ខ្ញីចាស់នៅអ៊ីតាលី ថា Real Madrid ខ្លាំង ដោយសារតែ Isco ជួយ

2017-05-30 03:47:36
ចំនួនមតិ 0 | ចំនួនចែករំលែក 0

ចន្លោះមិនឃើញ

Giorgio Chiellini ថាក្រុម Real Madrid អាចឡើងមកដល់វគ្គនេះ ហើយក្រុមមានទម្រង់លេងល្អគឺដោយសារតែមាន Isco ជាអ្នកជ្រោមជ្រែងមួយរយៈចុងក្រោយ ពេលប៉ះក្រុមខ្លាំងៗ។

Isco បានក្លាយជា Key player ម្នាក់សម្រាប់ក្រុម Real Madrid ក្នុងប៉ុន្មានប្រកួតមកនេះ ដោយរូបគេបានបម្រើដល់តំបន់ប្រយុទ្ធបានច្រើន។ អ្វីដែលកាន់តែពិសេសទៀត អវត្តមានរបស់ Gareth Bale បានធ្វើឱ្យរូបគេមានឱកាសបញ្ចេញសមត្ថភាពទាំងបច្ចេកទេសញាក់បាល់ ការបញ្ជូនបាល់ និងការដណ្ដើមបាល់ពីដៃគូពិតជាសក្ដិសមសម្រាប់ជាប់ជម្រើស១១នាក់ក្នុងប្រកួតធំៗណាស់។

ដោយមើលឃើញដូចគ្នា Chiellini ខ្សែការពារបទពិសោធពេញខ្លួនបានដាស់តឿនក្រុម Juventus មិនត្រូវមើលស្រាលសមត្ថភាពរបស់ Real Madrid នោះទេ ព្រោះពួកគេមានយុទ្ធសាស្ត្រអាចកែប្រែការប្រកួតបានទាំងអស់។ កីឡាករវ័យ៣២ឆ្នាំបានបន្ដថា៖ “Isco ជាកត្តាមួយដែលជួយ Real បានច្រើនប៉ុន្មានខែមកនេះ។ គាត់ពិតជាមិនអាចមើលស្រាលបានទេ។ ពួកគេបានធ្វើរឿងមិនគួរឱ្យជឿជាច្រើនមកហើយ ដូចដែលយើងបានឃើញកាលប៉ះ Bayern Munich ”។

Chiellini ជាខ្សែការពារដែលមិនអាចខ្វះបានម្នាក់ទាំងក្រុម Juventus និងជម្រើសជាតិអ៊ីតាលី។ ទោះជាវ័យច្រើនបន្តិចមែន ប៉ុន្តែសមត្ថភាពរបស់កីឡាករដែលធ្លាប់ឈ្នះពានខ្សែការពារល្អជាងនៅអ៊ីតាលីរូបនេះនៅតែរក្សាបានទម្រង់ល្អមួយបានដដែល។ ដោយកាលដែល Juventus ចាញ់ក្រុម Barcelona នៅវគ្គផ្ដាច់ព្រ័ត្រកាលពីឆ្នាំ២០១៥នោះ រូបគេមិនបានចូលលេងទេ ដោយសារគ្រានោះមានរបួស៕

ប្រភព៖ Marca ប្រែសម្រួល៖ មុន្នីរម្យ