៥ យ៉ាង CEO វ័យក្មេងឱ្យតម្លៃបំផុត ដើម្បីក្លាយជាមនុស្សជោគជ័យមុនអាយុ ៣០ឆ្នាំ

2017-06-15 09:28:50
ចំនួនមតិ 0 | ចំនួនចែករំលែក 0

ចន្លោះមិនឃើញ

លើលោកនេះគ្មាននរណាម្នាក់ ដែលមិនចង់ក្លាយជាមនុស្សជោគជ័យទាំងវ័យក្មេងនោះទេ ក៏ប៉ុន្តែមិនមែនជារឿងងាយស្រួល ដែលមនុស្សគ្រប់គ្នាអាចធ្វើបានដែរ។ ដើម្បីក្លាយជាមនុស្សជោគជ័យមុនអាយុ ៣០ឆ្នាំ តើទាមទារឱ្យរៀបចំខ្លួន និងមានគន្លឹះអ្វីខ្លះ? ខាងក្រោមនេះ ជាការចែករំលែកពីសហគ្រិនវ័យក្មេង សេង ពិសិដ្ឋ នាយកប្រតិបត្តិក្រុមហ៊ុន អនុស្សារៀបចំពិព័រណ៍ ជុំវិញបញ្ហានេះ។

១. សប្បាយចិត្តនឹងធ្វើអ្វីមួយរយៈពេលវែង

លោក សេង ពិសិដ្ឋ លើកឡើងថា របស់ដែលលោកឱ្យតម្លៃបំផុត គឺធ្វើអ្វីមួយដែលសប្បាយចិត្តនឹងធ្វើក្នុងរយៈពេលវែង មានន័យថា ធ្វើរឿងអ្វីក៏ដោយមិនមែន ធ្វើតែមួយឆាវទេ ត្រូវព្យាយាមអត់ធ្មត់ធ្វើរឿងនោះឱ្យដល់គោលដៅ។ នាយកប្រតិបត្តិវ័យក្មេងរូបនេះនិយាយថា៖ "មនុស្សឆ្លាតមានច្រើន តែមនុស្សដើរទៅដល់គោលដៅ មានតិច ភាពអត់ធ្មត់ព្យាយាមរយៈពេលវែង ជារឿងងាយស្រួលតែមនុស្សភាគច្រើនមើលរំលង។"

២. ជំនាញច្បាស់លាស់និងភាពជឿជាក់លើខ្លួនឯង

នាយកប្រតិបត្តិក្រុមហ៊ុនអនុស្សារៀបចំពិព័រណ៍ បាននិយាយថា ជំនាញច្បាស់លាស់នេះ មិនសំដៅ ទៅលើកម្រិតសញ្ញាបត្រ បរិញ្ញាបត្រ អនុបណ្ឌិតនោះទេ តែសំខាន់ថាតើចេះអ្វីឱ្យប្រាកដ ហើយជឿជាក់ថា អាចធ្វើរឿងមួយដ៏ល្អ ធ្វើបានដោយឥតខ្ចោះ គួរតែសាកល្បង។ បន្ថែមលើពីនេះត្រូវបង្កើតភាពជឿជាក់លើខ្លួនឯង បូកផ្សំជាមួយជំនាញ ប្រសិនបើមានតែជំនាញ តែខ្វះភាពជឿជាក់ក៏មិនបានដែរ។ មានទាំងពីរយ៉ាងនេះទើបអាចជំរុញឱ្យមនុស្សម្នាក់ដើរទៅដល់គោលដៅនោះបាន។

៣. រក្សា Personal Branding

មកដល់ចំណុចនេះ លោក សេង ពិសិដ្ឋ ប្រាប់ថា ធ្វើជាមនុស្សម្នាក់សំខាន់បំផុតត្រូវធ្វើខ្លួនឯង ឱ្យមានកេរ្តិ៍ឈ្មោះល្អ រក្សានូវតម្លៃរបស់ខ្លួន មិនថានៅទីណា កន្លែងណានោះទេ ដាច់ខាតកុំធ្វើឱ្យខូចឈ្មោះរបស់ខ្លួន។ លោកបន្ថែមទៀតថា កុំព្យាយាមនិយាយហើយមិនធ្វើ ត្រូវធ្វើជាមនុស្សដែលគេគ្រប់គ្នា ជឿជាក់ ដែលគេឱ្យតម្លៃ កុំគិតតែពីខ្លួនឯង ធ្វើអ្វីក៏ដោយត្រូវប្រាកដថា មិនប៉ះពាល់ដល់អ្នកដទៃ។ បើសិនជាអាចធ្វើចំណុចនេះបាន នោះនឹងក្លាយជាមនុស្សជោគជ័យ ជាមនុស្សដែលគេត្រូវការបំផុតទោះទៅកន្លែងណាក៏ដោយ។

ទស្សនាក្នុងកិច្ចសម្ភាសន៍ពិសេស៖

៤. ខិតខំសន្សំ

សហគ្រិនរូបសង្ហារនេះ បានបន្តទៀតថា មនុស្សមួយចំនួនមានប្រាក់ខែតិចតួច ចូលចិត្តបង្អួតគ្នារឿងទូរសព្ទទំនើប ឡាន ម៉ូតូ ជាងអ្នកដែលគេមានមែនទែនទៅទៀត។ ដូច្នេះមិនគួរធ្វើបែបនេះទេគួរតែរៀនសន្សំទើបជាការប្រសើរ ដើម្បីមានដើមទុនរកស៊ីនៅពេលមានឱកាសល្អណាមួយ បានមកដល់។ លោក សេង ពិសិដ្ឋ បន្តទៀតថា មនុស្សភាគច្រើនចូលចិត្ត បង្ហាញ បង្អួតគ្នា គ្នារឿងសម្ភារៈនិយម តែ នៅពេលដែលចង់ធ្វើអ្វីមួយគឺគ្មានលុយ គ្មានដើមទុន ហេតុនេះហើយការសន្សំ គឺជារឿងដ៏ល្អបំផុត។

៥. ជាមនុស្សដែលមានសីលធម៌ គុណធម៌ក្នុងខ្លួន

ចំណុចចុងក្រោយ លោក សេង ពិសិដ្ឋ លើកឡើងថា ត្រូវធ្វើជាមនុស្សដែលអាចទុកចិត្តបាន ធ្វើជាមនុស្សល្អ បើធ្វើបែបនេះបាននោះទើបក្លាយជាមនុស្សជោគជ័យក្នុងរយៈពេលវែង។ លោកនិយាយថា៖ "រឿង សីលធម៌ គុណធម៌ នេះធ្វើឱ្យយើងខុសប្លែកពីមនុស្សដទៃ ត្រូវធ្វើឱ្យមនុស្សសំខាន់នៅជុំវិញខ្លួន ជឿជាក់ថាយើងជាមនុស្សដែលមិនមែនចេះតែនិយាយ តែមិនធ្វើនោះទេ៕"

អត្ថបទ៖ វឌ្ឍនៈ