កាតា បង់ប្រាក់លោះ ១ពាន់លានដុល្លារដើម្បីដោះដូរសមាជិករាជវង្សដែលចាប់ខ្លួនពេលចូលប្រមាញ់សត្វ

2017-06-06 08:02:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ការបង់ប្រាក់លោះរបស់ប្រទេសកាតា បានកើនឡើងដល់ ១ពាន់លានដុល្លារអាមេរិក ទៅឲ្យកងកម្លាំងនៅអ៊ីរ៉ង់ និងកងកម្លាំងភេរវកបណ្ដាញអាល់កៃដា ក្នុងប្រទេសស៊ីរី ដើម្បីជាថ្នូរនឹងការដោះលែងមនុស្សច្រើននាក់។

ប្រាក់លោះដ៏ច្រើនសម្បើមនេះ គឺសម្រាប់ធានាឲ្យដោះលែងមនុស្សចំនួន ២៦នាក់ដែលជាសមាជិកគណបក្ស Qatari Falconry Party និងខ្លះជាសមាជិកគ្រួសាររាជវង្សរបស់ស្ដេចប្រទេសកាតា ផងដែរ ដែលត្រូវគេចាប់ខ្លួន ពេលចូលទៅប្រមាញ់សត្វស្ទាំងជាការកម្សាន្តនៅភាគខាងត្បូង ប្រទេសអ៊ីរ៉ាក់។

ដំណឹងពាក់ព័ន្ធនឹងប្រាក់លោះដ៏មហាសាលខាងលើ គឺកើតឡើងមួយថ្ងៃ បន្ទាប់ពីប្រទេសអារ៉ាប៊ីសាអ៊ូឌីត អេហ្ស៊ីប អារ៉ាប់រួម បារ៉ែន យេមែន និងមេដឹកនាំយោធាដ៏មានអំណាចប្រទេសលីប៊ីម្នាក់ បានផ្ដាច់ទំនាក់ទំនងជាមួយប្រទេសកាតា កាលពីថ្ងៃច័ន្ទម្សិលមិញ ក្រោយចោទថា កាតា បានគាំទ្រក្រុមភេរវករួមមាន ISIS, Al Qaeda, Muslim Brotherhood និងជួយផ្សព្វផ្សាយលើកទឹកចិត្តក្រុមទាំងនេះនៅលើសារព័ត៌មានជាប្រចាំ។

បើតាមប្រភព Finacial Times ទឹកប្រាក់ប្រមាណ ៧០០លានដុល្លារនឹងប្រគល់ទៅឲ្យមេខ្លោងនៅអ៊ីរ៉ង់ និងក្រុមយោធា Shia militias ឯប្រមាណ ៣០០លានដុល្លារទៀតនឹងបញ្ជូនទៅឲ្យក្រុមឥស្លាមជ្រុលនិយមនៅស៊ីរី។ ទោះយ៉ាងណា កាលបរិច្ឆេទនៃកិច្ចព្រមព្រៀងដូរដោះគេមិនទាន់ដឹងនៅឡើយទេ៕