មិនធម្មតា! ម្រេចជុំវិញពិភពលោកធ្លាក់ថ្លៃទាំងអស់ តែម្រេចកំពតនៅរក្សាតម្លៃខ្ពស់បំផុតដាច់គេ

2017-06-12 04:38:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ម្រេចកំពតត្រូវបានគេទទួលស្គាល់ថា ជាម្រេចដែលមានគុណភាពខ្ពស់ជាងគេលើពិភពលោក។ យ៉ាងណាមិញថ្មីៗនេះ គេសង្កេតឃើញថា តម្លៃម្រេចនៅទីផ្សារអន្តរជាតិកំពុងជួបបញ្ហា ក្នុងនោះគុណភាពបានក្លាយជាបញ្ហាចម្បងបំផុត ដែលបានធ្វើឲ្យតម្លៃម្រេចធ្លាក់ចុះជាលំដាប់។ ដោយឡែកម្រេចកម្ពុជា ហាក់កំពុងឡើងកូដខ្លាំងទៅវិញ ស្របពេលតម្រូវកាន់តែច្រើនឡើង។

ប្រធានសមាគមម្រេចខេត្តកំពត លោក ងួន ឡាយ បានប្រាប់ Sabay ថា បច្ចុប្បន្នទីផ្សារម្រេចនៅជុំវិញពិភពលោកកំពុងធ្លាក់ចុះជាលំដាប់ ក្នុងនោះក្រៅពីម្រេចរបស់សមាគមខេត្តកំពត គឺធ្លាក់ថ្លៃទាំងអស់ តួយ៉ាងផលិតផលម្រេចនៅក្នុងស្រុកនិងក្រៅស្រុកផងដែរ។ លោកបញ្ជាក់ថា តម្លៃម្រេចកំពត បានដាក់នៅលើទីផ្សារអឺរ៉ុបបាន ៤០០អឺរ៉ូ ឬប្រមាណជា ៤២៥ដុល្លារ តាំងពីយូរណាស់ហើយ។

លោកបន្ថែមថា មូលហេតុដែលធ្វើឲ្យម្រេចកំពតរក្សាតម្លៃបានខ្ពស់ជាងគេ ក៏តែគុណភាពល្អដាច់គេ និងទទួលដោយប្រទេសជុំវិញពិលោក។ លោកគូសបញ្ជាក់ « ការដាំដុះម្រេចនៅភូមិសាស្ត្រខេត្តកំពតនេះ ធ្វើឡើងតាមលក្ខណៈប្រពៃណីសុទ្ធសាធ ដោយមិនប្រើប្រាស់ជីគីមី ឬថ្នាំសម្លាប់សត្វល្អិតគីមីឡើយ «ប្រើឈ្មោះម្រេចកំពត យើងអត់ប្រើថ្នាំអ្វីដែលខុសពីដូនតាយើងបន្សល់ទុកឱ្យធ្វើទេ។ យើងប្រើតែថ្នាំធម្មជាតិទេ»។

គួរជម្រាបដែរថា យោងតាមការចេញផ្សាយកាសែត បាងកកប៉ុស្តិ៍ ថ្ងៃទី១២ ខែមិថុនា បានឲ្យដឹងថា ម្រេចកំពតគុណភាពល្អបំផុតរបស់ខ្មែរ អាចលក់បានតម្លៃរហូតដល់ទៅ ៤២៥ដុល្លារអាមេរិក ក្នុងមួយគីឡូក្រាម នៅអឺរ៉ុប ខណៈដែលម្រេចវៀតណាម លក់ក្នុងតម្លៃតែ ៨ដុល្លារប៉ុណ្ណោះ ក្នុងមួយគីឡូក្រាម៕

អត្ថបទ៖ ស៊ិន សាវ៉េត