គម្រោងផ្ទះចូលនិវត្តន៍មានតម្លៃវិនិយោគ៥០០លានដុល្លារនៅលើភ្នំគីរីរម្យ កំពុងស្រូបទាញទេសចរជប៉ុនមកកម្ពុជា

2017-06-09 07:41:40
ចំនួនមតិ 0 | ចំនួនចែករំលែក 0

ចន្លោះមិនឃើញ

គម្រោងផ្ទះចូលនិវត្តន៍ដែលស្ថិតក្នុងគោលនយោបាយទាក់ទាញភ្ញៀវទេសចរ របស់ក្រសួង ទេសចរណ៍ និងបានដាក់ចេញជាផ្លូវការ ក្នុងនោះក្រុមហ៊ុនវិនិយោគពីប្រទេសជប៉ុន បាន ទទួល ដី សម្បទានសរុប ២ពាន់ហិកតានៅរមណីយដ្ឋានគីរីរម្យ ខេត្តកំពង់ស្ពឺ ពីរដ្ឋាភិបាលកម្ពុជាដើម្បីសាងសង់ផ្ទះឲ្យភ្ញៀវទេសចរចូលនិវត្តន៍ បានបោះទុនដំណាក់កាលដំបូងចំនួនប្រមាណជា ៥០០លានដុល្លារអាមេរិក និងកំពុងស្រូបទាញទេសចរជប៉ុនមកកម្ពុជាយ៉ាងច្រើនគួរឲ្យកត់សម្គាល់។

តំណាងក្រុមហ៊ុន A2A Town Cambodia ពីប្រទេសជប៉ុន លោក ហ៊ិន សុជាតិ បានឲ្យដឹងថា ក្រុមហ៊ុន បាន និងកំពុងអភិវឌ្ឍគម្រោងសាងសង់ផ្ទះស្នាក់នៅរយៈពេលយូរ (ឬផ្ទះទី២ Second Home/Tourist Residence) ប្រភេទសាមញ្ញ និងប្រភេទប្រណិតសម្រាប់ផ្ដល់ដល់ទេសចរគ្រប់ប្រភេទ សម្រាប់ទាំងទេសចរដែលមានកម្រិតចំណាយខ្ពស់ និងមធ្យម ពិសេសទេសចរចូលនិវត្តន៍។

លោក សុជាតិ បានថ្លែងថា៖ « បន្ទាប់ក្រុមហ៊ុនប្រកាសជួលបន្តរលំនៅឋានសម្រាប់ភ្ញៀវទេសចរចូលនិវត្តន៍កាលពីឆ្នាំកន្លងទៅ យើងទទួលបានការជួលបន្តពីភ្ញៀវទេសចរជាច្រើនពីប្រទេសជប៉ុន ដែលមានរហូតដល់ ៦០ភាគរយនៃភ្ញៀវសរុប ខណៈភ្ញៀវក្នុងស្រុកមានប្រមាណ ២០ភាគរយ ទៅ៤០ភាគរយ»។

« អ្វីដែលជាចំណុចពិសេសទាក់ទាញភ្ញៀវទេសចរច្រើនមកកាន់តំបន់នេះ គឺដោយសារទីតាំងស្នាក់នៅ មានសភាពស្ងប់ស្ងាត់ លក្ខណៈធម្មជាតិ ជាតំបន់ដែលសម្បូរដោយដើមស្រល់ដែលច្រើនជាងគេបំផុតនៅកម្ពុជាស្របជាមួយនិងអាកាសធាតុដ៏ស្រស់បំព្រងនៃតំបន់ធម្មជាតិគិរីរម្យដែលមានទីតាំងស្ថិតនៅលើកំពូលដែលនៅជិតរាជធានីភ្នំពេញ មិនតែប៉ុណ្ណោះគឺភ្ញៀវអាចជួលត្រឡប់មកក្រុមហ៊ុនពេលមិនស្នាក់នៅ»។ លោក សុជាតិ បញ្ជាក់បន្ថែម។

គួរជម្រាបដែរថា កន្លងមក ក្រសួងទេសចរណ៍ បានធ្វើការសិក្សា ភ្ញៀវទេសចរវ័យចំណាស់ទាំងនោះ ភាគច្រើនមកពីប្រទេសចិន កូរ៉េ ជប៉ុន និងតំបន់អឺរ៉ុប ហើយភាគច្រើនពួកគេមានលទ្ធភាពខ្ពស់ក្នុងការចំណាយលំហែកម្សាន្ត ដើម្បីសុខភាពបន្ទាប់ពីពួកគេបានចូលនិវត្តន៍ពីការងារ។

តាមការសិក្សាបង្ហាញថា ភ្ញៀវទេសចរប្រភេទនេះ និយមចូលចិត្តរស់នៅទីកន្លែងដែលស្ងប់ស្ងាត់ដើម្បីសម្រាកកាយ ពោលដូចជាតំបន់ភ្នំ កោះ និងសមុទ្រ ព្រោះវាទីកន្លែងមានខ្យល់អាកាសបរិសុទ្ធតាមបែបធម្មជាតិ ដែលអមជាមួយរុក្ខជាតិបៃតង។ លើសពីនេះទៀត ពួកគេក៏អាចធ្វើដំណើរកម្សាន្តទៅតាមតំបន់ជនបទ ឬនៅតាមស្រុកនានា ដែលស្ថិតជាប់តំបន់ទេសចរណ៍នោះ តាមរយៈការជិះកង់ និងថ្មើរជើងបានផងដែរ៕

អត្ថបទ៖ ស៊ិន សាវ៉េត