គ្រូសីប៉ាក់តាក្រកម្ពុជាព្រួយបារម្ភ ខណៈក្រុមនារីត្រូវរំសាយ

2017-06-08 07:40:06
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្រូបង្វឹកជម្រើសជាតិកីឡាសីប៉ាក់តាក្រ និងសីឈិនឡូនកម្ពុជា លោក ជាតិ ខេមរ៉ា បានសម្តែងការព្រួយបារម្ភ បន្ទាប់ពីក្រុមកីឡានារីត្រូវបានប្រកាសរំសាយ នាពេលថ្មីៗនេះ ដែលជាហេតុធ្វើឲ្យមានការពិបាក ប្រសិនបើមានព្រឹត្តិការណ៍អន្តរជាតិបន្ទាន់ណាមួយកើតឡើង។

«ពិបាកដែរ ពេលដែលក្រុមនារីប្រកាសរំសាយ ព្រោះយើងមិនងាយប្រមូលផ្តុំហ្វឹកហាត់ឡើយ ហើយបើនិយាយពីអត្តពលិកថ្នាលវិញ យើងជ្រើសរើសបានមែន តែមិនប្រាកដថា ហ្វឹកហាត់ត្រឹមរយៈពេល២ទៅ៣ឆ្នាំ ពួកគេអាចធ្វើបានល្អ ដូចក្រុមកីឡានារីជើងចាស់ដែរ»។ លោក ជាតិ ខេមរ៉ាបានលើកឡើង។

តាមពិតទៅព្រឹត្តិការណ៍កីឡាស៊ីហ្គេម លើកទី២៩ នៅប្រទេសម៉ាឡេស៊ី ខាងមុខនេះមិនបានដាក់បញ្ចូលវិញ្ញាសាកីឡាសីឈិនឡូន ផ្នែកនារីឡើយទើបកម្ពុជាសម្រេចរំសាយក្រុមនារីចោល ដោយទុកតែក្រុមបុរសឲ្យធ្វើការហ្វឹកហាត់ និងចូលរួមប្រកួតតែម្តងទៅ។

យ៉ាងណាក៏ដោយ លោក ជាតិ ខេមរ៉ា បានបញ្ជាក់ថា ការរំសាយក្រុមនារីនេះ គឺមិនមានន័យថា សហព័ន្ធនឹងលុបបំបាត់ផ្នែកនារីមិនឲ្យចូលរួមប្រកួតរហូតនោះទេ គឺមិនមានការប្រមូលផ្តុំហ្វឹកហាត់ក្នុងមួយរយៈប៉ុណ្ណោះ ដោយសារការប្រកួតតម្រូវឲ្យមានតែផ្នែកបុរស។ ប៉ុន្តែលោកនៅតែបង្ហាញពីក្តីកង្វល់ដដែល ពីព្រោះការប្រកាសរំសាយបែបនេះ វាហាក់ដូចជាពិបាក បើសិនជា កម្ពុជាត្រូវបានអញ្ជើញឲ្យចូលរួមប្រកួតក្នុងព្រឹត្តិការណ៍អន្តរជាតិណាមួយ។ មួយវិញទៀតបើសហព័ន្ធនៅតែធ្វើការប្រមូលផ្តុំ ក្រុមនារីនៅតែហ្វឹកហាត់ដដែលនោះកម្ពុជាចំណេញច្រើនទៅលើកម្រិតបច្ចេកទេស។

សូមបញ្ជាក់ថា មកដល់សព្វថ្ងៃនេះសហព័ន្ធកីឡាស៊ីដក់កម្ពុជា មានអត្តពលិកជម្រើសជាតិចំនួន១៦នាក់ក្នុងនោះកីឡាករ៨នាក់ និងកីឡាការិនី៨នាក់ដូចគ្នា។ ក្រុមកីឡាសីប៉ាក់តាក្រកម្ពុជាទាំងផ្នែកបុរស និងនារីធ្លាប់ធ្វើឲ្យទង់ជាតិកម្ពុជាអណ្តែតឡើងលើឆាកអន្តរជាតិក្នុងនោះឆ្នាំ២០១៥នៅព្រឹត្តិការណ៍កីឡាស៊ីហ្គេម លើកទី២៨នៅប្រទេសសឹង្ហបុរី ក្រុមបុរសឈ្នះមេដាយមាស១គ្រឿង៕