គ្រូចិនសែ ប្រាប់ប៉ុន្មានម៉ាត់ ពេជ្រ អាវីហ្សា ប្រញាប់ធ្វើខួបល្ងាចនេះ

2017-05-18 02:29:06
ចំនួនមតិ 0 | ចំនួនចែករំលែក 0

ចន្លោះមិនឃើញ

កញ្ញា ពេជ្រ អាវីហ្សា ត្រូវបានគ្រូចិនសែ បង្គាប់អោយឲ្យបុណ្យ និងរឿងសំខាន់មួយទៀត គឺត្រូវខួបកំណើតចេញជាដាច់ខាត ក្រោយនាងបានជួបបញ្ហាមួយចំនួនមួយរយៈចុងក្រោយនេះ។

ការបង្គាប់ដូច្នេះ ក្រោយនាងបានទៅពឹងពរគ្រូចិនសែឲ្យគន់គូរមើលពីជោគជតារាសីរបស់នាង ដែលមួយរយៈចុងក្រោយនេះ នាងជួបរឿងមិនល្អច្រើនពេក ក្នុងនោះទី១ នាងបានទទួលរងអំពើហិង្សាពីអតីតសង្សារលើរាងកាយយ៉ាងធ្ងន់ធ្ងរ។ មិនបានប៉ុន្មានផង ក៏ជួបគ្រោះថ្នាក់ចរាចរណ៍យ៉ាងធ្ងន់ធ្ងរទៀត។

ក្រោយគន់គូរ កញ្ញា ពេជ្រ អាវីហ្សា ត្រូវបានគ្រូបង្គាប់អោយធ្វើខួបកំណើតចេញដាច់ខាត និងប្រាប់ទៀតថា ក្រៅពីនេះ គឺត្រូវខិតខំធ្វើបុណ្យឲ្យបានច្រើនផង ដើម្បីកាត់គ្រោះកាចនានា។ ដូច្នេះហើយ ទើប ល្ងាចនេះ នាងនឹងធ្វើតាមបណ្ដាំគ្រូ ដោយធ្វើខួបកំណើតទ្រង់ទ្រាយមធ្យមធំមួយ។

ខួបដែលពេជ្រ អាវីហ្សា ធ្វើនៅល្ងាចនេះគឺ ក្នុងវ័យ២៧ឆ្នាំ ដោយនាងធ្វើប្រហែល៦ទៅ៧តុ នៅហាងមួយជិតផ្សារ សុវណ្ណា។ នាងប្រាប់ថា តាមពិតទៅ ខួបកំណើតរបស់នាង គឺតាំងពីថ្ងៃទី១៦ ខែ ឧសភា ឆ្នាំ ២០១៧ ដោយនៅថ្ងៃនោះនាងបានធ្វើម្ដងរួចមកហើយ គឺយកអំណោយមួយចំនួនទៅចែកក្មេងៗនៅមណ្ឌលកុមារកំព្រា។

ដោយឡែក ការធ្វើលើកទី២នៅថ្ងៃទី១៨ ខែ ឧសភា ឆ្នាំ ២០១៧នេះ នាងចង់ធ្វើឲ្យមានអ្នកសិល្បៈចូលរួម វិញម្ដង និងតាមបណ្ដាំគ្រូចិនសែផង។ តារាស្រីរូបនេះថ្លែងថា គ្រូចិនសែបានឲ្យនាងធ្វើតែតិចតួចទេ ពោលគឺត្រឹមមិត្តភ័ក្ដិស្និទ្ធប៉ុណ្ណោះ។

គូរំលឹកផងដែរថា អាវីហ្សា ត្រូវបានសង្សាររបស់ខ្លួន ដែលត្រូវបានគេស្គាល់ថា ជាសាច់ញាតិឧកញ៉ាមានឥទ្ធិពលម្នាក់វាយឲ្យមានរបួសយ៉ាងធ្ងន់ធ្ងរកាលពីថ្ងៃទី១៣ វិច្ឆិកាកន្លងទៅលើទឹកដី ខេត្ត ព្រះសីហនុ គ្រាដែលនាងនឹងសង្សារទៅកម្សាន្តនៅទីនោះ។

មិនបានប៉ុន្មានផង តារាស្រីរូបនេះបានជួបគ្រោះថ្នាក់ចរាចរណ៍ម្ដងទៀត នៅលើផ្លូវសុធារស ដោយបានបុកគ្នាយ៉ាងពេញទំហឹងជាមួយម៉ូតូមួយគ្រឿងមានគ្នា២នាក់ បើកបរក្នុងទិសដៅបញ្ច្រាសគ្នា។ ហេតុការណ៍នោះ បានកើតឡើងកាលម៉ោង៣រំលងអាធ្រាត្រ ទី១៤ មេសា ឆ្នាំ ២០១៧៕

អត្ថបទ៖ ស៊ុនហួត