គួរឲ្យសរសើរ! ម្តាយតស៊ូជម្នះរាប់ពាន់ឧបសគ្គ ចិញ្ចឹមកូនពិការ រហូតបានចូលរៀនសាលាល្បីមួយ

2017-05-18 00:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ត្រីជាម្ដាយនៅក្នុងប្រទេសចិនម្នាក់ បានជួយកូនប្រុសពិការរបស់ខ្លួន ពុះពារជម្នះបញ្ហាជាច្រើននៅក្នុងជីវិតរបស់គេ។ មិនតែប៉ុណ្ណោះ កាលពីពេលថ្មីៗនេះ ស្ត្រីជាម្ដាយដែលហ៊ានលះបង់គ្រប់បែបយ៉ាងរូបនេះ បានជួយឲ្យកូនប្រុស ចូលរៀននៅសកលវិទ្យាល័យដ៏ល្បីឈ្មោះមួយ គឺ Harvard University ទៀតផង។

អ្នកស្រី Zou Hongyan មានកូនប្រុសម្នាក់ឈ្មោះថា Ding Ding ដោយរូបគេស្ទើរតែថប់ដង្ហើមស្លាប់ នៅពេលឆ្លងទន្លេ (ពិបាកកើត) កាលពីឆ្នាំ១៩៨៨។ បើទោះបីជារូបគេអាចរស់រានមានជីវិត ប៉ុន្តែ Ding បានកើតមានជំងឺពិការខួរក្បាល និងរាងកាយ។

លោក Ding និង អ្នកស្រី Zou

ក្រុមគ្រូពេទ្យ នៅក្នុងខេត្ត Hubei បានស្នើឲ្យអ្នកស្រី Zou បោះបង់កូនប្រុសចោល ដោយសារតែរូបគេ នឹងក្លាយជាមនុស្សគ្មានតម្លៃ ព្រោះតែខ្សោយប្រាជ្ញា ឬ ពិការអស់មួយជីវិត។ ជាមួយគ្នានេះដែរ ប្ដីរបស់អ្នកស្រី Zou ក៏បានប្រាប់អ្នកស្រីថា Ding នឹងក្លាយជាបន្ទុកកាន់តែធ្ងន់សម្រាប់គ្រួសារ។ ទោះបីជាយ៉ាងណា អ្នកស្រី Zou នៅតែទទូចរក្សាកូនប្រុស រហូតមិនយូរប៉ុន្មាន ធ្វើឲ្យជីវិតប្ដីប្រពន្ធ ឈានដល់ការលែងលះគ្នា។

ក្នុងនាមជាស្ត្រីមេម៉ាយកូនមួយ អ្នកស្រី Zou ត្រូវបង្ខំចិត្តធ្វើការងារជាច្រើន ដើម្បីទ្រទ្រង់គ្រួសារ និង ព្យាបាលកូនប្រុស។ អ្នកស្រីបានធ្វើការពេញម៉ោង នៅឯមហាវិទ្យាល័យមួយ ក្នុងទីក្រុង Wuhan និងធ្វើការក្រៅម៉ោង ជាអ្នកបង្វឹកពិធីការ (Protocol Trainer) ព្រមទាំងធ្វើជាអ្នកលក់ធានារ៉ាប់រង ទៀតផង។

អ្វីដែលគួរឲ្យស្ញប់ស្ញែងនោះគឺ អ្នកស្រីក៏បានចែកពេលវេលា ដើម្បីនាំកូនប្រុសទៅហ្វឹកហាត់លើកាយសម្បទា ជាទៀតទាត់ ហើយក៏បានរៀនម៉ាស្សាផងដែរ ដូច្នេះអ្នកស្រីអាចម៉ាស្សាឲ្យកូនប្រុសផ្ទាល់តែម្ដង។ មិនតែប៉ុណ្ណោះ អ្នកស្រី Zou ថែមទាំងលេងហ្គេមរំញោចខួរក្បាល និងហ្គេមផ្គុំរូប ជាមួយ Ding ដើម្បីជួយជំរុញប្រាជ្ញាកូនប្រុសឲ្យកាន់តែប្រសើរឡើងផងដែរ។

លើសពីនេះទៅទៀត ម្ដាយដែលខិតខំតស៊ូដើម្បីកូនរូបនេះ ក៏បានធ្វើឲ្យប្រាកដថា កូនប្រុសរបស់អ្នកស្រីបានរៀន ដើម្បីយកឈ្នះពិការភាពរបស់ខ្លួន បានច្រើនទៅតាមសមត្ថភាព ដែលគេអាចធ្វើបានទៀតផង។ ជាក់ស្ដែង Ding មានបញ្ហាលើការធ្វើចលនាដៃ និងមិនអាចចាប់កាន់ចង្កឹះបានឡើយ ដូច្នេះអ្នកស្រី Zou បានបង្រៀនរូបគេ ឲ្យអាចប្រើវាបាន។

អ្នកស្រី Zou បានប្រាប់ឲ្យដឹងថា «ខ្ញុំមិនចង់ឲ្យគេមានអារម្មណ៍ថាខ្មាសអៀន ដោយសារបញ្ហារាងកាយឡើយ... ដោយសារតែគេមានបញ្ហាច្រើនកន្លែង ដូច្នេះខ្ញុំមានការតឹងរឹងណាស់ទៅលើរូបគេ ដើម្បីឲ្យគេខំប្រឹងធ្វើអ្វីមួយដែលលំបាក»។

ស្ថិតក្នុងវ័យ២៩ឆ្នាំ លោក Ding បានដឹងគុណយ៉ាងខ្លាំងចំពោះសេចក្ដីស្រលាញ់ និងការលះបង់របស់ម្ដាយ ដែលបានជួយរូបគេ ឲ្យទទួលបានជោគជ័យ បើទោះបីជាពិការរាងកាយក៏ដោយ។ តាមរយៈការណែនាំពីម្ដាយ លោក Ding បានយកឈ្នះលើបញ្ហាប្រឈមជាច្រើន ហើយថែមទាំងក្លាយជាសិស្សពូកែទៀតផង។

នៅក្នុងឆ្នាំ២០១១ លោក Ding បានបញ្ចប់ការសិក្សាថ្នាក់បរិញ្ញាបត្រ នៅឯសាលាវិទ្យាសាស្ត្រ និងវិស្វកម្មបរិស្ថាន Environmental Science and Engineering School នៃសកលវិទ្យាល័យ Peking University។ បន្ទាប់មក លោកបានបន្តរៀនថ្នាក់អនុបណ្ឌិត នៅឯសាលាច្បាប់ International Law School។ ក្រោយមក លោកបានធ្វើការរយៈពេល២ឆ្នាំ ដើម្បីជួយសម្រួលបន្ទុកម្ដាយ។

លោក Ding បាននិយាយថា «ខ្ញុំមិនដែលហ៊ានដាក់ពាក្យសុំចូលរៀននៅសកលវិទ្យាល័យ Harvard University ទេ ប៉ុន្តែម្ដាយរបស់ខ្ញុំតែងតែលើកទឹកចិត្តខ្ញុំឲ្យសាកល្បង។ រាល់ពេលដែលខ្ញុំស្ទាក់ស្ទើរចិត្ត គាត់តែងតែណែនាំខ្ញុំ»៕

ប្រភព៖ nextshark ប្រែសម្រួល៖ សេង ឡុង