iMac Pro សមត្ថភាពកប់បំផុត មានតម្លៃជិត ២០ ០០០ ដុល្លារ

2017-06-14 01:53:26
ចំនួនមតិ 0 | ចំនួនចែករំលែក 0

ចន្លោះមិនឃើញ

iMac Pro ដែល Apple ទើបប្រកាសចេញកាលពីសប្ដាហ៍មុននឹងមានលក់នៅអំឡុងខែធ្នូខាងមុខនេះ ដោយមានតម្លៃទាបបំផុតចាប់ពី ៤ ៩៩៩ ដុល្លារ។ យ៉ាងណាក្ដីប្រសិនបើចង់ Upgrade ម៉ាស៊ីនឲ្យមានកម្លាំងខ្លាំងកប់ត្រូវចំណាយថវិកាបន្ថែមជាច្រើនលើសលប់។

ត្បិតថា Apple មិនបានបង្ហាញពីតម្លៃជាក់លាក់នៃការ Upgrade ម៉ាស៊ីន ប៉ុន្តែវិបសាយ ZDNet បានប៉ាន់ស្មានពីការចំណាយលើ iMac Pro ដែលមានសមត្ថភាពកប់កំពូល។ គ្រឿងបន្លាស់សំខាន់បួនដែល ZDNet ប្រើរួមមាន Processor, RAM, ក្រាហ្វិក និង អង្គផ្ទុកទិន្នន័យ។

ដំបូងគឺ Processor ម៉ូដែល Xeon E5-2697 ដែល Upgrade ពី 8-core ឡើងដល់ 18-core ត្រូវចំណាយប្រមាណ ៤ ០០០ ដុល្លារ។ ចំណែក RAM Upgrade ពីទំហំ ៣២ GB ឡើងទៅ ១២៨ GB ត្រូវចាយប្រមាណ ២ ៧០០ ដុល្លារ។ បន្តមកទៀតគឺក្រាហ្វិកដែល Upgrade ពី Pro Vega 8GB HBM2 ឡើងទៅ Pro Vega 16GB HBM2 ត្រូវចំណាយប្រមាណ ២ ០០០ ដុល្លារ បន្ថែមទៀត។ ចុងក្រោយអង្គផ្ទុកទិន្នន័យប្រភេទ SSD ទំហំ ៤ TB ត្រូវចំណាយប្រមាណ ៣ ៦០០ ដុល្លារ។

សរុបទៅតាមការប៉ាន់ស្មានខាងលើគេត្រូវចំណាយប្រហែល ១៧ ២៩៩ ដុល្លារ ដើម្បីបាន iMac Pro ដែលមាន Processor Xeon 18-core, RAM ទំហំ ១២៨ GB, ក្រាហ្វិក ១៦ GB និង អង្គផ្ទុកទិន្នន័យ SSD ទំហំ ៤ TB៕

ចុចអាន៖