ចង់ត្រឡប់ទៅកាន់កុមារភាពរបស់អ្នកវិញដែរឬទេ? តោះ! ចូលរួមកម្មវិធី « កាលយើងនៅក្មេង »

2017-06-09 07:29:25
ចំនួនមតិ 0 | ចំនួនចែករំលែក 0

ចន្លោះមិនឃើញ

តើអ្នកកំពុងតែនឹកកុមារភាពរបស់អ្នកមែនទេ? ហើយអ្នកធ្លាប់នឹកស្រមៃចង់ត្រឡប់ទៅកាន់កុមារភាពរបស់អ្នកវិញដែរឬទេ? កុំបារម្ភ! ក្ដីស្រមៃរបស់អ្នកនឹងក្លាយទៅជាការពិត!

ឱកាសដ៏ពិសេសកម្របំផុត ដើម្បីវិលត្រឡប់ទៅរកកុមារភាពដ៏រីករាយរបស់អ្នកវិញ ឥឡូវនេះ បានមកដល់ហើយ នោះគឺព្រឹត្តិការណ៍ «កាលយើងនៅក្មេង» ដែលរៀបចំឡើងដោយក្រុម «ទាយាទអង្គរ»។ ក្រុមនេះ ជាក្រុមសិស្ស-និស្សិតដែលរួបរួមគ្នាធ្វើការងារសង្គម “ដើម្បីវិវឌ្ឍភាពនៃប្រជាជាតិខ្មែរ” ដោយផ្ដោតសំខាន់ចម្បងលើ “វប្បធម៌ជាតិខ្មែរដែលកំពុងតែសាបសូន្យ និង ការអប់រំ” តាមរយៈ ការផលិតឯកសារ ការដឹងគុណ និង ការបង្កើតអនុស្សាវរីយ៍។

ព្រឹត្តិការណ៍ "កាលយើងនៅក្មេង" គឺជាគម្រោងថ្មីដ៏ប្លែករបស់ក្រុម «ទាយាទអង្គរ» ដែលមិនធ្លាប់មានពីមុនមក។ ព្រឹត្តិការណ៍នេះ មានទស្សនវិស័យដ៏សំខាន់មួយគឺ “ដើម្បីលើកស្ទួយព្រះវិហារបុរាណរបស់ខ្មែរដែលជាបេតិកភណ្ឌជាតិដែលកំពុងតែសាបសូន្យ” ដោយផ្សារភ្ជាប់ការកម្សាន្ត សប្បុរិសធម៌ ការលើកស្ទួយវប្បធម៌ជាតិ-វិស័យអប់រំ និង ការបំផុសគំនិតទេសចរណ៍សហគមន៍។

នៅក្នុងព្រឹត្តិការណ៍ “កាលយើងនៅក្មេង” មានកម្មវិធីពិសេសៗជាច្រើនដូចជា៖

១. គោរពទង់ជាតិ និង ភ្លេងជាតិខ្មែរ បទនគររាជ។

២. លេង ល្បែងកាលនៅក្មេង និង ល្បែងប្រជាប្រិយ ក្នុងមួយថ្ងៃ ១៨ មុខ។

៣. សរសេររឿងរ៉ាវ អនុស្សាវរីយ៍ និង បទពិសោធន៍កាលនៅក្មេង នៅលើ ខ្លោងទ្វាររឿង ។

៤. កូនទំពាំងពិសិដ្ឋ៖ ជាកូនបណ្ណាល័យតូចមួយ ដែលឱកាសឲ្យអ្នកចូលរួមក្លាយជាគ្រូរបស់ក្មេងៗមួយថ្ងៃដូចជា៖ ការអានសៀវភៅឲ្យក្មេងៗស្ដាប់ បង្រៀនក្មេងៗ ។ល។ ទីនេះក៏បំផុសគំនិត៖ កុមារម្នាក់ អ្នកចូលរួមម្នាក់ សំរាមមួយថង់ ផងដែរ។

៥. ហត្ថកម្ម៖ បត់រូបផ្សេងៗអំពីក្រដាស-ស្លឹកត្នោត-ស្លឹកដូង រៀនចាក់ចេក រៀនបត់ឈូកថ្វាយព្រះ និង រៀនដោតភួងម្លិះថ្វាយចំពោះព្រះឆាយាល័ក្ខណ៍ព្រះមហាក្សត្រិយានី (អបអរព្រះរាជពិធីបុណ្យចម្រើនព្រះជន្ម សម្ដេចព្រះមហាក្សត្រិយានី សម្ដេចយាយ)។

៦. ពិព័រណ៍វត្តបុរាណ៖ បង្ហាញលក្ខណៈវត្ត និងព្រះវិហារបុរាណខ្មែរ-សាស្ត្រាស្លឹករឹត-គំនូរសាស្ត្រាល្បែង

៧. ជិះរទេះគោទៅទស្សនាព្រះវិហារបុរាណ ៣ ទៀតនៅក្នុងភូមិ ដូចជា វត្តមជ្ឈិមវ័ន វត្តមុនីសាគរ និង វត្តវិចិត្តារាម-ផ្ទះបុរាណខ្មែរ-សិប្បកម្មតម្បាញក្រមា។

៨. ដើរភ្លក្សអាហារ និង ទិញរបស់របរកាលនៅក្មេង ៩. រៀនធ្វើ ចង្កៀង និង គោមផ្កាយនិស្ស័យ

១០. វេទិកាកុមារ៖ ការបង្ហាញម៉ូដកុមារ នារីសប្បុរស និង ទស្សនីយភាពដោយកុមារៗដែលមានទេពកោសល្យ។

១១. រាត្រីចាប៉ីដងវែង-ភ្លេងបុរាណខ្មែរ

១២. ក្បួនថ្វាយភួងម្លិះចំពោះព្រះឆាយាល័ក្ខណ៍ ដើម្បីអបអរព្រះរាជពិធីបុណ្យចម្រើនព្រះជន្ម នៅថ្ងៃចម្រើនព្រះជន្ម។

១៣. នារីសប្បុរស-រំដួលលិចទឹក៖ កញ្ញារំដួលលិចទឹកលក់បាយឡុកបាយឡ និង ការស្វែងរកសប្បុរិសធម៌ជួយកុមារ និង ចាស់ជរាទុរគតក្នុងភូមិ។ យើងក៏បំផុសផងដែរនូវកុសលដែលអ្នកចូលរួមបានសម្អាតវត្តអារាម ព្រះវិហារបុរាណរួមគ្នាផងដែរ។

១៤. ល្បែងបេសកកម្ម៖ បេសកកម្មដែលអ្នកចូលរួមត្រូវធ្វើទាក់ទងនឹងព្រឹត្តិការណ៍។

១៥. អ្នកចូលរួមនឹងទទួលបាននូវ ផែនទីទេសចរណ៍ ម្នាក់មួយផ្ទាំង ដែលតម្រូវឲ្យចូលរួមគ្រប់សកម្មភាពរបស់ព្រឹត្តិការណ៍ ដើម្បីទទួលបានត្រា ដែលមានឱកាសទទួលបាន តុក្កតាអាថ៌កំបាំង - និមិត្តរូបរបស់ព្រឹត្តិការណ៍។

ព្រឹត្តិការណ៍ «កាលយើងនៅក្មេង» នឹងប្រព្រឹត្តទៅចំនួន ២ ថ្ងៃកន្លះ៖ ថ្ងៃសៅរ៍ អាទិត្យ និង ព្រឹកថ្ងៃចន្ទ ទី ១៧ ១៨ និង ១៩ ខែមិថុនា ព. ស. ២៥៦១ គ. ស. ២០១៧ នៅឯវត្តបុរាណ ចំប៉ា ជិតកៀនស្វាយ តាមបណ្ដោយផ្លូវជាតិលេខ ១ រាជធានីភ្នំពេញ។ លោកអ្នកអាចចូលរួមកម្សាន្តដោយសេរី ចាប់ពីម៉ោង ៨ ព្រឹក រហូតដល់ម៉ោង ៨ យប់។

តើលោកអ្នកមានចំណាប់អារម្មណ៍ចង់ជួលតូបលក់ផលិតផលដែរឬទេ? សូមទាក់ទងតាមរយៈលេខទូរសព្ទខាងក្រោមនេះ៖

០៨១ ៨០៩ ៥៣៦ / ០៨៦ ៥៦៦ ៧៧៨ / ០៧៧ ២២០ ០៨៣ / ០១០ ២៨១ ០៦៩ / ០១០ ៦០០ ៨៤៨ / ០១២ ៦៧៩ ៩៩៥

ព័ត៌មានលម្អិត សូមចូលទៅកាន់ទំព័រ Facebook ទាយាទអង្គរ - Angkor Inheritor

https://www.facebook.com/AngkorInheritor/videos/1734440400182212/

https://www.facebook.com/AngkorInheritor/videos/1732330023726583/

អត្ថបទ៖ ប៊ិន ប៊ុណ្ណា