ចង់ដឹងទេ តើអ្វីទៅជា "Cyberspace"?

2017-05-19 10:47:10
ចំនួនមតិ 0 | ចំនួនចែករំលែក 0

ចន្លោះមិនឃើញ

សាយប៊ើស្ប៉េស (Cyberspace) គឺជាការប្រើប្រាស់បណ្តាញឌីជីថល ជាមធ្យោបាយទំនាក់ទំនងគ្នា។ សាយប៊ើស្ប៉េស (Cyberspace) ផ្តល់ការកម្សាន្ត ជាកន្លែងដែលពលរដ្ឋអាចទទួលបានការចែករំលែកចំណេះដឹងអំពីបញ្ហាសង្គម ការពង្រីកផលិតផលនិងអាជីវកម្ម និងជាកន្លែងផ្ទុកទិន្នន័យយ៉ាងសម្បូរបែបសម្រាប់បុគ្គល គ្រឹះស្ថានឯកជន និងរដ្ឋ។

ឯកឧត្តម ខៀវ កញារីទ្ធ

ឯកឧត្តម ខៀវ កញារីទ្ធ រដ្ឋមន្ត្រីក្រសួងព័ត៌មាន បានថ្លែងក្នុងសិក្ខាសិលាថា ការប្រើប្រាស់សាយប៊ើស៉្បេស (Cyberspace) ត្រូវមានក្រមសីលធម៍ត្រឹមត្រូវជៀសវាងការយកទៅប្រើប្រាស់ក្នុងផ្លូវអវិជ្ជមាន ជាក់ស្ដែងដូចជាការវាយប្រហារតាមរយៈមេរោគជំរិតទារប្រាក់តាមបណ្ដាញអុឺនធើណិតថ្មីៗនេះ។

លោកថា មានការកើនឡើងការប្រឈមជាច្រើនដូចជាការរំលោភបំពាន មិនត្រឹមត្រូវពីសំណាក់បុគ្គល ឬក្រុមដែលប្រើប្រាស់អ៊ិនធឺណេត ឧក្រិដ្ឋកម្ម ភេរវកម្ម ព័ត៌មានមិនពិត និងបញ្ហាផ្សេងៗដែលទាក់ទងនឹងសន្តិសុខ។

លោក ជី សិលា អគ្គនាយកក្រុមហ៊ុន Sabay ក៏បានបញ្ចេញមតិថា សាយប៊ើស៉្បេស(Cyberspace) សំដៅទៅលើ ការទំនាក់ទំនងសង្គមតាមរយៈប្រព័ន្ធឌីជីថល ដែលយុវជនអាចមានឧកាសនៃការធ្វើជំនួញថ្មី និងអាចបង្កើតការងារតាមរយៈបណ្ដាញអុឺនធើណិតនេះផងដែរ។

លោក ជី សិលា

លោកបណ្ឌិត យន់ គា នាយកប្រតិបត្ដិនៃមជ្ឈមណ្ឌលអភិវឌ្ឍន៍កម្ពុជាបានជំរុញយុវជនស្វែងយល់ស្វែងយល់ពីបច្ចេកវិទ្យាដែលជាប្រភពដ៏មានសក្ដានុភាពសម្រាប់ការអភិវឌ្ឍខ្លួនឯង និងសង្គមជាតិ នាពេលបច្ចុប្បន្ន និងទៅអនាគត»។

«យុវជនទាំងអស់ចាំបាច់ត្រូវតែស្វែងយល់អំពីការប្រើប្រាស់ សាយប៊ើស៉្បេស ដើម្បីទាញយកផលប្រយោជន៍អតិបរមាសម្រាប់ខ្លួនឯង និងសង្គមជាតិ ក៏ដូចជាត្រូវ យល់ដឹងអំពីវិធីជៀសវាងនូវហានិភ័យ និងជម្នះនូវរាល់កត្ដាប្រឈមទាំងឡាយក្នុងការប្រើប្រាស់ សាយប៊ើស៉្បេស»។

សិក្ខាសាលានេះបានប្រព្រឹត្តឡើងនៅថ្ងៃទី ១៩ ខែឧសភា ឆ្នាំ២០១៧ នៅឯមជ្ឈមណ្ឌលសហប្រតិបត្តិការ កម្ពុជា-ជប៉ុន (CJCC)។ សិក្ខាសាលានេះមានគោលបំណងលើកកម្ពស់ការយល់ដឹងក្នុងចំណោមសិស្ស និស្សិត និងសាធារណៈជន ដែលប្រើប្រាស់សាយប៊ើស្ប៉េស (Cyberspace) អំពីផលប្រយោជន៍ បញ្ហាប្រឈម សិទ្ធិ និងទំនួលខុសត្រូវចំពោះមុខច្បាប់ក្នុងការប្រើប្រាស់ប្រព័ន្ធអ៊ិនធឺណេត ក៏ដូចជាការស្វែងរកគំនិត និងគំរូអភិបាលកិច្ចសាយប៊ើស្ប៉េស (Cyberspace) មួយដ៏សមស្របដែលអាចធ្វើអោយអ្នកប្រើប្រាស់ និងគ្រប់ភាគីពាក់ព័ន្ធទាំងអស់ទទួលបានអត្ថប្រយោជន៍អតិបរមាពីការប្រើប្រាស់សាយប៊ើស្ប៉េស (Cyberspace) ដែលព្រមជាមួយគ្នានោះ អាចជៀសវាងការប៉ះពាល់ដល់គោលដៅអភិវឌ្ឍន៍ជាតិរបស់កម្ពុជា។

គោលដៅនៃសិក្ខាសាលានេះគឺដើម្បីលើកកម្ពស់ការយល់ដឹងរបស់យុវជនអំពីឱកាស និងការប្រឈម នៃការប្រើប្រាស់សាយប៊ើស៉្បេស និងការរិះរកដំណោះស្រាយ និងវិធីគ្រប់គ្រងសាយប៊ើស៉្បេស ដែលឆ្លើយតបនឹងតម្រូវការផ្សេងៗរបស់អ្នកពាក់ព័ន្ធទាំងអស់ ក៏ដូចជាសម្រេចគោលដៅអភិវឌ្ឈន៍ជាតិ។

មជ្ឈមណ្ឌលអភិវឌ្ឍន៍កម្ពុជាបានអញ្ជើញវាគ្មិនល្បីៗ និងមានបទពិសោធន៍ខ្ពស់ចំនួន ៧រូប ដែលមានដូចជា៖

១. លោក ពុយ គា ជាអ្នកឆ្លើយឆ្លងសារព័ត៌មាន ក្យូដូជប៉ុន

២. លោក ជី សិលា ជាអគ្គនាយកក្រុមហ៊ុនសប្បាយ

៣. លោក Steven Path ជាអគ្គនាយកក្រុមហ៊ុន Pathmazing និងជាប្រធានសហព័ន្ធព័ត៌មានវិទ្យា និងទូរគមនាគមន៍

៤. ឯកឧត្តម ផុស សុវណ្ណ ជាអគ្គនាយកនៃអគ្គនាយកដ្ឋានព័ត៌មាន និងសោតទស្សន៍ នៃក្រសួងព័ត៌មាន

៥. លោក អ៊ូ ផាន់ណារិទ្ធ ជាប្រធាននាយកដ្ឋាន បច្ចេកវិទ្យាគមនាគមន៍ និងព័ត៌មាន នៃក្រសួងប្រៃសណីយ៍ និងទូរគមនាគន៍

៦. លោក ងួន សុភ័ក្រ្ត ជាសមាជិកសមាគមពាណិជ្ជករវ័យក្មេង និងជានាយកគ្រប់គ្រង SSPD គ្រុប ៧. លោក ស្រ៊ាង បូរមី ជានាយកគ្រប់គ្រងវីឌូស៊ែរ

មជ្ឈមណ្ឌលអភិវឌ្ឍន៍កម្ពុជាគឺជាអង្គការមិនមែនរដ្ឋាភិបាល និងជាស្ថាប័នឯករាជ្យមិនរកប្រាក់ចំណូលមួយ ដែលមានបំណងជួយដល់ការសម្រេចអោយបាននូវគោលដៅអភិវឌ្ឍន៍ជាតិ នៃព្រះរាជាណាចក្រកម្ពុជា។ មជ្ឈមណ្ឌលអភិវឌ្ឍន៍កម្ពុជានឹងប្រមូលផ្តុំធនធាន និងគ្រប់ភាគីពាក់ព័ន្ធដើម្បីរួមចំណែកដល់ការអភិវឌ្ឍន៍ជាតិតាមរយៈ ការរៀបចំការស្រាវជ្រាវ និងគម្រោង ការផ្តល់ជាកម្មវិធី និងវេទិកាសំរាប់កិច្ចសន្ទនាគោលនយោបាយ ការបណ្តុះបណ្តាលជំនាញ ការបង្កើតនិងផ្សព្វផ្សាយចំណេះដឹង និងគុណតម្លៃ៕