ធនាគារធំទី ៣ របស់ជប៉ុនឈានជើងមកកាន់ទីផ្សារកម្ពុជា

2017-05-28 04:57:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ធនាគារធំលំដាប់ទី ៣ របស់ប្រទេសជប៉ុនមីហ្ស៊ូហូ បានឈានជើងមកកាន់ទីផ្សារកម្ពុជាហើយដែលនេះជាធនាគាររបស់ជប៉ុនទី៣ដែលបានមកវិនិយោគនៅកម្ពុជា។

ធនាគារ MIZUHO បានទទួលអាជ្ញាប័ណ្ណពីធនាគារជាតិនៃកម្ពុជា កាលពីខែកុម្ភៈកន្លងមកនិងបើកការិយាល័យផ្លូវការនៅកម្ពុជាក្នុងកំឡុងខែឧសភានេះ។ ធនាគារនេះមានសាខាចំនួន៥៤៩នៅទូទាំងពិភពលោក និងមានទីតាំងនៅប្រទេសចំនួន៨ក្នុងចំណោមប្រទេស១០ក្នុងសហគមន៍សេដ្ឋកិច្ចអាស៊ាន។

លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដាភីអ៊ិលស៊ីបានថ្លែងឲ្យដឹងតាមទូរស័ព្ទនាល្ងាចថ្ងៃទី២៦ ឧសភានេះថាតាមធម្មតាធនាគារធំបែបនេះ មុនសម្រេចចិត្តមកកាន់ប្រទេសណាមួយ ពួកគេសម្លឹងមើលសក្តានុពលរបស់ប្រទេសកម្ពុជារួចទៅហើយ ទាក់ទងនឹងស្ថិរភាពនយោបាយ ស្ថិរភាពសង្គម និងកំនើនសេដ្ឋកិច្ច ព្រមទាំងច្បាប់វិនិយោគនិងរបបពន្ឋនៃប្រទេសនេះ។

លោកបន្តថា “យើងស្វាគមន៍ធនាគារនេះ ព្រោះវត្តមានធនាគារនេះនឹងជាការបំពេញឲ្យគ្នាទៅវិញទៅមក ព្រោះពេលមកបើកនៅកម្ពុជា ពួកគេមិនមានសាខានៅតាមខេត្តនោះទេ ដូច្នេះពេលត្រូវការផ្ទេរឬទូទាត់សាច់ប្រាក់ទៅខេត្តពួកគេនឹងប្រើប្រាស់ធនាគារក្នុងស្រុក”។លោកបន្តថា “លើសពីនេះនៅពេលធនាគារក្នុងស្រុកនៅសល់ផលបត្រប្រើប្រាស់មិនអស់ពួកគេក៏អាចយកទៅផ្ញើរនៅធនាគារបរទេសផងដែរ។នេះជាអ្វីដែលជាការបំពេញឲ្យគ្នាទៅវិញទៅមក”។

លោក អ៊ិន ចាន់នី បានបន្តថា ការប្រកួតប្រជែងបច្ចុប្បន្នធ្វើឡើងតាមបែបសហប្រតិបត្តិការគ្នា និងបំរើអតិថិជនគោលដៅរៀងៗខ្លួន។

សេដ្ឋវិទូកម្ពុជាក៏រីករាយ និងសម្តែងការស្វាគមន៍វត្តមានធនាគារមីហ្ស៊ូហូនៅកម្ពុជាផងដែរ។

លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិបានថ្លែងថា វាជារឿងល្អសម្រាប់ប្រទេសយើងដែលមានវត្តមានធនាគារនេះ ព្រោះវានឹងជួយឲ្យការធ្វើពាណិជ្ជកម្ម រវាងប្រទេសទាំងពីរកាន់តែប្រសើរឡើងនិងទាក់ទាញអ្នកវិនិយោគជប៉ុនថ្មីៗមកកាន់កម្ពុជា ព្រមទាំងឆ្លុះបញ្ចាំងពីស្ថិរភាពនយោបាយរបស់កម្ពុជា។លោកបន្តថា ជប៉ុនមានសុភាសិតមួយគឺមុនពេលឆ្លងស្ពានពួកគេតែងតែស្ទាបបង្កាន់ដៃស្ពានជាមុនសិន ពេលស្ទាបហើយ ជួនកាលពួកគេមិនឆ្លងនោះទេដូច្នេះពេលដែលធនាគារធំបែបនេះចូលមកកម្ពុជា មានន័យថាគេទុកចិត្តពីស្ថានភាពនយោបាយ សង្គម និងសេដ្ឋកិច្ចកម្ពុជាហើយ។

លោកបន្តថា “ធនាគារច្រើនឬតិចនៅកម្ពុជា ជាការពិបាកនិយាយ ប៉ុន្តែយើងត្រូវគិតពីការផ្តល់ឥណទានរបស់ពួកគេវិញថា តើទំហំឥណទានដែលបានផ្តល់ធៀបនឹងផលទុនជាតិសរុបមានប៉ុន្មានភាគរយហើយ ខណៈដែលធនាគារជាតិនៃកម្ពុជា ក៏កំពុងគ្រប់គ្រងឥណទានកុំឲ្យមានកំនើនខ្ពស់ពេកផងដែរ”៕

អត្ថបទ៖ Rasmeinews