មូលហេតុ ៥យ៉ាងនេះសោះ បានជាអ្នកជំពាក់លុយគេធ្វើមុខក្រាស់មិនព្រមសង

2017-05-26 04:39:05
ចំនួនមតិ 0 | ចំនួនចែករំលែក 0

ចន្លោះមិនឃើញ

ការរាប់អានគ្នា គឺជៀសមិនផុតរឿងខ្ចីលុយកាក់គ្នាទៅវិញទៅមក ហើយក៏ជារឿងក្ដៅគគុកមួយ ដែលបង្កឱ្យមានទំនាស់ពាក្យសម្ដី ដល់ថ្នាក់ប្រើហិង្សាក៏មាន ដោយសាររឿងលុយនេះ។ មនុស្សខ្លះជំពាក់លុយគេរាប់ខែរាប់ឆ្នាំមិនព្រមសង តើមកពីមូលហេតុអ្វី? ខាងក្រោមនេះ ជាការលើកឡើងរបស់យុវវ័យមួយចំនួន ទាក់ទងនឹងមូលហេតុទាំង ៥យ៉ាងដែលអ្នកជំពាក់លុយគេ មិនព្រមសង។

១. គិតថាអ្នកជំពាក់មិនទាន់ចង់ទារ

រមនា អ្នកឧស្សាហ៍ឱ្យលុយគេខ្ចីម្នាក់លើកឡើងថា អ្នកដែលជំពាក់លុយគេហើយ ធ្វើព្រងើយនោះ មកពីគិតថា ម្ចាស់បំណុលមិនទាន់ចង់ទារក៏ចេះតែហីៗទៅ ប៉ន្តែមិនដឹងថា អ្នកឱ្យគេខ្ចីនោះទន្ទឹងចាំលុយ ដែលឱ្យគេខ្ចីនោះទេ។ រមនា និយាយថា៖ "ចា.. បងខ្ញុំគិតថា ចឹងអាងតែគេមិនទារ ចេះតែមិនព្រមសង ហើយខ្ញុំសូមផ្ដាំទៅអ្នកជំពាក់លុយគេទាំងឡាយ អាសូរចិត្តអ្នកកំពុងរង់ចាំផង"។

២. មានអារម្មណ៍ស្ដាយលុយមិនហ៊ានប្រឡេះ

រមនា ដដែលបន្តទៀតថា មនុស្សខ្លះមានលុយ តែមិនចង់សង នៅមានចិត្តអាឡោះអាល័យស្ដាយលុយ មិនហ៊ានប្រឡេះនោះទេ តែមិនបានគិតថា មុនពេលគេឱ្យខ្ចីលុយ ក៏គេអាឡោះអាល័យលុយដែរ តែមកពីគិតថា មិត្តភក្ដិទើបគេឱ្យខ្ចី។ ដូច្នេះហើយ ដើម្បីរក្សាមិត្តភាព បានយូរអង្វែងមានលុយហើយប្រញាប់ រួសរាន់ទៅសងគេទៅ កុំចេះតែទុកលុយ មិនព្រមសង ព្រោះថ្ងៃណាមួយលុយនោះ នឹងចាយអស់ ហើយនៅតែបន្តជំពាក់រហូត មិនដឹងថ្ងៃណាសង។

៣. មានចេតនាធ្វើភ្លេច

ចំណែកសុខហេង និស្សិតទើបតែបញ្ចប់ការសិក្សាថ្នាក់បរិញ្ញាបត្រអក្សរសាស្ត្រអង់គ្លេស វិញលើកឡើងថា៖ ចំពោះខ្ញុំវិញ គិតថា អាចមកពីអ្នកជំពាក់គេ មានចេតនាធ្វើភ្លេចតែម្ដង ប៉ុន្តែមិនមែនមិនដឹងថា ជំពាក់លុយគេនោះទេដល់តែពេលម្ចាស់បំណុលទារ តាំងនិយាយថា អូហ៍ ភ្លេចឱ្យឈឹង។ សុខហេងបន្តទៀតថា មិនចាំបាច់ធ្វើបែបនេះទេ គួរតែរក្សាភាពថ្លៃថ្នូររបស់ខ្លួន ប្រយ័ត្នថ្ងៃក្រោយគ្មានអ្នកណាហ៊ានឱ្យលុយខ្ចីទៅ។

៤. គិតថាយកលុយទៅប្រើការអ្វីចាំបាច់សិន

មកដល់ចំណុចនេះ សុខហេង ដដែលលើកឡើងថា មូលហេតុដែលអ្នកជំពាក់លុយមិនព្រមសង គឺចង់យកលុយទៅប្រើការអ្វីផ្សេងសិន គិតថាចាំបាច់ជាងរឿងសងលុយគេ។ សុខហេងនិយាយទៀតថា បើគិតបែបនេះគឺខុសហើយ ព្រោះជំពាក់លុយគេនេះមិនមែនជារឿងលេងសើចទេ គឺពាក់ព័ន្ធនឹងកិត្តិយសតែម្ដង ម្ចាស់បំណុលគេនឹងវាយតម្លៃអ្នកជំពាក់ថា ជាមនុស្សបែបនេះបែបនោះ។ សុខហេងនិយាយថា៖ "ចំណុចអ្នកជំពាក់លុយគេទាំងឡាយ តោងត្រិះរិះពិចារណា ព្រោះយើងមានបេះដូង មានការឈឺចាប់កុំឱ្យគេដៀលអី"។

៥. គិតថាមិត្តភក្ដិជិតស្និទ្ធថ្ងៃណាសងក៏បាន

ចំពោះចិន្ដា និស្សិតសាកលវិទ្យាល័យបៀលប្រាយ វិញលើកឡើងថា នេះគឺជាមូលហេតុចម្បងមួយដែរ គឺអ្នកជំពាក់លុយទាំងនោះ គិតថាមិត្តភក្ដិជិតស្និទ្ធថ្ងៃណាសងក៏បាន មិនជាបញ្ហាអ្វីទេ។ ចិន្ដា បន្តថា ការគិតបែបនេះគឺខុសស្រឡះតែម្ដង រឿងមិត្តភាព គឺមិត្តភាព តែរឿងលុយកាក់ជារឿងដោយឡែក មានមនុស្សជាច្រើនណាស់ ដែលបែកបាក់មិត្តភាព ដោយសាររឿងលុយកាក់នេះឯង៕

អត្ថបទ៖ វឌ្ឍនៈ