម។ វាគឺជាមេរៀនមួយសម្រាប់ភ្នាក់ងារលក់ ដែលមិនគួរវិនិច្ឆ័យអតិថិជន តែសម្បកក្រៅនោះទេ៕