ទូកទៅកំពង់នៅ! មកស្គាល់កវីនិពន្ធអក្សរសិល្ប៍ខ្មែរល្បីៗ បន្សល់ទុកស្នាដៃមកដល់បច្ចុប្បន្ន

2017-06-14 08:10:56
ចំនួនមតិ 0 | ចំនួនចែករំលែក 0

ចន្លោះមិនឃើញ

ដូចពាក្យចាស់តែងនិយាយថា ទូកទៅកំពុងនៅ ជាក់ស្ដែងមានបុគ្គលល្បីៗជាច្រើនរូបរបស់កម្ពុជា បានឃ្លាតឆ្ងាយពីលោកនេះមែន តែស្នាដៃដ៏មានតម្លៃមិនអាចកាត់ថ្លៃបាន មិនទៅតាមរូបកាយ របស់លោកនោះទេ។ ខាងក្រោមនេះជាកវីនិពន្ធអក្សរសិល្ប៍ល្បីៗ មួយចំនួនដែល Sabay បានដកស្រង់មកសរសេរប៉ុន្តែមិនទាំងអស់នោះទេ ហើយក៏មិនបានសរសេរនូវប្រវត្តិរបស់កវីទាំងនោះដោយលម្អិតដែរ ដោយគ្រាន់តែរំលេចឱ្យដឹងនូវស្នាដៃរបស់លោកខ្លះៗប៉ុណ្ណោះ។ ដូច្នេះសូមប្រិយមិត្តទៅស្គាល់ទាំងអស់គ្នា៖

១. កវី ញ៉ុក ថែម

លោក ញ៉ុក ថែម កើតនៅថ្ងៃទី ២២ ខែ មិថុនា ឆ្នាំ ១៩០៣ នៅ ឃុំស្វាយប៉ា ស្រុកសង្កែ ខេត្តបាត់ដំបង ។ បិតាលោក ឈ្មោះ ញុំ រីឯមាតា ឈ្មោះ ហៀក ជាជាតិខ្មែរ ហើយជាកសិករនៅ ភូមិអូតាគី ឃុំជ្រៃស្រុក ខេត្តបាត់ដំបង លោកជាកវីនិពន្ធដ៏ល្បីល្បាញមួយរូបរបស់កម្ពុជា ហើយស្នាដៃដែលលោកបានបន្សល់ទុករហូតមកដល់បច្ចុប្បន្នដូចជា៖

១. ពុទ្ធប្បវត្តិសង្ខេប

២. អនុពុទ្ធប្បវត្តិ ភាគ១-២

៣.ប្រជុំសុភាសិត ភាគ១-២

៤. មហាវេស្សន្ដរជាតក

៥. ប្រជុំពុទ្ធភាសិត ជាតិសាសនាព្រះមហាក្សត្រ

៦. រឿងបិសាចស្នេហា (ប្រលោមលោកបោះពុម្ពឆ្នាំ១៩៤២)

៧. រឿងកុលាបប៉ៃលិន (ប្រលោមលោកបោះពុម្ពក្នុងឆ្នាំ១៩៣៦ ឬ១៩៤៣)

៨. ឯកសហរាត្រី (ភាគខ្លះ ប្រែ)

៩. ចូឡវេទល្លសូត្រ

១០. វិធីប្រតិបត្តិធម៌

១១. ពន្លឺអាស៊ីទ្វីប

១២. បញ្ញាសជាតកសង្ខេប ភាគ១-២។

២. កវី នូ ហាច

លោក នូ ហាច កើតនៅថ្ងៃទី២៦ ខែមិថុនា ឆ្នាំ១៩១៦ នៅឃុំកំពង់ព្រះ ស្រុកសង្កែ ខេត្ត បាត់ដំបង។ ឳពុក នាមឃួន នៅ និងម្តាយនាម ឳរ មួច ពួកគាត់ជាកសិករ។ លោក នូ ហាច ជាកូនច្បង និងមានប្អូនៗច្រើននាក់ទៀត ក្នុងនោះមានប្អូនស្រី៣នាក់ផងដែរ។

លោកនូ ហាច ត្រូវបានគេទទួលស្គាល់ជាពិសេសក្នុងស្នាដៃរឿងមនោសញ្ចេតនាដែល មានចំណងជើងថាផ្កាស្រពោន។ តែជារួមលោកមានស្នាដៃផ្សេងៗទៀតដូចជារឿងខ្លី កំណាព្យ (លោកសរសេរកំណាព្យជាកាព្យបែបបារាំង)។ល។ ហើយលោកជាអ្នកនិពន្ធ ដែលសរសេរ ឱ្យទស្សនាវដ្ដីរាត្រីថ្ងៃសៅរ៍ ទស្សនាវដ្តីនារី ទស្សនាវដ្ដីរួមមិត្ត។ល។ ចំណងជើងអត្ថបទនានាដែលប្រមូលបានមាន៖

១.រឿងផ្កាស្រពោន ឆ្នាំ១៩៤៩

២.រឿងមាលាដួងចិត្ត ឆ្នាំ១៩៧២

៣.រឿងត្រួយជីវិត ឆ្នាំ១៩៧៣

៤.មធុរសជាតិ សិក្សាអត្ថបទ ដកស្រង់ពីទស្សនាវដ្តីនារីលេខ១0 ទំព័រ៣៥៣ ដល់ ៣៥៦ ខែតុលា ឆ្នាំ១៩៥១

៥. រឿងខ្លី កូនក្រក ផ្សាយដោយទស្សនាវដ្តីរួមមិត្តលេខ៨ ថ្ងៃទី១៥ ខែឧសភា ឆ្នាំ១៩៥៣ ទំព័រ១៥ និង១៦។

៦. ដំណើរចេញទៅប្រទេសបារាំង កាព្យបែបបារាំង ផ្សាយដោយទស្សនាវដ្តីនារី លេខ១៥ ឆ្នាំ ១៩៥២។

៧. ខ្ទីង កាព្យបែបបារាំង ផ្សាយដោយទស្សនាវដ្តីនារីលេខ ១១ ខែវិច្ឆិកា ឆ្នាំ១៩៥១ ទំព័រ៣៩៦។

៨. រឿងនារីជាទីស្នេហា ឆ្នាំ១៩៥៣

៩. លាវ័ណ្យ និង រវិន្ទ ឆ្នាំ១៩៥៣ បោះពុម្ពភាគ១ ឆ្នាំ ១៩៥៥ បោះពុម្ពភាគ២

១០. រឿងខ្លី ល្បាតគយក្នុងគ្រាមួយនៅទន្លេសាប ដកស្រង់ពីទស្សនាវដ្តីរាត្រីថ្ងៃសៅរ៍ លេខ ១0 ថ្ងៃ ទី១៩ ខែកុម្ភៈ ឆ្នាំ១៩៥២ ទំព័រ២៩ ដល់៣១។

១១. ថូបែក កាព្យបែបបារាំង លោកនូ ហាចដកស្រង់ពីទស្សនាវដ្តីនារីលេខ១៣ ខែមករា ឆ្នាំ ១៩៥២ ទំព័រ១១។

៣. លោក សួន សុរិន្ទ

លោកកើតនៅថ្ងៃទី ០៩ កក្កដា ឆ្នាំ១៩៣០ នៅសង្កាត់ជ្រៃ ស្រុកសង្កែ ខេត្តបាត់ដំបង។ស្នាដៃរបស់លោកគឺរឿងព្រះអាទិត្យថ្មីរះលើផែនដីចាស់ដែលបានជាប់លេខ១រង្វាន់ឥន្ទ្រទេវីលើកទី១។

៤.ភិក្ខុសោម

កវី សោម កើតឆ្នាំ ១៨៥២ នៅឃុំកំព្រៅ ស្រុកស៊ីធរកណ្ដាល ខេត្តព្រៃវែង។

បិតានាម ងួន មាតានាម យិន ជាកសិករ។

អាយុ ១៥ ឆ្នាំ បានរៀនអក្សរ-លេខនព្វន្តនៅក្នុងស្រុកកំណើត ហើយបានបួសជាសាមណេរពីរវស្សា ក៏សឹកមកជួយធ្វើការងាររកស៊ី។

អាយុ ២១ ឆ្នាំ បានឧបសម្បទាជាភិក្ខុ ក្នុងសំណាក់ឧបជ្ឈាយ៍នាម រស់ មាននាមបញ្ញត្តិថា បទុមត្ថេរ និងបានបន្តការសិក្សានៅក្នុងក្រុងភ្នំពេញអស់ជាច្រើនឆ្នាំ ហើយវិលទៅធ្វើជាចៅអធិការនៅវត្តកំព្រៅវិញ។

មាននិស្ស័យស្លូតបូត ចូលចិត្តអានសាស្ត្រាគម្ពីរ ស្ដាប់ចម្រៀង ចាប៉ី រហូតចេះតែងកាព្យដ៏ប៉ិនប្រសប់។

លោកសុគតនៅ គ.ស. ១៩៣២ ក្នុងកំណត់ជន្មាយុ ៨០ ឆ្នាំ។

ស្នាដៃដែលកូនខ្មែរចាំមិនភ្លេចគឺ រឿងទុំទាវ។

៥. កវី ឌឹក គាម

លោក ឌឹក គាម កើតនៅថ្ងៃទី០៥ ខែមករា ឆ្នាំ ១៩៣៦ នៅសង្កាត់ឫស្សីកែវ ស្រុកឆ្លូង ខែត្រក្រចេះ។ ស្នាដៃរបស់លោករួមមាន៖

១. វេយ្យាករណ៍ដោយរូបភាព

២.រឿងព្រះនាងឥន្ទ្រទទេវី

៣.រឿងចៅពញាហុក

៤. រឿងភូមិតិរិច្ឆាន និពន្ធជាមួយកវី ឌឿក អំ ( ១៩៦៤- ១៩៦៥)

៦. រីម គីន

កវី រីម គីន កើតនៅថ្ងៃទី០៨ ខែវិច្ឆិកា ឆ្នាំ១៩១១ នៅបាក់ទូក ក្នុងសង្កាត់ទី៥ នៃក្រុងភ្នំពេញ។ បិតាមានតួនាទីចុងក្រោយមុនចូលនិវត្តន៍ជា ចៅហ្វាយខែត្រកំពង់ស្ពឺ នាមគីម, មាតានាម រសា។ នៅជាកុមារ មានឈ្មោះហៅថា «ពន្លក»។ លោកបានរៀបការជាមួយកូនស្រីលោកចៅក្រមស្រីនាមនាងសិន ហៅ ស៊ីមន នៅថ្ងៃពុធទី១៦ ខែមករា ឆ្នាំ១៩៣៥។

ស្នាដៃរបស់លោករួមមាន៖

១. រឿងសុផាត (បោះពុម្ពនៅឆ្នាំ ១៩៣៨)

២. រឿង ចិត្តចងចាំ (បោះពុម្ពនៅឆ្នាំ ១៩៤៨)

៣. រឿង ស្ត្រីកំព្រា (បោះពុម្ពនៅឆ្នាំ ១៩៥១)

៤. រឿង មើលព្រះចន្ទ (បោះពុម្ពនៅឆ្នាំ ១៩៥២)

៥. រឿង នាងសមាភាវី (បោះពុម្ពនៅឆ្នាំ ១៩៥២)

៦. រឿង ពលវង្សា (បោះពុម្ពនៅឆ្នាំ ១៩៥៣)

៧. រឿង ក្លាហាន (បោះពុម្ពនៅឆ្នាំ ១៩៥៣)

៨. រឿង នាង រតននារី (ពាក្យកាព្យឆ្នាំ ១៩៣៨)

៩. រឿង ឈាមរកឈាម(ពាក្យកាព្យឆ្នាំ ១៩៣៨)

១០. រឿង រៀនមិនពន្យល់(ពាក្យកាព្យឆ្នាំ ១៩៣៨)

អត្ថបទ៖ វឌ្ឍនៈ