តារាសម្ដែង ពេជ្រ ខេនឌី បើកហាង "គុនល្បុក្កតោក្លឹប" កក្រើកខេត្តសៀមរាប

2017-05-15 03:34:47
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្មីៗនេះតារាសម្ដែង ពេជ្រ ខេនឌី បានបើកសម្ពោធភោជនីយដ្ឋាន គុនល្បុក្កតោក្លឹប មួយកន្លែងក្នុងខេត្តសៀមរាប ក្នុងនោះក៏មានការអញ្ជើញចូលរួមយ៉ាងខ្ពង់ខ្ពស់ពីគណប្រតិភូខេត្ត និងអ្នកសិល្បៈជាច្រើនរូបផងដែរ។

ពេជ្រ ខេនឌី បានឲ្យដឹងថានាងបើកភោជនីយដ្ឋាន "គុនល្បុក្កតោក្លឹប" នេះឡើងក្នុងគោលបំណងលើកស្ទួយកីឡាក្បាច់គុនបូរាណខ្មែរ (គុនល្បុក្កតោ) ទៅកាន់ភ្ញៀវបរទេសដែលមកទស្សនាទឹកដីអង្គខេត្តសៀមឲ្យបានជ្រាបថាខ្មែរពិតជាមានក្បាច់គុនបូរាណ មិនបានលួចចម្លងពីប្រទេសជិតខាងឡើយ។

ភោជនីយដ្ឋាន "គុនល្បុក្កតោក្លឹប" នេះដែរក្នុងមួយសប្ដាហ៍មានការបង្ហាញជូនក្បាច់គុន ល្បុក្កតោ ២ ថ្ងៃរៀងរាល់ថ្ងៃសុក្រ និងថ្ងៃសៅ ចាប់ពីម៉ោង៧យប់។ ភោជនីយដ្ឋាន "គុនល្បុក្កតោក្លឹប" ក៏មានការប្រកួតជ្រើសរើសជើងឯកប្រចាំខែ ប្រចាំឆ្នាំ ប្រចាំត្រីមាស ដើម្បីជ្រើសរើសយកទៅប្រកួតជម្រើសជើងឯកប្រចាំប្រទេសយកទៅប្រកួតក្រៅប្រទេស។ ពេជ្រ ខេនឌី បន្ថែម។

ពេជ្រ ខេនឌី ថ្លែងថា ៖ “ខ្ញុំបើកភោជនីយដ្ឋាន គុនល្បុក្កតោ មានការជំរុញលើកទឹកចិត្តពីសំណាក់លោកតា សាន គឹមស៊ាន ដែលជាអ្នកចងក្រងក្បាច់គុនបូរាណខ្មែរ គាត់គឺជាជីតារបស់ខ្ញុំ ខ្ញុំចំណាយដើមទុនអស់ ៣០ ម៉ឺនផងដែរក្នុងការបើកភោជនីយដ្ឋាន គុនល្បុក្កតោក្លឹបសព្វថ្ងៃនេះ ភោជនីយដ្ឋាន គុនល្បុក្កតោក្លឹប របស់ខ្ញុំមានសិស្សប្រុសស្រីចំនួន៤០ នាក់" ។

គួរបញ្ជាក់ថា ភោជនីយដ្ឋាន "គុនល្បុក្កតោក្លឹប" នេះមានទទួលបង្រៀនសិស្សដែលមានបំណងចង់រៀនក្បាច់គុនបូរាណខ្មែរតែពុំមានលទ្ធភាពរៀន ភោជនីយដ្ឋាន "គុនល្បុក្កតោក្លឹប" ផ្ដល់ជូនការសិក្សាដោយឥតគិតថ្លៃ។ ចំណែកឯអ្នកដែលពុំមានជីវភាពខ្វះខាតក្នុងមួយខែត្រូវបង់ ១០ ដុល្លារ៕