កូរ៉េខាងត្បូង ទម្លាក់កញ្ចប់ថវិកា ១០ពាន់លានដុល្លារ លើផ្នែកសុខុមាលភាព

2017-06-05 08:58:24
ចំនួនមតិ 0 | ចំនួនចែករំលែក 0

ចន្លោះមិនឃើញ

រដ្ឋាភិបាលថ្មីកូរ៉េខាងត្បូង នៅថ្ងៃទី០៥ មិថុនានេះ បានប្រកាសថា នឹងប្រើប្រាស់កញ្ចប់ថវិកាពន្ធប្រមាណ ១០ពាន់លានដុល្លារ ដើម្បីបង្កើនការឧបត្ថម្ភធនលើផ្នែកសុខុមាលភាពសង្គម និងចាប់ផ្ដើមអនុវត្តតាមការសន្យារបស់ប្រធានាធិបតី Moon Jae-in ដោយបង្កើតការងារចំនួន ៨១ម៉ឺន ក្នុងវិស័យរដ្ឋ។

លោក Moon Jae-in

ប៉ុន្តែបក្សកាន់អំណាចរបស់ប្រធានាធិបតី Moon Jae-in កំពុងប្រឈមមុខនឹងការអនុម័តកញ្ចប់ថវិកាបន្ថែមនេះ ដោយបក្សនេះ មានតែ ៤០%ប៉ុណ្ណោះ នៃអាសនៈសភាសរុបចំនួន ២៩៩អាសនៈ។ បក្សរបស់ប្រធានាធិបតី Moon Jae-in ត្រូវការសំឡេងគាំទ្រជាង ៣០ទៀត ទើបអាចអនុម័តកញ្ចប់ថវិកាបន្ថែមនេះបាន។

ចំណែកបក្សអភិរក្សនិយមទាំង ២បក្ស បានលើកឡើងថា ការបង្កើនការចំណាយលើផ្នែកសុខុមាលភាព អាចនឹងធ្វើឲ្យគ្មាននិរន្តរភាព ដែលនេះនឹងធ្វើឲ្យគម្រោងបន្ថែមកញ្ចប់ថវិការបស់ប្រធានាធិបតី Moon Jae-in មិនអាចអនុម័តបាន។

បើតាមក្រសួងហិរញ្ញវត្ថុកូរ៉េខាងត្បូង កញ្ចប់ថវិកា ៤៨០លានដុល្លារ នឹងត្រូវប្រើប្រាស់ដើម្បីការងារក្នុងវិស័យរដ្ឋ និងសេវាសង្គម ដែលរួមមានកន្លែងស្នាក់នៅសម្រាប់អ្នកពន្លត់អគ្គិភ័យ គ្រូបង្រៀន និងកម្មករប្រៃសណីយ៍។

តាមរយៈកញ្ចប់ថវិកាបន្ថែមនេះ រដ្ឋាភិបាលកូរ៉េខាងត្បូងរំពឹងថា វានឹងក្លាយជាផ្នែកមួយ ដែលអាចជួយបង្កើនកំណើនបានសេដ្ឋកិច្ច ០,២% នៅឆ្នាំ២០១៧៕

អត្ថបទ៖ សេង ឡុង